Жуырда Астанада жыр алыбы Жамбыл Жабаевтың туғанына 170 жыл толған  мерейтойына орай Қазақстан Республикасының Жоғарғы Соты «Жыр алыбы – Жамбыл және ел бірлігі» атты   іс-шара өткізді. Мерейтойлық іс-шара алдымен Астана төрінде жыр жампозына арналған ескерткішке гүл шоғын қою рәсімімен басталды. Оған Қ.Мәми, Жоғарғы Соттың судьялары мен Астана қалалық сотының басшысы қатысты.

Одан кейін Жоғарғы Соттың мәжіліс залында жалғасын тапқан іс-шараны Қазақстан Республикасы Жоғарғы Сотының Төрағасы Қайрат Мәми ашып, ақынның елді ауызбірлікке, ынтымаққа шақырған, туған ел мен жерді қастерлеуге, ұлы Отанды сүюге үндеген өміршең жырларына тоқталды. Ақын шығармаларының жас буынды патриоттық  рухта тәрбиелеудегі маңызды ролі айтылды.
Жиын барысында сөз алған Сенат де­­­пу­таты, Қазақстан Жазушылар одағы­ның төрағасы Нұрлан Оразалин, Л.Н.Гу­­милев атындағы ЕҰУ-дің профессоры, филология ғылым­дары­ның докторы Серік Негимов, Жоғарғы Соттың судьясы Әділ Құрықбаев дауылпаз ақын­ның өмірі мен шығармашылығына жан-жақ­ты тоқталып, әділдікті, ынтымақ-бір­лік­­ті арқау еткен өлеңдерін ар­қау етті. Сонымен қатар, ақынның халқы­мыздың рухани қазынасына ай­нал­ған туындылары оқылып, сот әділ­ді­гін жүзеге асыруда қажырлы еңбек етіп жүрген судьялар мен аппарат қыз­мет­­керлеріне тағылым боларлықтай мазмұнды баяндамалар жасалды.
Шара барысында Жоғарғы Сот қыз­мет­кері, ақын Алма Түсіпбекова  жырдан шашу шашты. Сот тө­ре­лігі институтының магистранты Әсел Тас­болатова ақынның «Ленинградтық өрендерім» атты өлеңін оқып, салтанатты шараны тамашалаған қауымның ықы­ласына бөленді. Жезтаңдай әнші, Қазақ­с­танның еңбек сіңірген қайраткері Ардақ Балажанова ақиық ақынның «Угай-ай» әнін тамылжыта шырқады. Ал жас әншілер Айдос Оңғарбай мен Толғанай Кеңес Жамбылдың айтыс өнеріндегі үздігі саналатын Жамбыл  мен Айкүміс айтысынан үзінділерді нақышына келтіріп орындады.