Белгілі жүргеновтанушы-ғалым, филология ғылымының кандидаты, әл-Фараби атындағы Қазақ ұлттық университетінің доценті Бауыржан Иманғалиевтің «Нарком Темірбек Жүргенов» атты жаңа кітабы баспадан шықты.
Бұл еңбекте Қазақстан мен Орталық Азия республикаларындағы мәдениет пен әдебиет, оқу-ағарту саласының өркендеуіне өлшеусіз үлес қосқан көрнекті мемлекет және қоғам қайраткері, сыншы-публицист Темірбек Қараұлы Жүргеновтің (1898–1938жж.) жазған әдеби-көсемсөз мұрасы жинақталып, қайраткерлік-қаламгерлік қарымы сараланған.
1930 жылдары халық арасында «Темір Нарком» атанған Т. Жүргеновтің құнды ма­қалала­ры мен очерктері, кітаптарынан үзінділер берілген. Еңбек отандық мә­дениет пен әдебиеттің тарихын зерттеу­шілерге, жалпы қалың көпшілікке арнала­ды. «Нарком Темірбек Жүргенов» атты бұл еңбек Қазақстан Республикасы Мәде­ниет және ақпарат министрлігінің тапсырысымен 1000 данамен басылып,  республиканың кітапханаларына таратылды. 
Қазақстан Журналистер одағының мүшесі, зерттеуші-ғалым Бауыржан Сәбит­ұлының  қайраткер-қаламгер Т. Жүргенов туралы жазған бұл – төртінші кітабы. Ол бұған дейін қайраткердің әдеби-публицистикалық мұрасын зерттеп, академик Зейнолла Қабдоловтың жетекшілігімен кандидаттық диссертация қорғағанын да айта кеткен жөн.Т. Жүргенов мұрасын зерт­теп, ғылыми айналымға қосып, Алаштың айбынды ұлын ұлықтап жүрген Бауыржан Иманғалиевке ғылыми іздену жолында толағай табыстар тілейміз!

Алуа Темірболат,
филология ғылымының докторы,
профессор