ЖАНР ТАБИҒАТЫНДАҒЫ ЖЫЛЫ ИІРІМДЕР
Жазушы Қ.Жиенбайдың «Жер үстінде де жұмақ бар» атты прозалық жинағына енген әңгімелері туралы толғаныс.
«Тоқсанбайсыз той өтпейді» әңгімесінде экологияның ауыр нүктесінде өмір сүріп жатса да ыңқ деп ауырмаған, шипажайға бармаған, ауылдан ұзап шықпаған Қалдыбек қарияның 90-ның сеңгіріне шығуы – бұл өңір үшін «сенсация». Еңбектің түрін таңдамай, қай салаға қол күші қажет болса соның «отымен кіріп, күлімен шығудан» рақат тауып, жұрт алғысына бөленген қарияның болаттай берік болмысына тәнті жұрт оның Қалдыбек есімін әлдеқашан Тоқсанбайға алмастырып алған. Ол тұратын аудан әкімі сырттан келген қонақтар әулие қартқа сәлем беріп, дастарханынан дәм татып, батасын алып аттануды жақсы ырымға балайды. Өйткені, ол кісі өмір сүріп жатқан жағалаулықтардың жас мөлшері – 60-65-тің о жақ, бұ жағы. Сондықтан бұл өңірдің тұрғындары көп жасаған әулие қарттың ғибратқа толы әңгімесін тыңдап, ұрпағына оның ізгі қасиеттері қонуын армандап, бесік тойынан бастап, асқа дейін қалдырмай шақыруды заңдастырып, қандарына сіңіріп алған. Қысқасы, аймаққа қатысты шаралар, той-томалақ Тоқсанбайсыз өтпейді.
«Көру аз, көре білу керек», – деп жазады Бауыржан Момышұлы. Қуаныш Жиенбай кейіпкерінің жан-дүниесін көре білуге қабілет-қарымы молынан жететін мығым қаламгер.
«Жеміс ағаштары піскен жоқ» әңгімесінде осы тақырыпты екінші қырынан қарастырып, қазіргі білім, ғылымы дамыған өркениетті, технология ғасырында өмір сүріп жатқан қоғамдағы жастардың кәрі әке-шешеге перзенттік парызын қалай өтеуі жайлы оқиғаға ортақтастырады. Қуаныш Жиенбайдың қай шығармасын оқысаңыз да оқиғалары өзі туған Қызылорда облысы көлемінде өтіп жатады. Көбіне Арал теңізінің жағасы, Қызылқұм, Байқоңыр, Төретам, Көнебөген атырабы, Сұлутам… Әңгіменің қаһармандары шал мен кемпір де ысылдаған құмды өңірде тұрады. Түйе көп, ішетіндері шұбат, ем. Шал жас кезінде палуан болған, қазір даңғарадай үйде кемпірі екеуі тұрып жатыр. Балаларын оқытты, үйлі-баранды. Үлкен қызметтердің тізгінін ұстаған. Кенжесі шетелде. Үлкен ұлы мен қызы облыс орталығында. Ұлдары әйелдерінің қас-қабағына қараған «ыңжық біреулер». Шалдың төсек тартып жатқанына біраз уақыт өтті, жағдайы тым ауыр. Кемпірі отты да дұрыс жаға алмайды, көршінің балалары тұтатып береді.
Қуаныштың бұл әңгімесі ата-ана мен бала арасындағы менталитетіміз қазір уақыт, заман, жаһандану ұстанымына орай біртін-біртін күш-қуаты әлсіреп, құнсыздана бастаған сұмдық көріністерді көре, сезіне жүріп, жексұрын әрекеттен шапшаң арылуға шақырады.
