Айнұр ТӨЛЕУ, ақын: БАҚСЫ БОП КӨРГІМ КЕЛЕДІ…
05.04.2020
1185
0

 –  Адамның басты қасиеті не деп ойлайсыз?

– Адамның басты қасиеті – ар.  Өз арыңның алдында адал болсаң, еңсең түспейді. Кібіртіктемейсің, көлгірсімейсің. Тік қарайсың.

  – Ер-азаматтың басты қасиеті ше? 

–  Егер еркек болсам, жауап берер едім.  Әдетте әйелдер ер азаматтарға талап қойғыш келеді. Талап пен қасиетті ажыратып алу керек.

– Бақыт деген ұғымды қалай түсінесіз? 

– Өзіңіз сұрап отырғандай ол – ұғым ғана ғой. Бәріміз осы ұғымды жасау үшін бір жаққа қарай асығып бара жатырмыз. Бәлкім асыға алатынымыздың өзі бақыт шығар.

 –  Сүйікті әдеби кейіпкеріңіз кім? 

–  «Нақұрыстағы»  Настасья Филипповнаны жақсы көрем (Ф.М Достоевский)  «Әкелер мен балалар» романындағы (И.С.Тургенев)  Евгений Базаров ұнайды. Екеуі де мінезді кейіпкерлер.

–  Ең басты кемшілігіңіз қандай?  

– Эмоцияға тез берілемін. Тез ашуланам.

–  Бос уақытыңызда немен айналысасыз?

– Осы сұраққа өмір бойы жауап бере алмай келем. Менде бос уақыт жоқ.

 – Өмірге екінші рет келсеңіз, кім болуды қалар едіңіз?

– Екінші рет келгім жоқ. Бір сәттік сезім – тәтті. Екінші рет қайталанбайтын оқиғалар –  мағыналы. Өмір де қайталанбаса – құнды.

 – Қандай елде өмір сүргіңіз келеді?

– Америкада

– Қандай ерекше қабілетке ие болғыңыз келеді?

– Бақсы боп көргім келеді.

– Қандай сәттерде осалдық танытасыз? 

– Шаршаған кезде.         

– «Ғайыпқа сену» дегенді қалай түсінесіз?

– Сенбесем бір күн де өмір сүрмес едім.

– Егер өнертапқыш болсаңыз, не нәрсені ойлап табар едіңіз?

– Өзіммен тең дәрежеде сөйлесе алатын, мұңдаса да алатын, ақыл қосатын робот ойлап табар едім.

– Не нәрседен жиіркенесіз? 

– Мен жүрген жерде жиіркенішті заттар да, адамдар да жоқ екен. Сондықтан есіме түсіре алмай отырмын.

– Сіз үшін ең ұнамсыз тарихи тұлға кім?

– И.В.Сталин

 – Жиі айтатын қанатты сөзіңіз?

– «Не ексең, соны орасың».

– Көзіңізге жиі жас аласыз ба?

– Бұрын жылаңқы болғам.

 – Үнемі есіңізде жүретін Абайдың  бір сөзі? 

– «Ұқпайсың өз сөзіңнен басқа сөзді, аузымен орақ орған өңкей қыртың»

– Қазіргі адамдардың бойынан қандай қасиеттер жоғалып барады?

– Бұрын өмір сүрген жоқпын ғой. Сондықтан жауап беру қиын. Кітапқа сенер болсақ, жауыздық баяғыдан бар. Өтірікшілер мен аярлар да бұрыннан келе жатыр.

 – Біздің заманымыздың мықты ақыны кім?

– Ақындардың өлеңін алдыма жайып жіберіп, талдау жасап шықсам, айтар едім. Ондай анализ жасағаным жоқ. Маған ұнаған ақын мықты дегенді білдірмейді ғой.

 – Мықты жазушысы ше?

– Бұл сұрақтан да жалтаратын болдым.

– Жас қаламгерлердің бойынан қандай артықшылықтар мен кемшіліктерді көріп жүрсіз?

–  Жастар соны сүрлеу салса екен деп ойлаушы ем. Бірақ олар да сол баяғы салынған жолмен, өзіне белгіленген образды сомдап өтіп бара жатқан сияқты. Белгіленіп қойған образды сомдау оп- оңай ғой.  Оңайды таңдадың деп ешкімді жазғыра да алмайсың.

ПІКІР ҚОСУ

Ваш e-mail не будет опубликован.

Пікір