Зиялылар бас қосты
17.02.2017
1010
0

Ақпан айының тоғызы күні Шығыс Қазақстан облысы әкімінің жуықта сайланған орынбасары Әсем Нүсіпова мен облыстық Мәдениет, архивтер және құжаттама басқармасының басшысы Азамат Мұхамедчинов Қазақстан Жазушылар одағы, Суретшілер одағы, Композиторлар одағы сияқты шығармашылық ұйымдардың  аймақтағы бөлімшелері өкілдерінің, сондай-ақ,  музейлер  мен архивтер, кітапханалар, театрлар, филармония  және өнер колледждері сияқты мәдениет және өнер саласы өкілдерінің басын қосып, Шығыс Қазақстан өнер музейінің Үлкен залында келелі жиын өткізді.

– Бүгінгі кездесуіміздің басты мақсаты – өздеріңізбен танысу, қан­дай проблемаларыңыз бар, соны тыңдау және қолдан келгенше көмектесу, бірлесе жұмыс іс­теу, – деген Шығыс Қазақстан облысы әкі­мінің орынбасары жиынға қа­тысқан зиялы қауымның пікі­рі­не құлақ қойды.
Ең алдымен Қазақстан Жазу­шы­лар одағының Шығыс Қа­зақ­стан облыстық бөлімшесінің жуық­та сайланған директоры Әлі­бек Қаңтарбаев сөз алды:
– Жасаған Иеміз аста-төк дары­нымен қоса ешқандай редак­ция­­лау­ға көнбейтін мінез бен қа­сиет бер­ген Қасым Қайсенов, Қали­хан Ысқақов, Оралхан Бөкеев, Кәмен Ора­залин, Ақтан Нұрбаев, Дидахмет Әшімханұлы, Талаптан Ахметжан, Серік Ғабдоллаұлы, Мү­сілім Құ­марбеков сияқты ба­қиға аттанып кеткен қаламгерлер мен бү­гін­де көзі тірі Медеу Сәрсеке, Ұлықбек Есдәулет, Несіпбек Айт­ұлы, Әлі­бек Асқаров, Гүлнар Салық­баева, Ты­ныштықбек Әбді­кәкім, Жанат Әс­кербекқызы сынды ақын-жазу­шы­лардың соңда­рынан еріп келе жат­қан жас да­рын­дар шұғылалы Шы­ғыс өңі­рінде бүгін де аз емес. Тек соларға дұрыс бағыт-бағдар бе­ріп, ұясында мейлінше ақсүйек­тік тәрбие бере алсақ, құба-құп бо­­лар еді, – дей келіп, ол облыс әкі­мі орынбасарын бөлімшенің бү­гін­гі жағдайынан қысқаша хабардар етіп, лауазымды басшының кө­мегін қажет ететін бірнеше тү­йін­ді мә­се­лелерді ортаға салды.
1999-2000 жылдары бастау алып, қалың қауымның ыстық ықы­­ласына бөленген, алайда кейін­­нен жұмысын тоқтатқан, екі жылда бір өтуге тиіс Оралхан Бө­кей атындағы республикалық айтысты, сонымен бірге 2010-2014 жыл­дар аралығында Шығыстың ру­хани абыройын көтеруге үлесін молынан қосқан «Шығыс шынары» атты респуб­ликалық жыр мү­шәйрасын да жаңғырту керектігі айтылды.
Биылғы жыл – Алаш қозға­лы­сы­ның 100 жылдығы. Алаштың тұң­ғыш астанасы бізде. Ол – Семей. Қазақстанның басқа өңірлері ал­дымен біздерге қарайды. Сон­дық­тан біздер жер-жерлерде дирек­тива-баяндамалар оқумен, дәс­түр­ге енген, жұртты әбден тойдырып бол­ған бедеу көрмелермен шектелмей, нақты іске көшкеніміз абзал. Ойы­мыз бен қырымыздағы әлі де бол­са Алаш қайраткерлерін, жалпы қазақ халқын аяусыз қырған боль­шевиктердің, шовинистердің, марксизм-ленинизм классик­тері­нің атынан әлі күнге айрылмай ке­ле жатқан жер-су, ауыл-аймақ, кө­шелердің атауларын көпке соз­бай қазақшалау керек.
Өскемен мен Семейде реп­рес­сия­ға, оның құрбандарына арнап мұра­жай ашу қажет. Оның үстіне Се­мей – Алаштың тұңғыш әрі соң­ғы астанасы. Облыста ғасырға жуық тарихы бар басылымдар бар, алай­да сол баспасөздің кешегісі мен бүгіні жайлы сыр шертетін мұ­ра­жай да жоқ.
Биылғы жыл – кешегі күңгірт қо­ғамда осы облыстың бетке ұстар ақын­дары болған, бүкіл ғұмыр­ла­рын осы өңірдің руханиятына ар­на­ған марқұмдар Тұрғазы Нұқаев­тың, Серік Ғабдоллаұлының
80 жыл­­дығы. Олар көздері тірісінде ме­рейтой, жеке бастарына қатысты ме­реке көрмей өткен ардақтыла­ры­мыз еді. Соларға облыс деңгейінде үлкен бір шара өткізу керек.
Бұл мәселелердің жай-жапсары жеке-жеке аталып өтіп, көпшілік талқысына салынды.
Бұл келелі бас қосуда, сондай-ақ, жазу­шылар Көпен Ерқасов, Тоқтар Мағзұмов, Семейдегі Невзоровтар отбасы атындағы музей мен Шығыс Қ­азақстан Өнер му­зе­йі­нің дирек­тор­лары Татьяна Стромская, Нұр­жази Қалиева, об­лыс­тық архивтің директоры Түсіп­хан Түсіпбеков, Өнер колледжінің директоры Альмира Дүсіпова,
ҚР еңбек сіңірген артисі, әнші Вячеслав Ткач және бас­қа да өнер майталмандары сөй­леп, өздерінің өзекті ой-пікірлерін ортаға салды. Жиынға қатысып отыр­ған лауа­зым­ды басшылар жа­рыссөзге қаты­сушылардың кейбір сауалдарына сол арада жауаптар бе­ріп, ұсыныс-пікірлерін жазып алып отырды.
Екі жаққа да пайдалы болған, бір­лесе атқарылатын біраз шаруа­лар­дың жобасы белгіленген келелі жиын­ды облыс әкімінің орынбасары Әсем Нүсіпова қорытын­ды­ла­ды.
Айтмұхамбет Қасымов,
Қазақстанның Құрметті журналисі.
Өскемен.

ПІКІР ҚОСУ