Батыс Қазақстан облысының Ақжайық ауданында белгілі композитор, өнертанушы, жазушы, Қазақстан мен Қырғызстанның еңбек сіңірген мәдениет қайраткері  Ілия Жақановтың 80 жылдық мерейтойына арналған шаралар өтті.

Сол шаралар аясында Ақжайық ауданының орталығы Чапаев ауы­лындағы Жұбан ескерткіші тұрған алаң­да «Еділ-Жайық» әніне арнал­ған композиция салтанатты түрде ашыл­ды. Ескерткішті Ілия Жақа­нов пен Батыс Қазақстан облыс әкімінің орынбасары Бағдат Азбаев ашты.

Толқыны тайдай тулаған айдын төсінде қанатын жайған аққу бейнеленген ескерткіш жиналған­дардың көңілін асқақ­татып, сезім қылын тербеді. Дәл осы жерде ме­рей­той иесіне ақбоз ат сыйға тар­ты­лып, алаңға жас қарағайлар отыр­ғызылды. Ор­та­лық алаңда өлеңдер оқылып, ақын жырлары­ның ел есінде мәңгі қалатындығын тағы бір рет паш етті.

Ақжайық ауданының әкімі Әділ Жоламанов мәртебелі мейманды мерейтойымен құттықтап, «Еділ-Жайық» әніне ескерткіш ашылып, композитордың танымал әндері асқақтаған күннің өңір шежіресіне жазылып қалатынды­ғын атап өтті.

Ақжайық аудандық өлкетану мұражайында Ілия Жақановқа арналған бөлім ашылып, оған кітаптары мен әр жылдары түсіріл­ген фотолар, басқа да құнды жәді­гер­лер қойылды.

«Мерей» мәдени-демалыс орта­лығында Ілия Жақановтың «Сырлы жүрек пернесі» атты кездесу кеші өтіп, онда композитордың туындыларын облыс және аудан әртістері орындады.

«Мен Жұбан еліне үнемі ат басын бұрып, келіп тұрамын. Әр сапа­рым ерекше сезімге бөлейді. Мұны өзім аға тұтатын Жұбан рухына арналған құрмет деп есептеуге болады. Еліміздің тәуелсіздігі үшін күрескен, 1986 жылғы Жел­тоқ­сан оқиғасы кезінде қаһарман­дық көрсетіп, жастарымызды қор­ғай білген Жұбан ағаны әр­дайым кейінгі ұрпақ мақтан етіп, жарқын бейнесін жадында сақтай­тыны анық», – деді Ілия Жақа­нов.