Әл-Фараби атындағы Қазақ Ұлттық университетінің шетелдегі серіктестерінің
бірі – Корея Республикасы және оның жоғары оқу орындары. ҚазҰУ-дың студенттерге арналған бағдарламасы аясында Алина Анар шетелдік мамандардан сабақ алып, ой-өрісін кеңейтіп, мамандығы бойынша алған білімін өзге елде шыңдап қана қоймай, іс жүзінде қолдана алатындай мүмкіндікке ие болды. Ол Корея Респуб­лика­сының астанасы – Сеул қаласындағы Хангук Шет тілдер университетіне барып, «таң самалы елінде» алты ай білім алды.

Анар болашақта шығыс елдерінің мәдениетін, салт-дәстүрін, тарихын, тілін зерттейтін маман болатындықтан, универ­ситеттің корей тілі курстарына тіркеліп, мамандығына сай келетін сабақтарды таң­дады. Сонымен қоса сабақтан тыс уақыт­тарда, Корея университетінің қоғамдық өміріне де белсене атсалысып, жан-жақты іс-шараларға қатысты: Хангук Шет тілдер университе­тінің Орта Азия елдерін зерттеу кафедрасында қа­зақ тілі оқытылады. Сөйтіп, корей халқы Қа­зақстанға деген үлкен қызығу­шылығын білдіріп, жоғары оқу орындарында біздің елімізге қатысты көптеген ғылыми жобалар ұсынады. Хангук Шет тіл­дер университеті де «Opinion Mining» атты өз жобасына болашақ жас мамандарды тарту арқылы Анар Корея ғалым­дарымен бірлесіп, ізденіс жұмыстарын жүргізуге мүмкіндік алды. Корей тілі орта­лы­ғының ұйымдастыруымен өткен «ЕХPO-2017» атты мерекелік іс-шарада қа­зақ халқының салт-дәстүрі, әдет-ғұрпы мен шетелдегі имиджін көтеру мақсатындағы музыкалық қойылымда өз өнерін көрсетті. Бұл іс-шара универ­си­теттегі оқитын алуан түрлі мемлекет өкіл­дерінің, өзге ұлттардың алдында елін таныс­тырып, Отаны – Қазақ-с­тан жайлы шетелдіктерге ақпарат берді. Шетелдіктердің Қазақс­танға деген қызы­ғушылығы өте зор. Біздің ұлттық музыка әуені бар­лық тың­дарманды таң қалдырып, жиналған қауым қазақ қыздарымен бірге биледі. Хангук Шет тілдер университетінде корей тілі бойынша шешендік өнер жарысы өткі­зілді. Анар бұл бәйгеге де қатысып, көрер­мен­дер алдында Ұлы Отан соғысының арда­гері, Брест қамалының қорғаушысы, соғысқа басынан аяғына дейін қатысқан Қазақ Ұлттық университетінің түлегі, тарих, археология және этнология факуль­те­тінің құрметті ұстазы Ғаббас Жұматов жай­лы корей тілінде тағылымды жиын өткізді.
Анар әл-Фараби атындағы ҚазҰУ-дың академиялық мобильділік жобасы арқылы шетелді, соның ішінде кореялық білім сапасын да кеңінен зерделеп, оларға қазақтың ұлттық тілін, салт-дәстүрін, өнерін дәріп­теуге барынша үлес қосуда.

Ажар Ахметжанова,
әл-Фараби атындағы ҚазҰУ
Қазақстан тарихы кафедрасының доценті.