Армияның орталық спорт клубында жастарға патриот­тық тәрбие беру жұмыстары жолға қойылған. Жеңістің 80 жылдығына және Кеңес Одағының батыры Әлия Молдағұлованың 100 жылдығына арналған күштік құрылымдар арасында самбодан өткен чемпионаты сөзіміздің бір дәлелі іспет­ті.

Турнирдің құрмет­ті қонақтары қатарында Халық қаһарманы генерал-полковник Сәт Тоқпақбаев, ҚР Парламентінің де­путат­тары, күш құрылымдарының бас­шы­лары және белгілі спортшылар болды.
Спорт­тық және жауынгерлік Самбо федерациясы самбоны дамыту жүйесін жетілдіру және оны өңірлерде қаржыландыруды ұлғайту үшін игілікті қадамдар жасап жатқаны рас. Спорт­тың осы түрінің бұқаралық сипатын арт­тыру үшін балалар мен жасөспірімдерге арналған самбо секцияларын ашудың да маңызы зор болмақ.
Чемпионатқа Қорғаныс, Ішкі істер, Төтенше жағдайлар министрліктерінің, Мемлекет­тік күзет қызметінің, Ұлт­тық ұланның, Шекара қызметінің, Ұлт­тық қауіпсіздік комитетінің, өзге де құрылымдардан 26 командадан 140-тан астам спортшы қатысты. Татами шеберлері жеті салмақ дәрежесінде өнер көрсет­ті.
Чемпионат қорытындысы бойынша командалық есепте Қорғаныс министрлігінің Армия орталық спорт клубы құрамасы Ұлт­тық ұлан мен Арнайы операциялар күштерінен басым түсіп, жеңіске жет­ті.

Өз тілшіміз