ХАН БАЛАСЫНДАҒЫ ҚАЗАҚТЫҢ ХАҚЫСЫ
Әлихан Нұрмұхамедұлы Бөкейхан – адамзат баласы тарихында сирек кездесетін ерекше тарихи тұлға. «Сирек» дегенде, туған халқына адал да шын мағынадағы кіршіксіз қызмет етуімен теңдесі жоқ тұлға болатын. Бұл жалаң сөз емес.
Әлихан – төрткүл дүниені дүр сілкіндіріп өткен Шыңғысханның 23-інші ұрпағы – төре тұқымынан бола тұра, Қасым хан, Абылай хан, Бөкей хан, Кенесары сынды халқы ақ киізге көтеріп хан тағына отырған емес. Қазақ халқының тарихында Шыңғысханның кейінгі ұрпақтары қарама-қайшы – екіұшты роль атқарды: бір жағынан, алғашқы кезеңде олар көшпелі ру-тайпалардың бірігіп, жаңа және қуатты қазақ мемлекетінің құрылуына ұйытқы болса, екінші жағынан – олардың билік үшін ішкі күрес-тартысы салдарынан «қазақ» деген этнонимді құрағанымен де, бірегей халық, ұлт болып толық пісіп-жетілмеген халықтың Орта, Ұлы, Кіші жүздер ретінде «үштік одаққа» бөлініп бытырауына түрткі болып, ақыр соңында бірінің соңынан бірін орыс империясының отарлығына душар етті. Міне, соңғы жайтты терең зерттеп білген Әлихан «Тірі болсам, хан баласында қазақтың хақысы бар еді, қазаққа қызмет қылмай қоймаймын!»,– деп, ертеден-ақ халқы алдында серт беріп, сол сертіне ақырғы демі біткенше адал болып өтті. Бірақ өзінің шыққан тегін мақтан тұтты, шыққан тегінің абырой-намысын көзінің қарашығындай қорғады және… атақты хан-сұлтандардың тікелей ұрпағы екенін сезініп, халқына кіршіксіз де шексіз қызмет етуді, Алашына қамқор болуды өзінің өтпес-өтелмес борышы, ер-азаматтық парызы санады.
Сұлтан Хан АҚҚҰЛЫ,
ЕҰУ «Алаш» ғылыми-зерттеу
институтының директоры
Әлихан – хан тұқымы бола тұра, көзі тірісінде ешқашан атақ-даңққа құмартып, билікке ұмтылған емес. Бірақ тумысынан оқшау («кіндігі кесік туған; …балуан, аусар, теріс бұтақ, қисық, көнбейтін», – деп жазды туған інісі Смахан төре өз естеліктерінде), еліне қамқор (Смахан төре: «Ел көшкенде түйесі ауған балалы қатындардың түйесін басып береді екен; …шаңырағын көтере алмай жатқан жесір кемпірлердің шаңырағын көтеріп береді екен; …ел көшкенде, ат ұстағанда …нашар жетім-жесірлерге ұстап береді екен»), артына ерген үзеңгілес қандастарын көсем болып жөн көрсете білді.
Өзінің тегіне қарамастан Әлихан халқын бай-кедей, төре, ақсүйек-қара, оқыған, не надан деп жік-жікке бөлмеді, өзге ру-жүзден екен деп жатсынбады, Алаштың ұл-қыздары деп барлығын туған бауырындай сүйді. Смахан төре Бөкейханның естелігіне сенсек, Әлихан «қазақтың аталы аулының ұрлық, зорлықшылдығын жек көретін, бірақ қазақтың кедейін азғырып, байымен партия қылуды ұят көретін. Қазақтың оқыған азаматтарын байшыл, пара алғыш, баймен құда болғышын Әлекең тәуір көрмейтін… Әлекеңнің мінезі – еш қазақпен аразбын демейтін, қастық қылмайтын, жек көретін адамымен амандаспайтын, сөйлеспейтін. Қазақтың еш нәрсесін алмайтын. «Өлгенде 2,5 кез жер керек», – дейтін».
