Көрнекті абайтанушы, сыншы, өнер зерт­теушісі, ұстаз Төкен Ибрагимовтің туғанына 85 жыл толуына орай, Семей қаласында Республикалық ғылыми-тәжірибелік конференция өт­ті.

Филология ғылымының докторы, профессор, М.О.Әуезов атындағы Әдебиет және өнер институтының Семей филиалының директоры Б.Ердембеков кіріспе сөзбен ашқан салиқалы жиында Т.Ибрагимовтің Семей, жалпы, қазақ руханиятына сіңірген үлкен еңбегі туралы филология ғылымының докторы, ҚР еңбек сіңірген қайраткері, Шәкәрім университетінің профессоры А.Еспенбетов, сыншы, ҚР еңбек сіңірген қайраткері, Қазақстан Жазушылар одағы басқармасының хатшысы Ә.Бөпежанова, ақын, ҚР Мемлекет­тік сыйлығының лауреаты Т.Әбдікәкім­овтің ой-толғамдарында; филология ғылымының докторы, профессор, М.О.Әуезов атындағы Әдебиет және өнер институтының бас ғылыми қызметкері Қ.Мәдібаеваның «Т.Ибрагимов шығармашылығы: абайтану», Абайдың «Жидебай-Бөрілі» мемлекет­тік тарихи-мәдени және әдеби-мемориалдық музей-қорығының директоры Ұ.Сағадиевтің «Т.Ибрагимов және Абай музейі», ҚР Жазушылар одағының мүшесі, Мәдениет саласының үздігі, абайтанушы А.Мұхаметқалиқызының «Т.Ибрагимов – әділ әрі талғамды сыншы» тақырыбындағы баяндамаларында; педагогика ғылымының докторы, профессор Т.Жұмажанова, ҚР еңбек сіңірген қайраткері, ардагер журналист, ұстаз С.Әбішқызының, еске алу шараларына қатысқан өзге де замандастары мен шәкірт­терінің сөздерінде саналы ғұмырының отыз төрт жылын Абайға, Абай әлеміне арнаған, Абайдың музей-үйінің «Жидебай-Бөрілі» мемлекет­тік тарихи-мәдени және әдеби-мемориалдық музей-қорығына айналуына, жалпы, Абай айналасының үлкен рухани ұғымға айналуына өлшеусіз үлес қосқан Төкен Ибрагимовтің шығармашылығы мен еңбегі жан-жақты сөз болды.
Абай облысы Мәдениет, тілдерді дамыту және архив басқармасы, М.О.Әуезов атындағы Әдебиет және өнер институтының Семей филиалы және Абайдың «Жидебай-Бөрілі» мемлекет­тік тарихи-мәдени және әдеби-мемориалдық музей-қорығының ұйымдастырумен өткен шаралар легі Абай атындағы театрда «Абай деп соққан жүрегі» ат­ты жылжымалы көрмемен жалғасты.
Абай театрында Төкен Ибрагимовтың шығармашылығы негізінде «Оймен оңаша» әдеби-музыкалық кеш өт­ті. Арнаулы кешке Абай облысы әкімінің орынбасары Ж.Сәрсебаев қатысып, құт­тықтау сөз сөйледі. Ә.Қашаубаев атындағы филармония әншілері мен күйшілері, «Семсер» тобы, С.Малаев,
Г.Ноғайбаева, Қ.Қамидолдин, А.Смасейітова, Қ.Қабышевтер өнер көрсеткен кеште өнерсүйер көрермен «Дариға-ай» жастар театрының «Оймен оңаша» композициялық көрінісін және Абай атындағы Семей облыстық музыкалық драма театрының Т.Ибрагимов пен Т.Базарбаев пьесасы бойынша қойылған «Жас Абай» спектаклінен үзінді тамашалады.
«Тау алыстаған сайын биіктей түседі» дейді халық. Алқалы жиын, басқосуда Т.Ибрагимов есімін есте қалдыру шараларына байланысты ұсыныстар айтылды, ардақты тұлғаның ұрпағы мен туыстары атынан қызы Аймангүл ырзашылығын білдірді. Өмірі мен өнері біртұтас өріліп, бүкіл шығармашылығы, іс-әрекеті үлкен жүректен, Абай айтатын «үлкен махабат­тан» туындаған тұлғаның әдеби-рухани мұрасы, абайтанудағы көптеген таным-идеялары қай салада да зерт­теуге жол нұсқау­шы деуге болады, ал мол рухани мұрасын жан-жақты да ыждағат­ты зерт­теп, рухани айналымға түсіру – маңызды міндет­тердің бірі.