Татарстан Жазушылар одағының төрағасы, жазушы Ркаил Зайнулдин бастаған делегация Қазақ­стан Жазушылар одағында қонақта болды.
Қазақстан Жазушылар одағының Басқарма Төрағасы Мереке Құлкенов­тің іс-сапарда болуына байланысты делегацияны төрағаның бірінші орынбасары, жазушы Нұржан Қуантайұлы қабылдап, қонақтарға Қазақ­стан Жазушылар одағының қазіргі атқарып жатқан жұмысы туралы, келешектегі жоспарлары жайында әңгімелеп берді, екі елдегі әдеби байланысты күшейту жолдарымен тәжірибе алысты.
Кез­десу барысында талқыланған негізгі мәселе екі елдің әдебиет саласындағы ынтымақтастығын күшейту болды. Жиынға «Қазақ әдебиеті» газеті бас редакторының бірінші орын­басары Мырзан Кенжебай, «Жұлдыз» журналының бас редакторы Тұрысбек Сәукетай, жазушылар Нұрдәулет Ақыш, Нағашыбек Қапалбекұлы және басқа қаламгерлер қатысты. Бұдан кейін меймандар «Қазақ әдебиеті» газеті мен «Жұлдыз» журналы редакцияларымен танысты.