Мен Әз-ағаңмен (Әзілхан Нұр­шайықов) шығармалары арқылы таныс­тым. Ұлы Отан соғысына қатысушы, Қазақстанның халық жазушысы, мем­лекеттік  және  халықаралық сыйлықтар­дың лауреаты, 40-тан астам кітаптардың авторы Әз-ағаңмен 2009 жылдың 27 шілдесінде кездестім. Әдейі іздеп, Аста­на­дан Алматыға барып, Кеңсай қоры­мын­дағы Халима апамыздың «Ақ­күм­без» кесенесінде Әз-ағаңмен бірге дұға оқыдым. 2009 жылдың желтоқсан айында Республикалық «Егемен Қазақ­стан» газетінің 90 жылдық тойына кел­ген  Әз-ағаңды  отбасыммен  таныстыру­дың сәті түсті. Атақты жазушы за­йы­бым­ның мәртебесін өсіріп, әйел затына қатысты та­ғылымды сөздер айтып, балаларым мен немерелеріме шалқыма батасын берді. Әз-ағаңдай дархан да дарынды, адам­гершілігі мол жазушының ыстық мейі­ріміне риза болдық. 2011 жылдың 12 ақпанында асыл ағаның жүрегі соғуын мәңгі тоқтатты. Бүгін қайтыс бол­ғанына 5 жыл толуына орай «Мәң­гілік махаббат» жырындағы «Сағы­ныш саздары» ақ өлеңі есіме оралады:

Ақ күмбез-ау, ақ күмбез!

Алыстан саған қараймын.

Сені өзімнің мәңгілік

Мекеніме санаймын!

Ақ күмбез-ау, ақ күмбез!

Көңілге ой саласың.

Халиманың қасына,

Мені қашан аласың?!

Ақ күмбез-ау, ақ күмбез!

Мен де саған барамын

Содан кейін үн-түнсіз,

Мәңгілікке қаламын!

Кеңсай барсаң – биікте,

Ақ шағала күмбез бар.

Соған қарай бір рет

Көзіңді сал, ұрпақтар!

54 жыл отасқан жан-жарыңыз Халима апамызды 10 жыл жоқтап, есімін «Алаш­­қа» жайдыңыз. Оған да бүгін
5 жыл өтіпті. Топырағыңыз торқа, жа­ныңыз жұмақтың төрінде болғай! Әз-ағаң қазақтың бір асыл перзенті болып, біздің жүрегімізде мәңгі сақталады!

Оразбек АЙМАҚҰЛЫ.