Стиль – өмір шындығын танып білу, сезіну қабілетін, бейнелеу шеберлігін, өзіндік суреткерлік тұлға бітімін танытатын даралық өзгешелігі, жазу мәнері, қолтаңбасы. Сол қолтаңбаны біз оның «Жұмыртқаның сары уызы», «Қиян шеттегі 45 күн» әңгімелерінен сезінеміз. Қазақ болмысы – мәрттігінде. «Жұмыртқаның сары уызында» Зибагүл есімді әсем, пысық қыз, пединституттың үшінші курсында оқып жүргенде, күзгі еңбек семестрі уақытында салқындау үшін биіктігі үш метрлік көпірден айдынға секіргенде өзен арнасында жатқан КамАЗ-дың шіріген доңғалағына басы тиіп, мойын омыртқасы сынып, жұлыны зақымданады. Ауыр операциялардан кейін мүгедектер арбасына таңылған. Өзі сұлу, оқу озаты, қажыр-қайраты мығым. Қайсар бойжеткен тағдыры тосқан тосын азапқа көндіге алмай, өзіне қол жұмсауға талай рет оқталып, анасын аяғандықтан және БҰҰ-ның мүгедектердің өр мінезді іс-әрекеттері, хоббиі, күрескерлік бітімі, өмірге ғашықтығы жайлы сюжетке негізделген суреттерге жарияланған фотоконкурсқа қатысу үшін Жұмамұрат есімді жігіт Зибагүлдің кандидатурасын таңдап, оның төңірегінен табылуы – мінез-құлқын кілт өзгертеді.
Бұл әңгімеде Қуаныш фотограф жігіт Жұмамұраттың мәрттігіне назар аудартады. «Жамандар өзін-өзі зорға балар, бір өзінен басқаны төмен санар» (Шал ақын). Жұмамұрат мүгедек қызды төмен санамай, қарапайым көзбен емес, көкірек көзімен көреді. Шағын туындыда нала да, қуаныш та, сағыныш та, бақыт та, қазақы мінез-құлық та бар.
Қайталап оқуға мәжбүрлейтін, құнды да әсерлі, оқиғалары қызықты, мазмұнды да ғибратты, сырлы да сыпайы, мәнді әңгімелерінің қатарына «Банкетке дейін, банкеттен кейін», «Екінші бала өзінікі» туындыларын қосуға болады.
Сенека: «…егер оқи қалсаң, оқыған нәрсеңнің негізгі ойын көңілге тоқи білуге» ақыл қосыпты. Қуаныш Жиенбай әңгіме атауына «Банкетке дейін, банкеттен кейін» деп философиялық жұмбақ жасырған. «Банкетке дейіні» қызды сүйген, қызғанышпен одан тірідей айырылмайтынын сездіріп, үйленуге мәжбүрлеген жігітке де ол кіділік, мінезсіздік жасамай, құрметіне құрмет, төңірегіне жылуын төгіп, ештеңеге өкінбейді де, ешкімге өкпелемейді. Бұл – өмір.
«Банкеттен кейін» «диуаналықтың» сынағы бітіп, бірі үшін бірі өмірін қиятын, шынайы ғашықтардың бір күні жүз күнге татырлық өмірлері басталмақ…
Қуаныштың «Екінші бала өзінікі» әңгімесін оқып, тағы да қарапайым студент Қарасайдың рухани кемелділігіне, ерлігіне, дархан, сабырлы, сарабдалдығына бүйрегіміз бүлк етті. Жазушының мұнда да ұтқан тұсы, ұтырын тауып кеткен ұстанымы қуантады. Білімді, дарынды, келеңсіздіктерді қаламы қиып түсетін азулылығы, өз позициясынан айнымайтын беріктігі осы туындысында өркешті көрінген.
«Стиль – ол адам» (Бюффон). Суреткердің басты мұраты – қоғамның тұтқасы адамның қайталанбас бейнесін көркемдік қалыбынан шығару. Оның жұтынып тұрғаны да, жұлқынып тұрғаны да оқырманды ойландырып, сабақ аларлық сыбағасы салымды болғаны жөн. Қ.Жиенбай – ізденгіш қаламгер. Әңгімелерінің денінде қыздар мен әйелдер образын жасауға күш жұмсаған.