«Алаштың Әлиханы» дейтіндей, патшалық дәуірінде болсын, «буржуазиялық ұлтшыл» ретінде елінен қасақана аластатылған большевиктік үстемдік жылдарында болсын, туып-өскен кең-байтақ даласының қай түкпіріне барса да, Әлиханды халқы «ханымыз», «данышпан көсеміміз», «ұлттық серкеміз» деп зор құрметпен, шын қошеметпен қарсы алды. Мысалға, 1926 жылы КСРО Ғылым академиясының
антропологиялық экспедициясының құрамында сол кездегі Адай оязына келгенінде оны адайлардың қалай қарсы алып күткенін академик Әлкей Марғұлан өз естелігінде былайша суреттейді: «Адайлар Бөкейхановтың халқының алдындағы орны толмас қызметін тани біледі екен. Сондықтан оны аса жоғары дәрежеде құрметтеді. Өздеріңіз білетін шығарсыз, қазақ тек ең құрметті қонағына тай, әлде құлын сойып қарсы алады. Әрине, бұл өмірде өте сирек болатын жағдай. Себебі, жылқы баласының сүйкімділігі соншалық, оны союға ешкімнің көзі қимайды және батылы бармайды. Ал құлынның терісінен жарғақ жасайды. Сондықтан жарғақ киген қазақ ілуде біреу ғана болар. Жарғақ – қазақ киімінің төресі…».
«Қазақ елі, – деп айтып отырады екен Әлиханның өзі, – ақылы кірмеген жас бала сияқты. Баланы құшақтап сүйіп отырсаң, төсіңе сиіп жібереді». Бүкіл ғұмыры «төсіне сиген» сәбидей пәк халқының жарқын болашағы үшін патшалық әрі кеңестік екі дәуірде бірдей нағыз қамқоршы әкесіндей күресумен өтті.
Өзіне дейінгі хан-сұлтандарға қарағанда Әлихан көзі тірісінде-ақ даңқы бүкіл сахара даласына аян болып, халқының зор сүйіспеншілігіне ие болды, қошеметіне бөленді, оны «Алаштың Әлиханы» деп құрметтеп, оның атынан қазақ студенттеріне стипендия тағайындалды. 1917 жылдың 13-інші желтоқсанында Алаш автономиясын жариялап, ұлттық мемлекет шаңырағын қайта көтергенінде оны төрағасы етіп сайлап, Сұлтанмахмұт Торайғырұлы сынды атақты ақындары жырмен сәлем берді:
Ас-Салаумағалейкум, данышпаным,
Қамын жеп мұсылманның алысқаным!
Көп айдың көрмегелі жүзі болды,
Жүрмісің есен-аман, арыстаным!
«Алаштың Әлиханын» шаттана жырлаған жалғыз Көкбай немесе бір Сұлтанмахмұт емес-ті. Хандық дәуірдегідей «Құр жерді өлең қыпты жоқтан қармап» деп Абай сынаған сарай ақындары емес, ХХ ғасыр басындағы қазақтың М.-Ж.Көпейұлы, К.Жанатайұлы, Ж.Аймауытұлы, С.Торайғырұлы, М.Жұмабайұлы, Ғ.Қарашұлы, А.Байтұрсынұлы сынды көрнекті де нағыз халық ақындары мен жазушылары оған асқақ сөзі мен жырын арнады. Жалпы, қазақтың кешегі де бүгінгі тарихында өзіне осыншама ақын-жырау асыл сөзі мен жырын арнаған Әлихандай тарихи тұлға кемде-кем, ашығын айтса – табылмайды. Мысалға, тағы да сол ақын Сұлтанмахмұт бір поэмасында оны Алты Алаштың басына қараңғы түн төнгенінде жарқырап жол көрсеткен айға теңесе, келесі жырында «қалың тұман, қараңғы түн болса да туатын бақ жұлдызы туатынын» білген көреген көсемі ретінде суреттейді.
Мағжан ақын бір эпиграммасында Әлиханды «заманынан ерте туған ел ағасы» деген ойын:
«Ойы жетім, бойы жетім,
Уа, Әли!
Ел ағасы, Қыр баласы,
Уа, пәлі!», –
деп, астарлап білдірсе, азаттық жолындағы қиян-кескі күресінде өзінің жақын үзеңгілесі әрі адал досы Ахмет Байтұрсынұлы бір шумақ өлеңінде оны «қия жазбас сұңқарға», «қажымас тұлпарға», халқын қырға жетелеген «іңкәріне» теңейді:
«Қырағы, қия жазбас сұңқарым-ай,
Қажымас қашық жолға тұлпарым-ай!
