АРМЫСЫҢ, НАУРЫЗ! (толғау)
Салтымен ата-бабаның
жаңғырды қайта
заманым!
Тіршілік тасы, о, Наурыз!
Қайырлы болғай
қадамың!
Бұлдасам,
басым пұлысың!
Қасиетімнің
ұлттық құнысың!
Өзіңсіз мынау қазақтың
көрген де күні құрысын!
Аңсап бір күткен
ардағым!
Қолымды созған
арманым!
Тұманды түндер қапыда
көз жазып сенен
қалғаным!
Өткен де күннің шатағы
батады жанға!
Батады!
«Тарқады Наурыз!»
деген күн
шағылып тауы Бабамның
жуылды-ау жаспен
сақалы!
Адыра қалғыр заман-ай!
Дау салып қайтем
саған-ай!?
Шолтаңдап қолда
қамшысы,
халқымның қалған
сорына
Шолақ белсендіңнің
жаманы-ай!
Еркіндеп, үйге ене алмай,
Үлкенге
сәлем бере алмай,
көрісе келген көршімнің
Ұсынған қолын
сан қақтым,
шын беріп тұр деп
сене алмай!
Арыстан сынды өр кеуде!
Сұлап та түстім көлбеуге!
Көріспек қайда?!
Кеш, бауырым!
Наурыз күн сенің жүзіңді
тырысып бақтым
көрмеуге!
Көзімнің алды мұнар-ды!
Ұмыта алмаспын
бұларды.
Наурызсыз өтті
қанша жыл
тарқата алмай бір
құмарды?!.
Таусылып барып
амалым,
қақырай жаздап
қамалым,
Дегенге, сірә, кім сенген
«Наурызым!
Сені табамын!»
Наурызым –
Байлық, берекем!
Өзіңмен ғана ел екем!
Салтанат қайда?!
Сен жоқта, ол –
қолым жетпей-тұғын
жер екен!..
Ақтарыла айтам
ағымнан:
«Айрылдым ба? – деп
барымнан»,
аңырған шақта
сен жеттің!
Мереке басы, о, Наурыз!
Сен келген күнің –
ырыс-құт,
ақ түйем қарыны
жарылған!
Көңлім – дария шалқыған,
қорғасын жаным
балқыған!
Сарғая күткен өзіңді
сәлем ал
қазақ халқынан!
Салтымен ата-бабаның
жаңғырды қайта
заманым!
Жаныма жайлы
жамалым,
Жаңа жыл басы,
о, Наурыз!
Қайырлы болғай
қадамың!
Айсұлу ҚАДЫРБАЕВА,
Қазақстан Жазушылар одағының мүшесі,
Құрмет орденінің иегері,
Алматы қаласы
Студия «Team28»