Халқының 40 пайызға жуығы тұрақты түрде дене шынықтырумен айналысатын Қызылжар өңірінде спорт күні де салтанат­ты түрде аталып өт­ті. Оған спортшылар, бапкерлер, ардагерлер мен сала мамандары жиылды. Шарада облыстағы аталған саланың дамуы, жетістіктері туралы айтылып, үздіктер марапат­талды.

Солтүстік Қазақстан облысының орталығы мен аудандарында спорт­тық нысандардың құрылысы қызған. Алдағы уақыт­та Мамлют елді мекенінде жаңа денешынықтыру-сауықтыру орталығы ашылып, аудан орталығындағы ең негізгі спорт­тық нысандардың қолжетімділігі 100 пайыз көрсеткішке жеткен. Одан бөлек, облыс орталығында «Қарасай» стадионы жөнделіп, теннис орталығы салынып жатыр.
Спорт күніне орай Ақан сері атындағы облыстық филармония залына жиналғандарды облыс әкімінің орынбасары Қанат Дүзелбаев құт­тықтады.
– Біз өз спортшыларымыздың жетістіктерімен мақтанамыз. Солтүстік Қазақ­стан – Александар Винокуров, Жанат Жақиянов, Ризабек Айтмұқан сынды мықтылардың өлкесі. Өңірімізден шыққан пара биотланшы Ербол Хамитовты әлем мойындады, өткен қыста Кристина, Алина Шумековалар Жапонияда өткен коньки жарысында жоғары дәрежеде өнер көрсет­ті. Биылғы Париж Олимпиадасында ел намысын Алексей Луценко мен Амир Закиров қорғады. Жергілікті «Қуаныш», «Есіл», «Қызылжар арландары» клубтары ел бойынша үздіктер қатарында. Жыл сайын спорт­тық инфраструктура салуға көңіл бөлініп келеді. Алдағы уақыт­та өңір тұрғындары заманауи стадион, хоккей корты, денешынықтыру-сауықтыру орталықтары мен жабық бассейнде спортпен айналысу үшін жұмыстар істелуде. Мерекеде баршаңызды құт­тықтай отыра, шаңырақтарыңызға бақыт, өздеріңізге биік белестерді бағындыруды тілеймін, – деді Қанат Дүзелбаев.
Бұл күні 50-ге жуық адамға Алғыс хат, Құрмет грамоталары мен ақшалай сыйлықтар табысталды. Еңбегі еленгендердің қатарында акробатикадан балалар спорт мектебінің аға жат­тықтырушысы Андрей Ямпольский, Қазақ­станның еңбек сіңірген жат­тықтырушысы Виктор Бондаренко, «Қызылжар арландары» клубының палуыны Еркебұлан Қалымбеков, облыстық дене шынықтыру орталығының басшысы Олжас Ахметжанов, допты хоккейден аға жат­тықтырушы Анвар Джемалединов т.б. бар. Жат­тығу залдары мен байрақты бәсекелерде ғана көріп үйренген көп сөйлей бермейтін жандарды мұндай салтанат­ты шараларда жиі көре бермейміз. Алайда бүгін олар тер сіңген спорт­тық формасын сәнді киімге ауыстырып, жылына бір келетін меншікті мерекелеріне қатысып отыр.
– Өзім – Семей өңірінің тумасымын. Біраз жыл бұрын осында қоныс аудардым. 15 жылдан бері күреспен айналысып келемін. «Қызылжар арландары» клубының сапында сайысқа қатысып келе жатқанына 8 жыл болды. Азия клубында қола жүлдеге ие болдым. Қазір Қазақ­стан чемпионатына дайындалып жатырмын. Спорт саласына қатысты барша жандарды мерекемен құт­тықтаймын, – дейді Еркебұлан Қалымбеков.
Спорт күніне орай қаланың орталық алаңында «Fitness Family Fest» фестивалі өт­ті. Шараны облыстық денешынықтыру және спорт басқармасы мен кәсіпкерлер бірлесіп ұйым­дастырды. Алаңға жиналған қала тұрғындары фитнес, спорт, дұрыс тамақтану туралы білікті мамандардың кеңесін тыңдап, асық ату, бес тас, тоғызқұмалақтан сынға түсті. Ал фитнес жат­тықтырушылары мен спортшылар жат­тығу түрлерін көрсет­ті. Жиналғандар йога, зумба, пилатестен шеберлік сабақтарына қатысты, спортшыларға арналған пайдалы азық-түлік өнімдерінен дәм тат­ты. Тұрғындар өзін түрлі спорт түрінде сынап көріп, балалар арасында сайыстар өт­ті. Фестиваль соңында белсенді қатысқан жандарға ақшалай сертификат­тар табысталды.