Үйілген өлексені өрге сүйреп,
Шығармақ қыр басына іңкәрім-ай!».
Әлиханның атқарып кеткен ең басты тарихи ролі де осы – жүз-жүзге бөлініп бытырап, орыс империясының қол астында құлдықта отырған ХVIII ғасырдың бірінші жартысы мен ХХ ғасырдың басын қамтитын 2 ғасырға жуық дәуірдің нәтижесінде этнос есебінде құрып, билеп-төстеуші халықтың ішіне сіңіп біржола жойылу қатері анық төнген тұста, татардан да, өзгелерден де «іргесін аулақ салған» қазақ халқын классикалық сипаттағы ұлт етіп қалыптастырып, тәрбиелеп, ұлттық мемлекеттігінің шаңырағын қайта көтеруі болатын.
Әлихан – «көшпелі өркениеттің ұлттық салт-дәстүр мен мәдениеттің негізін сақтай отырып, алдына Батыс өркениетінің үлгісі бойынша қазақ қоғамын түбегейлі қайта құрып дамыту, жетілдіру арқылы отарлық бұғауынан азат ету мақсатын қойған реформашыл тобын баулып өсірді әрі оның бүкіл халық мойындаған рухани жетекшісі болды: «Осы ғасырдағы әлем жарығына қазақ көзін ашып, бетін түзесе, – деп атап көрсетті «Қазақ тарихы» айдарымен «Қазақ» газетінде шыққан мақаласында Әлихан, – өзінің қазақшылығын жоғалтпағандай және өзіміздің шарқ әдетіне ыңғайлы қылып «Қазақ мәдениеті» (Казакская культура) құрып, бір жағынан «Қазақ әдебиеті» (Казакская литература) тұрғызып, қазақшылығын сақтамақшы».
Әлихан мен үзеңгілестері қазақтар мезгілдеріне ықшамдалған көшпелі тұрмыс-тіршілігінен берекелі де экономикалық тұрғыдан тиімді шаруашылыққа көшуге тиіс, бірақ оған патша әкімшілігінің «қамшылауымен» немесе «валюнтаристік» тәсілмен емес, бірте-бірте – эволюциялық жолмен көшуі керек деп санады.
ХХ ғасыр басындағы Әлихан бастаған Алаш зиялыларының туған елін дүние жүзіндегі мәдениеті мен экономикасы дамыған, қуатты агро-өнеркәсіптік мемлекетке айналдыруды нақты жоспарлағанын айтып та, жазып та келдім. ХХ ғасырдың 30 жылдарында Әлиханның өзін «жапонтанушы» деп, ал оның үзеңгілестерін «жапон тыңшылары» деп айыптауының өзі де жайдан-жай емес-ті. Әрине, Әлихан «жапонтанушы» емес, «жапон тыңшысы» болмағанын дәлелдеп жатудың тіпті қажеті жоқ. Ал артта қалған феодалдық, аграрлық Күншығыс елінің 1868-89 жылдар аралығында, яғни қайдағы 21 жылдың ішінде әлемнің ең қуатты да жетекші мемлекетіне айналған өте жемісті тәжірибесін Әлихан мен оның жақын үзеңгілестерінің жіті зерттегені анық болатын. Ал турасын айтсақ, Әлиханның «Алаш» атты қазақтың қайта өрлеуі идеясы – сонымен қатар мәдени, саяси, әлеуметтік-экономикалық даму бағдарламасы болып табылатын. Егер жапондардың қайта өрлеу бағдарламасы тарихта «Мэйдзи жаңғыруы», «Мэйдзи төңкерісі» деген атауларымен танылса, ал «Алаш» бағдарламасы – сол «Мэйдзи жаңғыруының» қазақша баламасы болатын.
