Адам тағдырымен ойнамайтын елде өмір сүргім келеді
«Пруст сауалнамасы» vs «Қазақ әдебиеті»
Сауалнама қонағы: ақын Есей Жеңісұлы
– Адамның басты қасиеті не деп ойлайсыз?
– Адамшылығы.
– Ер азаматтың басты қасиеті ше?
– Ұрпақ алдындағы жауапкершілігін сезінуі.
– Бақыт деген ұғымды қалай түсінесіз?
– Өмірге келу, көру, сезіну, түйсіну, ойлана білу – нағыз бақыт.
– Сүйікті әдеби кейіпкеріңіз кім?
– Гюгоның Жильяты («Теңіз бейнетқорлары») мен Оралханның Нұржаны («Қар қызы»).
– Ең басты кемшілігіңіз не?
– Жалқаулық, жаутаңдағыштық, қызбалық.
– Бос уақытыңызда немен айналысасыз?
– Спорт статистикасымен.
– Өмірге екінші рет келсеңіз, кім болуды қалар едіңіз?
– Аллаға қарсы тұра алмаймын, өмірге екінші рет келмеймін. Келгім де келмейді.
– Қандай елде өмір сүргіңіз келеді?
– Адам тағдырымен ойнамайтын елде өмір сүргім келеді.
– Қандай ерекше қабілетке ие болғыңыз келеді?
– Ара-тұра ұшқым келеді.
– Қандай сәттерде осалдық танытасыз?
– Өзіме пайдалы, өзгеге ауыр сәттерде.
– «Ғайыпқа сену» дегенді қалай түсінесіз?
– Жолдардың бәрі де тұйықталады, өмір де бір күні аяқталады.
– Егер өнертапқыш болсаңыз, не нәрсені ойлап табар едіңіз?
– Әртүрлі апаттық жағдайларда адамдарды сақтап қалатын бір материал ойлап тапқым келеді.
– Не нәрседен жиіркенесіз?
– Кей ер адамдардың бойындағы «әйелдік» мінезден.
– Сіз үшін ең ұнамсыз тарихи тұлға кім?
– Халқының тағдырымен ойнап, соны өзінің ең жақсы қыры етіп көрсететін тирандар.
– Жиі айтатын қанатты сөзіңіз?
– «Бәрі де өтеді».
– Көзіңізге жиі жас аласыз ба?
– Жасықпын.
– Үнемі есіңізде жүретін Абайдың бір сөзі…
– «Жарқ етпес қара көңілім не қылса да…» деген өлеңіне тәнтімін, үнемі қайталап айтып жүремін.
– Қазіргі адамдардың бойынан қандай қасиеттер жоғалып барады?
– Ар-Ұят, қысылу, кішіру.
– Біздің заманымыздың мықты ақыны кім? Мықты жазушысы ше?
– Ақындардың тұтас шығармашылығын емес, жекелеген өлеңдерін жақсы көріп оқимын. Кей өлеңдерін қызғанып қаламын. Ал мықты жазушы Маркус Зусак па деп қалдым.
– Жас қаламгерлердің бойынан қандай артықшылықтар мен кемшіліктерді көріп жүрсіз?
– Ештеңе өзгерген жоқ: білім – аз, амбиция – ұрып тұр, ниет – жақсы.