Алматыдағы С.Мұқанов пен Ғ.Мүсіреповтің әдеби-мемориалдық музей кешенінде «Наурыз – думан» атты жыр кеші өтті. Жыр кешіне ақын, аудармашы, философия докторы (PҺD), әл-Фараби атындағы Қазақ Ұлттық университеті «Абай» ғылыми-зерттеу институтының профессоры Төрегелді Тұяқбай, ақын, Қазақстанның Құрметті жазушысы Шаяхмет Алжанбай және ақын, Халықаралық «Алаш» әдеби сыйлығының лауреаты, филология ғылымдарының кандидаты Бақытбек Бәмішұлы қатысып, Наурыз мейрамы­ның мәні мен маңызы туралы ой бөлісіп, өлеңдерін оқыды. Музей ке­ше­нінің кітапханасына кітаптарын сыйлады.
Кешті Музей кешенінің аға ғы­лыми қызметкері, ақын Әділғазы Қайыр­беков жүргізіп отырды. Шараға зиялы қауым өкілдері, Логистика және көлік академиясының, Алматы кол­леджінің оқытушысы Сандуғаш Өзбекова студенттерімен қатысты.