Әлихан туған елін дамытудың айрықша «қазақ» жолын іздеп әуре болған жоқ. Ол әлемдегі ең үздік, алдыңғы қатарлы елдердің сыннан өткен бай тәжірибесін өз елінде мейлінше қысқа уақытта жүзеге асыруды жоспарлады. Мысалға, Күншығыс елін әлемнің маңдайалды мемлекетіне айналдырған «Мэйдзи жаңғыруын» жүзеге асыруға 21 жыл жетті. Еуропаның алақандай жері болса да дамыған, гүлденген елінің бірі болып табылатын Данияның 1879 жылдан 1900 жылға дейінгі аралықта, яғни тағы да 21 жылда Батыс Еуропаның мәдениеті жоғары, халқы жаппай сауатты, экономикасы гүлденген еліне айналғанын Әлихан 1924 жылы Мәскеуден жолдаған үндеу-мақаласында жазды. «Дания деген Еуропадағы кішкене мемлекеттердің бірі, – деп жазды Қыр баласы Әлихан «Үлгі алыңдар! Данияда кәпертип пен ел шаруасы» атты мақаласында, – Данияның жері 49 мың 83 шаршы километр (километр – шақырымнан аз-ақ кем. Автордың ескертуі). Адамы 2 жарым миллион. Жері біздің қазақтың бір оязының жерінен аз, адамы – орташа екі облыстың еліндей.
Данияда хат білмейтін кісі жоқ. Күнбатыс Еуропада жалпы жұрты хат білетін алдыңғы елдің бірі – Дания болып табылады.
Данияда жалпы жұрттың күнелткені – егін салу мен мал бағу. Мұнан 50 жыл бұрын Дания елі біздің Ресей мұжығындай егінші еді. Астық арзан болған соң Дания жұрты егін салған шаруасын мал бағуға ауыстырды… Жалпы, елдің ең білімі молдығынан, кәператипке сүйеніп істегендігінен байлық Дания еліне күйедей жаққан. 1899-ыншы жылдың басында Данияда 1 мың 273 кәператибі бар екен. 1 кәператипке 500 бұзаулы сиыр келген. Бұ кәператиптердің сарымай, ірімшік істейтін 4-тен 20 мың сомға дейін тұрарлық заттары [құрал-жабдықтары] бар. Кәператип болмаса, мұндай зор іс 2-3 сиырлы шаруа қолынан келе ме? – «Көп түкірсе – көл болады».
Біздің Ресей мұжығынан Дания мұжығы 19 жарым есе бай. Біздің Ресей мұжығы олақ егінші, Дания мұжығы шебер малшы келеді. Гәп егін салғанда, мал баққанда ғана емес: егін сал, мал бақ, кен қаз, бірақ – шебер бол!
Біздің қазаққа қазіргі кезде баласын оқытатын мектеп, жерін гүлдететін су, елге қызмет қылатын Боргенсен мен Миллер сықылды жігіт, май алатын, жүн жуатын, тері илейтін, ет сататын, мал өсіретін, егін салатын кәператип керек».
Қысқасын айтқанда, Әлихан Жапония, Германия, АҚШ, Англия, Дания, тіпті, Аустралия елдерінің ең озық тәжірибесін басшылыққа ала отырып, Алаш-Қазақ елін 20-25 жылда әлемнің төріне жеткізуді жоспарлады.
Алайда, Ұлы қазақ даласына кеңес өкіметі келіп, 1930 жылдары ұлт зиялыларын түгел қырып-жоюмен шектелмей, 7 миллионнан асқан қазақ халқының 70 пайызға жуығын 1932-1933 жылдардағы қолдан ұйымдастырған ашаршылық саясатымен жойып, қазіргі Қазақстанның дамуын 100 жылға – бір ғасырға дерлік кейінге ысырды.
***
Осы күндері мен Әлихан Бөкейхан туралы қазақ және орыс тілдерін 2 томдық монографияны аяқтап жатырмын. Міне осы монографияда Әлиханның өмір кезеңдері дүниеге келген сәтінен Қарқаралы-Омбыдағы бастауыш, орта, арнайы кәсіби және С.-Петербордағы Орман институты мен заң факультеттерін бітірген жастық шағы – 1866-95 жылдар, ұлт-азаттық Алаш қозғалысы бастау алған 1895-1909 жылдардағы «Омбы кезеңі», өзінің тұңғыш саяси айдауындағы болған 1909-17 жылдардағы «Самар кезеңі», Алты Алаштың ғасырлық арманын жүзеге асырған 1917-22 жылдардағы Алаш Орда кезеңі және 1922-37 жылдарды қамтитын «Мәскеу кезеңі», яғни бес кезеңі қарастырылды.
