Ж.Хамай: Қайта тусам, ғалым-монах болар едім
27.09.2019
209
0

Пруст сауалы vs «Қазақ әдебиеті»

Жүкел Хамай, ақын:

– Адамның басты қасиеті не деп ойлайсыз?

–Пайғамбардың «Жұма­ғы», Адам-Ата – Хауа-Ана, Абайдың «боқ» деген теңеуі, Тыныштықбектің «Ес», «Жұпарына» дейін, біз оқыған Маркстың «Адам-капиталына» дейін бәрі де «Ар» ұғымына тіреледі. Қасиет – Ар. Қасиет – адамның жеке-дара бітімімен жаратылатын дүние. Біреуге «сен қасиеттісің» не «сен қасиетсізсің» деп айтқанның өзі – соны айтқан адамның «қасиетін» танытады.

Ер азаматтың басты қасиеті ше?

– Шаңырақ көтеру, дұрыс жар таңдау, баланы дұрыс тәрбиелеу.

Бақыт деген ұғымды қалай түсінесіз?

– Бақыт адамның өз бойында.

Сүйікті әдеби кейіпкеріңіз кім?

– Абай шығармасындағы –Түңлікбайдың қатыны Шәріп пен Қабдештегі –Көнекбайдың кемпірі.

Ең басты кемшілігіңіз не?

– Әсіре еркіндігім.

Бос уақытыңызда немен айналысасыз?

– Менде бос уақыт деген түсінік болмайды. Оны ұқпағам да.

Өмірге екінші рет келсеңіз, кім болуды қалар едіңіз?

– Мен – буддизмді жақсы игерген, Будда мен Абайды салыстырған адаммын. Қайта туғанда ғалым-монах болар едім.

Қандай елде өмір сүргіңіз келеді?

– Алтайда ғана.

Қандай ерекше қабілетке ие болғыңыз келеді?

– Онсыз да маған Тәңірі түгел түйсікті берген. Ақыт қажы ағам да осындай бол­ған. Тамырыңды ұстат, не бола­рын, не болғанын тамы­рыңнан айтып берейін.

Қандай сәттерде осалдық танытасыз?

– Топтың дүрмегінде.

«Ғайыпқа сену» дегенді қалай түсінесіз?

– Ақыл-ойда ғайып болмайды, ғайып – тәнде. Мен ақылмен достасып кеткенмін.

Не нәрседен жиіркенесіз?

– Өтіріктен, қарнын жал­ған үрлеуден.

Сіз үшін ең ұнамсыз тарихи тұлға кім?

– Мен Жаратушы емеспін.

Жиі айтатын қанатты сөзіңіз?

– Иттің құйрығын ит көтереді.

Көзіңізге жиі жас аласыз ба?

– Иә, жас ұлғайған сайын көз суы кірпікке жақын тұрады екен. Жуықта Дулат­тың (Исабеков) Аягүлді (Ман­тай)маңда­йынан сүйіп тұрға­нын көріп, көз жасымды бір төгіп алдым.

Үнемі есіңізде жүретін Абайдың бір сөзі

– «Әсемпаз болма әрнеге…».

Қазіргі адамдардың бойынан қандай қасиеттер жоғалып барады?

– Адам болу.

Біздің заманымыздың мықты ақыны кім? Мықты жазушысы ше?

– Сұрақ екіұшты екен. Қазіргі күнгі десең, Тыныш­тықбек. Ол – менің күндесім!

Жас қаламгерлердің бойынан қандай артықшы­лықтар мен кемшіліктерді көріп жүрсіз?

– Бірін-бірі көтеретіндері – тәтті, сонан бөлінетіндері – ащы! Ол – жастардың қателігі емес, бізде шынайы әдеби орта жоқ.

 

ПІКІР ҚОСУ

Ваш e-mail не будет опубликован.

Пікір