Қуаныштың «Кейуананың көз жасы» әңгімесінде айдай сұлу Ұлбосын бойжеткен шағында анау-мынауды менсінбей, білім қуып, кейіннен қызмет желігімен уақытын өткізіп алып, жасы орта тұстан асқанда өткен өміріне өкінішпен қарайтыны оқушыны еріксіз ойға қалдырады. Ұлбосынның басынан өткен оқиғалары тағдырына енжар қарайтын өркөкірек, өзін өзгелерден зор санайтын, достық пейілді жүре тыңдайтын жастарға аса пайдалы сабақ. Адам өмірге бір-ақ рет келеді, қонақ. Сондықтан өмірді ойсыз өткізіп алып, тіліңді тістемес үшін, табиғат заңын қатал ескеріп, әр нәрсені уақытында бұлжытпай жүзеге асырып отырсаң, бәріне үлгересің, өкінбейсің. Кешіксең, Ұлбосын тәрізді нәзік жынысқа жат өрескел қылықтарға бас тігесін, кергісең, бақытсыздықты тілеп алғаның.
«Қыңыр» әңгімесіндегі ұяты кетіп, ажары қалған, көргені тапшы, жөргегінен қағынған, ана тәрбиесінің уызына жарымаған, тіршіліктің көлеңке жағының тәлімін көбірек қамтып, аз еңбек етіп, көп талап ететін жылпостықтың отына май құйып жүрген Рыскүл – «пысық» әйел. Өнер институтында оқып жүргенде өзіне сабақ беретін әйелі, екі баласы бар ұстазымен байланысып, көңілдесінен аяғы ауырлап, соның талап етуімен аборт жасатқан. Жолдасбекке тұрмысқа шыққалы – 30 жыл. Аборт жасатқанның зардабынан 30 жыл отасқалы бір перзентке зар. Емделудің пайдасы жоқ. Айлакер әйел өзін кінәлі санап, салқындық тумауына ерте қамданып, дәрігерлерден ыңғайын тауып, «Жолдасбектің аталық ұрығы ұрпақ жалғастыруға қабілетсіз!» деген анықтама әкеліп, момын күйеуінің өзін кінәліге айналдырып, мысын құртады.
Қ. Жиенбайдың «Филармония әншісі» әңгімесіндегі Бақберген бай әйелді алып, «затындай меншігіне» айналғанның нақ өзі. Үй шаруасына беріле кіріскен, «белуарына дейін жартылай шешініп тастаған Бақбергеннің шиыршық атқан дене бітіміне немкеттілеу қарау» мүмкін емес, Шырынкүл тұрмақ «ары өткен, бері өткен, төменетектілер өлердей ғашық болып қалады». Шаруаға мығым-ақ, 25 сотық жерге орналасқан үй мен бақты, жеміс ағаштарын, бақшаны күтіп-баптау, күзету, тіпті Шырынкүлдің өзін де күзету Бақбергеннің жазылмаған міндеті, темірдей тәртіп қағидасы.
Бақберген филармония әншісі Шырынкүл Сүлейменованың үй қызметшісі, уақытша көңілдесі қызметін қоса атқарып жүрген көлденең адам. Әңгіменің астарына үңілсеңіз, қай жағынан алып қарасаң да дәурені жүріп тұрған Шырынкүл сұлудың алдағы тағдыры қыл үстінде.
Қуаныш Жиенбай филармония әншісі Шырынкүл тағдыры арқылы өнерлі, өрісті, қанатты, дәулетті, сәулетті бол, бірақ басасаулық, тәкаппар кеудемен өзіңнің нәзік жыныстың өкілі, бірінші кезекте ана атанып, ұрпақ өсіріп, мықты тірегің – азаматтың етегінен ұстап, шаңырақтың шырайын кіргізіп, отын маздатып жағатын, төңірегіңе бақыт сыйлап, өзің де бақытты болудың сенімді жолын таңдамасаң күніңнің қараңдығын ескертеді.