Ресей империясының отарлығына қарсы 1837-47 жылдардағы Кенесары көтерілісінің сәтсіз аяқталуы себептерін терең зерттеген Әлихан, алып отаршыл империяға күшпен тойтарыс берудің, Ресейдің өзін түбегейлі реформаламай, яғни патшалық билік жүйесінен федеративтік демократиялық парламенттік елге айналдырмай, қазақ халқының алдымен Ресей құрамындағы автономиялық құқыққа, көп ұзамай толық тәуелсіздікке қол жеткізу мүмкін еместігіне көз жеткізе алды. Сол себепті, Алаш көсемі Ресейді түбегейлі реформалау үшін орыстың самодержавиеге қарсы зиялыларымен, прогресшіл қоғамымен, оппозициялық күштерімен күш біріктіруге бел буды. Сөйтіп, 1905 жылдың күзінде Әлихан Ресейдің 1917 жылға дейінгі ең ірі және ең ықпалды саяси партиясы – Конституциялық демократиялық партиясының, оны «Халық бостандығы» партиясы деп те атайтын, қатарына өтеді. Семей облысында осы партияның қазақ филиалын құрып, 1906 жылы І Мемлеккеттік думаға кадет партиясының қазақ бөлімі атынан сайланды. 1905-1907 жылдардағы бірінші төңкеріс жеңіліс тапқан соң, Ресейдегі барлық прогресшіл күштер мен саяси партиялардың күшін біріктіріп, самодержавиені құлатуға жұмылдыру мақсатында пайда болған аса құпия масон ұйымына да осы мақсатпен кірді. 1906-17 жылдардың аралығында Әлихан кадет партиясы мен масондар қатарында жүріп, Ресейдегі барлық либералдық-демократиялық партиялардың күшін біріктіруге көп тер төкті. Ал Ресейдің ақырғы императоры ІІ Николайды тақтан тайдырып, самодержавиені құлатқан 1917 жылғы Ақпан төңкерісінің ізінше Әлихан өзінің бір стратегиялық мақсатына жетуіне байланысты кадет партиясы мен масондар қатарынан шығып, қазақтың тұңғыш саяси ұйымы – «Алаш» партиясын құрып, 1917 жылдың 12-18 қарашасында өткен Бүкілресейлік Құрылтай жиналысы сайлауына түсті де, сайлауда барлық саяси қарсыласын, оның ішінде бәлшебектер мен меншебектердің социал-демократиялық және «Үш жүз» партияларын ойсырата жеңді.
Осы жерде біздің тарихшыларымыз не қасақана, не байқамай жүрген бір тарихи оқиғаға назар аудара кетпекпін. Құрылтай жиналысы сайлауында 6 миллионға жеткен қазақ халқы «Алаш» идеясы мен үндеуін жаппай қолдап, өзінің классикалық сипаттағы ұлт болып қалыптасқанын, ұлт болып пісіп жетілгенін байқатты. Бұл тарихымызға алтын әріптермен жазылатын шын мәніндегі тарихи сәт болатын.
