«Қазақ әдебиеті» vs Пруст сауалы

Ақын Сағыныш Намазшамованың пікірлері

– Адамның басты қасиеті не деп ойлайсыз?

– Үздіксіз ізденіс пен өзін-өзі жетілдіру.

– Ер азаматтың басты қасиеті ше?

 – Елжандылық.

 

– Бақыт деген ұғымды қалай түсінесіз?

– Жүректің тыныштығы.

– Сүйікті әдеби кейіпкеріңіз кім?

 – Ақан Нұрмановтың «Құланның ажалы» шығарма­сындағы Құлан батыр.

– Ең басты кемшілігіңіз не?

– «Темірді қызған кезде соқпай», көп ойланатыным.

– Бос уақытыңызда немен айналысасыз?

– Балаларыммен ойын ойнаймын.

– Өмірге екінші рет келсеңіз, кім болуды қалар едіңіз?

– Өмірімді нақты ғылым жолына арнар едім.

– Қандай елде өмір сүргіңіз келеді?

– Азаматтық позициясы мен азаматтық парызын қатар ұстанатын елде.

– Қандай ерекше қабілетке ие болғыңыз келеді?

– Ұша алу.

– Қандай сәттерде осалдық танытасыз?

– Қатал шешім шығаруға тиіс кезде.

– «Ғайыпқа сену» дегенді қалай түсінесіз?

 – Көзің көрмесе де, көңі­лің, түпсанаң сенетін нәр­­селер болады. Өз басым ғайып­қа сенемін.

– Егер өнертапқыш болсаңыз, не нәрсені ойлап табар едіңіз?

– Адам ағзасындағы өзге­рістерді, қай органда қандай бұзылу процестері басталғанын дәлдікпен көрсетіп тұратын және оны түзеудің механизмін айтып беретін білезік сияқты құрылғы болса деп армандаймын. Сонда емханаларға бүгінгідей сабылмайтын едік.

– Не нәрседен жиіркенесіз?

– Іші қуыс, сырты паң болудан.

– Сіз үшін ең ұнамсыз тарихи тұлға кім?

– Гитлер.

– Жиі айтатын қанатты сөзіңіз?

– Жақсылыққа жақсылық – әр адамның ісі,

Жамандыққа жақсылық  – ер адамның ісі.

– Көзіңізге жиі жас аласыз ба?

– Жан тербетер әнге, кино­ға, бәріне реакциям сондай…

– Үнемі есіңізде жүретін Абайдың бір сөзі…

– «Сенбе жұртқа тұрса да қанша мақтап,

Әуре етеді ішіне қулық сақтап.

 Өзіңе сен, өзіңді алып шығар

Ақылың мен қайратың екі жақтап».

– Қазіргі адамдардың бойынан қандай қасиеттер жоғалып барады?

 – Мейірім мен сенім.

– Біздің заманымыздың мықты ақыны кім? Мықты жазушысы ше?

 – Тыныштықбек Әбдікә­кімұлы, Асқар Алтай.

– Жас қаламгерлердің бойынан қандай артықшылықтар мен кемшіліктерді көріп жүрсіз?

 – Олардың еркіндігі ұнайды, бірақ өзімшілдігі өзінің бағасын білуге ұласса екен деймін.