Х.Х.пАДРОН ҚАЗАҚ АҚЫНДАРЫ ХАҚЫНДА
(Басы өткен сандарда)
Ақберен Елгезек (1980). Оның бұл кітапқа «Тамшы мен тас» атты өлеңі енді. Өлеңде түннің қараңғылығына әдеттен тыс таң қалу бар. Бұл – жалғыздық сезімі. Көз жасы қорқыныштан тыйылып, кенет бір қара нүктесі үлкейіп, ештеңе көрінбей кеткен секілді. Осы қараңғылық түннің шынайы бояуы. Арғы жағында бір елесті сағыну бар.
Әнуарбек Бимағамбет (1980). Оның «Түнмен қоштасу» өлеңінде уақыт өмірге ультиматум қоятын көрінеді. Себебі оны жалған махаббаттың баянсыз тағдыры басқарады. Түн қараңғылығы түйсіну болмысымен астасады. Оны қамаудағы әрі мәнсіз дүниеге оратылып қалғандай сезім билейді, өйткені сүйікті әйелімен қоштаса алмады. Бұл өлең мені тебірентті. Мен оның шығармашылығымен аса таныс емес едім. Дегенмен, осы өлең арқылы Ә.Бимағамбеттің жұмбақ әлемінің тартымдылығын сезінемін, оны мойындамау мүмкін емес. Ойлау жүйесі таңғаларлық және поэтикалық тұтас дүниеге айналған. Өйткені, поэзияның ең жоғары және күрделі қасиеті, меніңше, айта алмайтынды айту. Мен оның келесі кітабын тағатсыздана күтемін.
Бақытгүл Бабаш (1981). Бақытгүл Бабаштың өлеңінің композициясы жақсы әрі ширақ, шегелеп айтатын тұстары да бар, әртүрлі эмоциялық деңгейлерді үйлестіреді. Ол махаббат сезімінде түстердің әр алуандығынан нақты және ашық бояуларды даралайды. «Есте жоқ: қашан, қай күні» атты өлеңінде жерасты суы ағып жатыр, сан алуан нысанда кездесетін ең басты сезім – қорқыныш. Қорқыныш болғанда да махаббатты жоғалтып алатын сөздерден қорқу. Ақырында тек жеңілісті констатациясы, шешімі жоқ арпалыс пен қайшалыққа ұласқан мұңды жалғыздық бар.
Жанар Әбсадық (1981). Осы антологияға арнайы жолдаған, «Көлеңкеміз екеуміз» өлеңінде ақын көлеңкелер ойынын махаббат ойынымен салыстырады. Онда кейіпкерлер еш ережелерсіз көңіл көтереді. Денелер мұқтаждықтан бір-біріне тартылады. Табиғаттарындағы қарама-қайшылыққа қарамастан ажырамастай біріккен. Екеуі бірін-бірі үнсіз-ақ шақырады, әр түн олардың көшірмесін жасап, парықсыз естен шығаратын айнаға айналады. Мұнда бейшара адамдар тағдыры сияқты мұңды сарын бар. Өмірді сұрқайы көзқараста түйсінуді қарапайым тілмен жеткізген…
…
(Толық нұсқасын газеттің №5 (3639) санынан оқи аласыздар)