***
Еуразия Ұлттық университетінің «Алаш» ғылыми-зерттеу институтының мұрындық болуымен, жаңа жылдың дәл қарсаңында елдегі белгілі алаштанушы ғалымдар, қоғам қайраткерлері, парламент депутаттары бас қосып, ЮНЕСКО тарапынан «шынайы бүкіл әлемдік даңқты қайраткер» танылған Әлихан Бөкейханның 150 жылдық мерейтойын ЮНЕСКО аясында лайықты тойлау мәселесін талқыладық. Қызу талқылай келе, Әлихан атамыздың есімі мен тарихи ісін ұлықтау үшін іске асырылуға тиісті мерейтойлық іс-шаралардың 67 бөлімнен тұратын ұсыныс қабылдадық. Оның ішінде Қазпошта тарапынан Әлиханның 150 жылдығына арналған пошта маркасын, Ұлттық банк тарапынан темір теңге (монета) шығару сияқты дәстүрлі шаралармен қатар, мысалға, мемлекет басқару қызметінде, білім мен ғылым, өнер саласындағы теңдессіз жетістігі үшін берілетін мемлекеттік сыйлықпен қатар, Әлихан Бөкейхан ұлттық сыйлығын тағайындау, қазақ ғылымының сан саласына қосқан зор үлесі мен қалдырған теңдессіз мұрасын ескере отырып, Әлихан Бөкейхан институтын ашу, Астана қаласының сол жағалауындағы резервте тұрған 5 даңғылдың ең үлкен де ұзынына Әлиханның есімін беру, сол жағалаудағы көрнекті жерге Алаш аллеясын ашып, Әлиханға үлкен ескерткіш орнату шаралары бар. Бұл тек Астанада. Ал Алматы қаласында Ұлттық агроуниверситетке, Алматы метросының бір бекетіне емес, өзіне (Алматы қаласының әкіміне белгілі қоғам қайраткерлері атынан жолданған өтініш хатқа қайтарған жауабында әкімшілік өкілдері бір бекет деп қате түсінген сияқты, әлде қате түсінген болды ма, оны білмедім, бірақ бәрібір бас тартыпты), қаладағы Фурманов не Тимирязев сынды орталық даңғылдардың біріне Әлиханның есімін беріп, қалада ескерткіш орнату қарастырылған.
Маңызды ұсыныстардың бірі – азан шақырылып жарияланған 1917 жылдың 12 желтоқсанынан 1920 жылдың қыркүйегіне дейін бүгінгі Қазақстанның іргетасын қалап кеткен Алаш автономиясының Алаш деген атауымен ресми астанасы болған бүгінгі Семей қаласының атауын қайта Алаш етіп өзгертсе – Әлиханның 150 жылдығы мен келесі жылы 100 жыл толатын Алаш автономиясына және даңқты Алаш қайраткерлеріне орнатылған керемет ескерткіш болмақшы. Қарағанды, Павлодар, Ақтау және т.б. қалалардың орталық көшелеріне Әлихан, Ахмет, Міржақыптардың есімдерін беріп, ескерткіш орнату – бұл да 150 жылдыққа арналған іс-шаралардың бағдарламасына жазылды. Оның ішінде Қарағанды қаласындағы Ленин даңғылына, Октябрь ауданына Әлиханның есімін беру, кіндік қаны тамған Ақтоғай ауданындағы Қасым қыстағына, Талдыбейітке мемориалдық кешен тұрғызу да бар.
Ал халықаралық іс-шараларға келсек, Стамбул (не Анкара), Баку, Мәскеу, Омбы, Орынборда және әлбетте, ЮНЕСКО-ның Париждегі бас штаб-пәтерінде халықаралық конференциялар, симпозиумдар және т.б. мәдени, ғылыми шаралар өткізу де ұсынылып отыр.
Түркия демекші, ХХ ғасыр басындағы қазақ ұлттық көсемі, даңқты мемлекет қайраткері, ғұлама ғалым және көсемсөзшісі болған Әлиханның 150 жасқа толуына арналған іс-шаралардың ЮНЕСКО аясында тойлануына туған елі емес-ау, тілдес, діндес, қандас Түркияның бірінші болып қуанып, мерекелік шараны бірінші болып қолға алып жатқаны, бір жағынан, ерекше жаңалық болса, екінші жағынан – биыл Ұлттық тәуелсіздігінің 25 жылдығын тойлайтын Қазақстан үшін ұят болғанын айтпасқа амал жоқ.
Жоғарыда тізіп өткенім – ЮНЕСКО аясында тойланатын іс-шаралардың болар-болмас бір бөлігі ғана екенін баса айтқым келеді. Оның ішінде Еуразия Ұлттық университеті жанындағы «Алаш» ғылыми зерттеу институты құрастырып, баспаға әзірлеп жатқан бірнеше жинақ пен кітапты да ерекше айта кетпекпін. Атап айтқанда, ол Әлихан Бөкейхан шығармаларының 16-18 томдық теңдессіз толық жинағы, Алты Алаш көсемінің өмірі мен сан қырлы қызметі туралы қазақ және орыс тілдеріндегі 2 томдық монографияны, «Әлихан тағылымы» және т.б. тың ғылыми зерттеулер, библиографиялық, ғылыми-анықтамалық жинақтар.
