САНДЫҚ ҒАЛАМ 4.0: кітапхана қауымдастығына арналған жаңа тенденциялар мен міндет­тер
18.03.2023
2230
0

Кітапхананы ақпарат­тандыру саласындағы бүгінгі күннің елеулі жетістіктері – кітап­хана мамандарын даярлау­дың әлеумет­тік тәртібін түбегейлі өзгертіп, жаңа ақпарат­тық технологияларды енгізу бағытында іс-шараларды белсенді түрде дамыту. Кітапхана ісін көркейтуде, кітапхана жұмысында жаңа технологиялардың енуіне орай білікті де, білімді мамандарды даярлауда «Кітапханалық ақпарат­тық жүйелер» бағыты бойынша бакалавр, магистратура, әсіресе докторантура деңгейі бойынша мамандарды даярлаудағы Қазақ­стан бойынша Жоғары оқу орындары ішіндегі жалғыз оқу орны ол – әл-Фараби атындағы Қазақ Ұлт­тық университеті.
Осыған орай, 2023 жылдың 23-24 ақпанында әл-Фараби атындағы Қазақ Ұлт­тық университетінің Тарих факультетінің Дүниежүзі тарихы, тарихнама және деректану кафедрасының ұйымдастыруымен «Кітапханалық ақпарат­тық жүйелер» мамандығында «Сандық ғалам 4,0: кітапхана қауымдастығына арналған жаңа тенденциялар мен міндет­тер» ат­ты Бірінші қысқы мектеп жұмысы онлайн формат­та өткізілді.
ТМД мен шетел ғалымдарының баяндамалары, тәжірибелері, талқылауларымен өткізілген қысқы мектеп жұмысына АҚШ-тың Индиана университетінің профессоры, библиограф Акрам Хабибулла, Түркияның Ислам ынтымақтастығы ұйымы (OIC) Ислам тарихы, мәдениет және зерт­теу орталығының (IRCICA) кітапхана және мұрағат бөлімінің меңгерушісі, доктор Дидар Байыр, Иордания Ұлт­тық кітапханасының Бас директоры, педагогика ғылымдарының докторы Нидал Ибрахим Мухаммад әл-Ахмад, Иордания Ұлт­тық кітапханасының ақпарат­тандыру және архивтану магистрі Тамадор Мукахал, Өзбекстанның Мұхаммед әл-Хорезми атындағы Ташкент ақпарат­тық технологиялар университетінің «Кітапханалық ақпарат­тық жүйелер» кафедрасының меңгерушісі, профессор Б.И.Ганиева, Қ.Қарасаев атындағы Бішкек мемлекет­тік университетінің аға оқытушысы М.Н.Теишова, Қазан Мемлекет­тік Мәдениет институтының кітапханалық-ақпарат­тық қызмет және зияткерлік жүйелер кафедрасының доценті Н.Г.Яшина, РФ-ның Саратов қаласының IPR MEDIA басым бағыт­тарын дамыту жөніндегі бас директордың орынбасары В.В.Кутуева, кітапхана ісі саласының зерт­теушілері: доцент, педагогика ғылымдарының кандидаты М.К.Кукеева, педагогика ғылымдарының кандидаты К.Т. Туенбаева, тарих ғылымдарының кандидаты Б.С. Асанова, сонымен бірге «Алматы қаласы Орталықтандырылған кітапхана жүйесі» КММ, «А.С.Пушкин атындағы Шығыс Қазақ­стан облыстық кітапханасы» КММ, әл-Фараби атындағы Қазақ Ұлт­тық университеті кітапханасы, Тәт­тімбет атындағы Қарағанды өнер колледжі мамандарының баяндамалары тыңдалып, тәжірибелерімен бөлісіп, кітапхана саласының өзекті мәселелері талқыланды.
Айта кету керек, қазіргі уақыт­та ақпарат­тық кеңістіктің кеңеюінде кітапхананың рөлі артып келе жатқанын бәрі мойындайды, бірақ кітапхана ісін дамытуға әлі де жеткіліксіз көңіл бөлінуі көпшілікті қынжылтады. Дегенмен де өткізілген Бірінші қысқы мектеп жұмысына жүзден аса қатысушының қатысуы, бұл мамандықтың болашақта өркендеп, дамуының жарқын көрінісі.
Ел Президенті Қ.К.Тоқаев: «Бүгінгі заманда кітапсыз, сондай-ақ кітапханасыз адамның ойдағыдай дамуы мүмкін емес. Электронды формат­тың қарқынды дамып жатқанына қарамастан, дәстүрлі кітапхананың ағартушылық рөлі ешқашан мәнін жоғалтпайды», – деген еді.
Бұл кітап пен кітапханаға деген зор құрмет­тің жарқын көрінісі.

Б.АСАНОВА,
т.ғ.к., аға оқытушы
КЕ АҚ әл-Фараби атындағы ҚазҰУ, дүниежүзі тарихы,

тарихнама және деректану кафедрасы

ПІКІР ҚОСУ

Ваш адрес email не будет опубликован.

Пікір