Мәкіл Құланбаевты еске алды
Ғ.Мүсірепов атындағы қазақ мемлекеттік академиялық Балалар мен жасөспірімдер театрында Қазақстан Республикасының еңбек сіңірген артисі, Мемлекеттік сыйлықтың лауреаты – Мәкіл Құланбаевтың туғанына
90 жыл толуына орай еске алу кеші өтті.
Еңбек жолын 1945-1948 жылдары Қызылорда қаласындағы облыстық музыкалық драма театрында бастаған актер 1948 жылы жаңадан ашылған Қазақтың мемлекеттік Балалар мен жасөспірімдер театрына ауысқан еді.
Шығармашылық жолында екі жүзден астам рөлдер сомдаған оның Ғ.Мүсіреповтің «Ақан сері – Ақтоқтысында» – Қоңқай,
М.Әуезовтің «Алуасында» – Назарбек, М.Ақынжановтың «Ыбырай Алтынсаринінде» – Найзағара, Ф.Шиллердің «Зұлымдық пен махаббатында» – Фердинанд, Ж.Мольердің «Скапеннің айласында» – Аргант, С.Мұқановтың «Мөлдір махаббатында» – Әбутәліп болыс, Б.Майлиннің «Шұғасында» – Пристав, Ә.Әлімжановтың «Махамбеттің жебесінде» – Махамбет, Ш.Құсайыновтың «Әл-Фарабиінде» – әл-Фараби бейнелері көрерменге жақсы таныс.
Мәкіл Құланбаев тек театрда ғана емес, Қазақстан мен Орта Азия, «Ленфильм», «Мосфильм» киностудияларында 70-ке тарта рөлдер ойнап, дубляж, телефильм, радиохабарлар жасауда да көп еңбек етті.
Актердің кинофильмдердегі «Менің атым Қожа» – Қаратай, «Жоғалған дос» – Естемесов, «Балалық шаққа саяхат» – Ыдырыс, «Алпамыс мектепке барады» – Алпамыстың атасы бейнелерін де халық жақсы қабылдаған еді.
Еске алу кешіне театр актерлері мен өнерге жақын көрермендер қатысты.
Гүлән НҰРСАДЫҚОВА.