Ал Әлиханның 150 жасқа толатын
5 наурыз – туған күніне қарай бар шығарып үлгергеніміз – Алаш көсемінің өмірі мен сан салалы қызметі және ғылыми-публицистикалық мұрасы туралы өзімнің соңғы жылдары түрлі баспасөз бетіне жариялағаны қазақ, ағылшын және орыс тілдеріндегі зерттеулерім, мақала, сұхбат және дөңгелек үстел материалдарының тұңғыш жинағы болды. Ол жинақ «Ер Жәнібек халықаралық қоғамдық қордың қаржылай демеу көрсетуінің арқасында шығып отыр. Осы мүмкіндікті пайдалана отырып, Қоғамдық қордың басшысы Жеңіс Түркияға алғысымды білдіргім келеді.
САЙЛАУ
Мұжық сайлауы мен қазақ сайлауының арасы жер мен көк арасындай. Закон бір болғанмен екі жұрттың: қазақ пен мұжықтың ғұмыры, жүріс-тұрысы, терінің оң жақ, теріс жағындай екі түрлі. Орыс мұжығының мінезінде маңдайы терлемей, табан ауырмай, қол дүмбімей, мал табылмайды. Мұжық, білуінше, жұмыс қыла білмеген кісі адам емес, сабан-тас ұстай білмеген адам ер есебінде емес. Зәуде жұмыс істей білмеген кісі болса мұны қыздар ер есебіне алып, күйеу деп тимейді. Мұжық білуінше, жұмыстан басқа мал табатын жол жоқ. Болыс, би, ауылнай һәм елу басы болмақ, патшалық салған ауыр бір міндет, жұрт үшін қылатын қызмет. Болыс, би, ауылнай һәм елу басы болған кісінің өз шаруасына патшалық салған қызметтен келер түк пайда жоқ, мұжық ішінде болыс, ауылнай һәм елу басы болған шылғи залал. Мұжық таласпақ түгіл патшалық салған қызметтен қашады. Неше мұжық болысында болыс, ауылнай би амалсыздан кезекпен болды, бұл кезектен де қашса, орнына біреуді жалдап қояды.
Адам баласы өзге хайуаннан айрылғанда ақылды болып, қолы шебер болып айырылады. Байлық түбі – ақыл һәм қол ұсталығы. Осы екеуі қосылмай адам баласы қазынаға жарымайды.
Ақыл да, ұсталық та оқумен, істеумен жүре ұлғаяды. Дүниядағы жер билігі күннен-күнге ақылды, ұста жұрт қолына ауып барады. Еуропада ұлық патша атанған жұрт халықтың ақылды ұсталығына сүйеніп, ұлық патша болып отыр. Біздің қазақ жерін мұжық алғанда мұжық табан ет, маңдай теріне сүйеніп алып отыр. Бұрын қазақ «Аһау, үһеу» деп неше мың жыл босқа өзінен-өзі өсіп-өнетін мал айдап, көшіп жүрген жерден мұжық келе сала қазына суырып алып, байып отыр. Күні-түні қызметке жанын жалдағанның рахатын көріп отыр.
Әлихан БӨКЕЙХАН.
• ЖАҚСЫНЫҢ СӨЗІ
«Әкемнің мысы кез келген адамды басып тұрушы еді. Әкем өзін тұтқындауға сауылдап кіріп келген тергеушілерді көргенде саспастан: «Лиза, шай қой. Қонақтар келді. Бұл мәдениетті кісілер, дәстүр аттамайды», – деді. Олар үндей алмай қалды. Сол паузаны пайдаланып: «Кешіріңіздер, телефон шалуға бола ма?», – деді. Олар рұқсат берді. Көршісі, аса белгілі кеңес ғалымы трубканы алғанда: «Вася! Мен ұзақ командировкаға кетіп барамын. Лизаны саған тапсырдым. Аманат!», – деді де, маған қарап: «Лиза! Сен анда-мұнда жүгірме. Одан ештеңе шықпайды. Бұл «барса-келместің» командировкасы», – деді сабырмен. Тергеушілер мұның бәрін үнсіз тыңдап тұрды, үндеуге бата алмады. Мен соған таңқалдым. Әкемнің салауаты оларды еш оғаш қылық көрсетуге мүмкіндік бермеді».
Лиза БӨКЕЙХАНОВА.