Орыстың ұлы жазушысы Ф.М.Достаевский: «…искусство всегда в высшей степени верно действительности, уклонение его мимолетные, скоро переходящие; оно не только всегда верно действительности, но и не может быть не верно современной действительности. Иначе оно не настоящее искусство… Искусство не современного, не соответствующего современным потребностям и совсем быть не может. Если оно и есть, то оно не искусство», – деп нағыз көркем туынды ақиқаттан алшақ кетпеуі қажеттілігін шегелеп айтқан. Артық айтқандық емес, Қуаныш Жиенбай шығармаларының қай-қайсысын сарапқа салсаңыз да шынайы шындықтың ауылынан табылады. Саясат, идеология жетегіне ермей, өмірді қаз-қалпында бейнелеп, кейіпкерлерін ақиқаттың, шындықтың толқынынан сүзіп алып, уызымен ауыздандырады. Сондықтан олардың мінез-құлқы жасандылықтан ада, ақ пен қара бояу ұшырасса тыжырынбайсыз, өйткені олар – шынайы өмірдің аласапыран тірлігін бастан кешіп жатқан періштелер емес, пенделер. Оны қаламгер ретінде Қуанышты экологиялық апатты бастан кешіп жатқан жерлестерінің тағдыры, атап айтқанда Арал өңірі, ондағы нағыз еңбеккер момын жұрттың улы ауа денсаулықтарын бұзуы былай тұрсын, ауыр еңбек, кенеуі кеткен тұрмыс тұралатып бара жатқанын, нәубетті көркем туындыларында орайын тауып кестелеп, жан айқайын, ар сөзін көрер көз, естір құлаққа жеткізуден тартынып қалмағаны – халқының бақыты үшін туған күрескерлігі. Жалпы оның қаһармандары үлкенге құрмет, кішіге ізет көрсете білетін көргенді, елінің дәстүріне, салтына, әдет-ғұрпына адал; білімді, ақылды, тәрбиелі, өнегелі келеді. Әйелдері, қыздары: кірпияз, нәзік; тиісті жерінде алғыр, адуынды, кеуделі, отқа салса жанбайтын, суға салсаң батпайтын, төзімді, тілге шешен, жолға жүйрік.
Қуаныш Жиенбайды бұндай суреткерлік табысқа оның тынымсыз еңбегі, өмірлік тәжірибе-тәлімі; тақырып, кейіпкерлер іздеуде іскерлігі, қарапайым, қарым-қатынасқа әмбебаптығы, қаламгерлік ісіне адалдығы, парасаттылығы, ішкі мәдениетінің жоғарылығы, бастысы – таланттылығы. Бұл – мақтау емес, барды бағалау, әділетті жүректің әділетін бұзбаудың ақ жолы. Керек десеңіз, озық өнер адамына жүйріктің жалынан сипап, кекілін тарағандай, мерейін өсіретін бекзаттық артық етпейді. Әдебиет – өмір оқулығы. Халықтың ұстазы. Өркениетті ел оларды алақанында аялай біледі. Оның себебін түрік халқының біртуар көсемі Ататүрік: «Бәріміз де парламенттің депутаты бола аламыз, ал бірақ өнер адамы бола алмаймыз. Сондықтан өнер адамдары біздің емес, біз өнер адамдарының қолын сүюіміз керек», – деп өнер адамдары Алланың «демінен» жаратылатынын мойындап, қоғамдағы орнын белгілеп берген. Турасында, бергенінен берерін ынтыға күткен халқы Қуаныш Жиенбайдың «қолынан сүйгізетін» кең тынысты, кемел, Тәуелсіздік рухына суарылған асыл сөзімен оқырмандарының мерейін үстем ете беретініне сенімдіміз.
Тұрсын Сыдықов,
филология ғылымдарының докторы,
профессор, педагогика ғылымдары
академиясының академигі