Бүгін Алматыдағы  Орталық саябақта Наурыз мейрамы ерекше сән-салтанатымен тойланды. Дәстүрлі мерекеге жиналған қала тұрғындары мен қонақтары көктемнің келуін қуанышпен қарсы алды. Саябақта ұйымдастырылған шара барысында ұлттық өнер көрсетіліп, халық әндері шырқалып, күмбірлеген күйлер орындалды. Әсіресе, жасы үлкен өнерпаздардың орындауындағы шығармалар көрермендердің ыстық ықыласына бөленді. Олардың сахнадағы өнері қазақ халқының бай мәдениеті мен ғасырлар бойы жалғасқан салт-дәстүрін тағы бір мәрте паш етті. Бұл шара Алматы қаласының Белсенді ұзақ өмір сүру орталығының  ұйымдастыруымен өтті. Осы орталықтың директоры Сәуле Бекетаева Наурыз мерекесінің қазақ халқы үшін маңызы туралы өз ойымен бөлісті. Ол кісінің айтуынша, осындай ауқымды мерекелердің басты мақсаты – келешек ұрпаққа тәлім-тәрбие мен өнеге беру, ұлттық мәдениеттің сабақтастығын жалғастыру. Бұл орталық 2022 жылдан бері егде жастағы азаматтардың денсаулығын нығайтуға, өмір сапасын жақсартуға және оларға қолайлы орта қалыптастыруға бағытталған. Мұнда тәжірибелі мамандар мен нұсқаушылар медициналық кеңестерден бастап, шығармашылық және спорттық үйірмелерге дейін 40-тан астам әлеуметтік қызмет түрін тегін ұсынады. Олардың қатарында геронтолог дәрігердің кеңестері, есте сақтау қабілетін жақсарту әдістері, йога, айкуне, кинезиология, скандинавиялық жүріс, қолданбалы өнер, бейнелеу өнері және басқа да пайдалы шаралар бар.

Бүгінде орталықта 5 би ансамблі, 4 домбыра ансамблі, 3 хор ұжымы және 2 театр труппасы жұмыс істеп, қала сахналарында өнер көрсетуде. Сонымен қатар, орталық қызмет алушыларының жеке көрмелері, «Шеберлер көрмесі», «Өнегелі әжелер көрмесі», ұлттық бұйымдар көрмелері тұрақты түрде ұйымдастырылып келеді.

Ақжаулықты әжелеріміз ән айтып, би билеп қана қоймай, сән әлемінде де өзіндік қолтаңбасын қалдыруда. 2023 жылы Зина Ищанованың  бастамасы бойынша құрылған «Алматы әжелері» атты жасы үлкен модельдер клубы. Бұл бастама аға буын өкілдерінің шығармашылық әлеуетін көрсетіп, ұлттық мәдениетті дәріптеуге бағытталған. Клубтың ең жасы үлкен қатысушысы – 76 жаста. Қысқа уақыт ішінде «Алматы әжелері» тек Қазақстанда ғана емес, халықаралық деңгейде де танымал болды. Олар Италиядағы халықаралық сән апталығында Қазақстанды таныстырып, Түркия мен Қырғызстанда өткен этнофестивальдерде жеңімпаз атанды. Сонымен қатар, жуырда Біріккен Араб Әмірліктерінде ұлттық киім үлгілерін паш етіп, шетелдік көрерменнің жоғары бағасын алды. Бұл ерекше жоба белгілі режиссер Ольга Сапожникова түсірген «Өзіңе жол. Ұзақ ғұмыр» атты деректі фильмге арқау болды. Сондай-ақ, «Алматы әжелері» қазақы киім үлгілерін насихаттап, ұлттық мәдениетімізді дәріптеу мақсатында Қазақ филармониясында, «Қазақконцерт» залында, Мемлекеттік музейде, Әбілхан Қастеев атындағы өнер музейінде, әл-Фараби атындағы Қазақ ұлттық университетінде және басқа да беделді мәдени ошақтарда өнер көрсетті.

Осыған қоса, би өнеріне ерекше көңіл бөлген орталық 2019 жылы «Айналайын асыл әже» ансамблін құрды. Бұл ансамбль – өнер мен достықтың тоғысқан ерекше ұжымы. Әр саланың мамандарынан құралған әжелер мен аталар зейнетке шыққаннан кейін бос уақыттарын тиімді өткізу үшін би өнерін таңдады. Осы ансамбль олардың жақын достарға айналуына, жаңа орта табуына мүмкіндік берді. Мұнда әртүрлі кәсіп иелері бас қосты: бірі – бухгалтер, бірі – қолөнер шебері, енді бірі – мұғалім.

Ансамбльдің жетекшісі Тоқтарбаева Ғалия Бекешқызы – өнер саласында мол тәжірибесі бар кәсіби биші. Ол «Қазақконцертте» 20 жыл бойы биші болып қызмет етіп, Эстрада-цирк өнері студиясында сабақ берген. Оның жетекшілігімен ансамбль мүшелері ұлттық бидің әсемдігін, қазақ халқының бай мәдениетін сахнада шеберлікпен паш етіп келеді.

Наурыз мейрамы аясында өткен бұл шаралар егде жастағы жандардың қоғамдағы белсенділігін арттырып қана қоймай, олардың өмірге деген құлшынысын оятты. Бұл фестиваль олардың өнері мен өмірлік тәжірибесін жастарға үлгі етіп, қазақ мәдениетінің асыл құндылықтарын дәріптеуге тағы бір қадам жасады.

Мадина ҚУАТ,
Қырмызы БАҒДАТҚЫЗЫ,
Арна БАҚЫТОВА