Қазақ әдебиеттануының қайраткері
Көрнекті ғалым Жанғара Дәдебаевтың тұғырлы тұлғасын тұтастырып тұрған Ғалым, Ұстаз, Қайраткер, Азамат сияқты ұстындар туралы таратып айтуға негіз бар, қисыны келіп тұр. Көрнекті ғалым бағалы сөз еститін кемел жасқа, ұрпағы еңбегімен мақтанатын мағыналы мөлшерге жетіп отыр.
Жанғара Дәдебайұлының еліміздің ғылыми кеңістігіндегі орнын айқындап тұратын сипаттар мыналар: тұрақтылық, орнықтылық, байыптылық, дәйектілік, әмбебаптық, байсалдылық. Ғалым жарты ғасырға жуық табан аудармай ұлттық сөз өнерінің көкейкесті, зәру, ділгір мәселелерін жүйелі зерттеп келеді. Оның дәлелі – жиырмаға жуық монография, отыздан астам оқу құралы, жарты мыңнан асатын мәнді, мазмұнды мақалалар. Бозбала кезінде босағасын аттаған университетінен бір елі ажыраған емес, күні бүгінге дейін барын салып қызмет етуде. Қасиетті қара шаңырақ әл-Фараби атындағы Қазақ Ұлттық университеті де ұстаздығынан айныған емес, талантты түлегін студенттен академикке дейін өсіріп баптады. Ұшқан ұясы мен түлегінің арасындағы осы бір адам қызығатын тұрақты байланыс ұзаққа созылсын деген тілек бар. Ғылыми ұстанымындағы тұрақтылығын тізбелеп айтудың реті бар, көзі қарақты оқырманы ғалымның монографиялары мен оқу құралдарындағы сабақтастықты, ықпалдастықты, жалғастықты олардың атаулары мен тақырыптарынан өзі де байқар, бірақ қайталаушылық пен шиырлауды кезіктірмес. Ғалым зерттеулерінен оның өзіндік қолтаңбасын, анық ойлап, айқын жазатын байыпты мәнерін байқамау мүмкін еместей. Байсалды пікірлері санаға жұғымды, ұғымға сіңімді. Ол татымсыз таластардан, тәлейсіз талдаудан, дәрегейсіз даулардан биік тұруға тырысты. Ісі тұрақты, ойы орнықты, пікірі байыпты, мақсаты бекем, айтары дәйекті осындай ғалымдар зиялы ортада әманда қайраткер тұлға ретінде қошеметтелген. Бұл үрдіс – зайырлы ортаның, руханиятқа мән берген мемлекеттің айқын белгісі екені өскелең ұрпақтың есінде жүргені абзал. Ж.Дәдебаевтың ғалым ретіндегі әмбебаптығын арнайы атап көрсеткен жөн. Әдебиет теориясы, әдебиет тарихы, әдеби сын, елтану, аймақтану, әдеби компаративистика, аударматану, фольклортану, мәтінтану, әдіснама, әдеби шығармашылық сияқты ғылыми салалары бойынша кешенді зерттеулері, қадау-қадау еңбектері ТМД елдерінде де, түркі тілдес ағайындар арасында да танымал зерттеулер қатарында. Ол – халқының рухани мұрасын, ұлттық коды сақталған асыл нұсқалары мен бедерлі белгілерін, қазақи бірегейліктің негіздерін талмай тауып, тұрақты талдап, ғылыми пайыммен парасатты жүйелеп, орнықты бағалап, орнымен насихаттап, қисынды жаңғыртып, кең қауымға талмай таратып, көпшілікке терең таныстырып алғаусыз қызмет етіп жүрген қайраткер тұлғалардың бірі. Анахарсис, Білге Бұдын Тәңірқұт, Ақиқар, Тоныкөк, Алаша хан, Асан қайғы, Жиренше шешен, Төле би, Қаз дауысты Қазыбек биден тартып қазақтың жыраулары, шешендері, батырлары жайындағы сериялық мақалалары – бөлек басуға сұранып тұрған жәдігерлер. Ал Сократ хакім, Низами, Дулати, Науаи, Ғ.Тоқай, Ш.Айтматов және басқа да танымал өнер иелері туралы жазбалардың танымдық, ақпараттық әлеуеті өте жоғары. Абай институтының вебсайтында қазақтың көрнекті тұлғалары хақындағы жүздеген мақалалар мазмұнының салмағымен, пікірінің тығыздығымен, баяндаудағы лаконизмімен ерекшеленеді. Абай институтының сайтының құрылымы, ықшамдылығы, жұмыс істеу белсенділігі де оның идеялық дем берушісінің өресіне, ықыласына, құлшынысына, ниетіне сай. Жанғара Дәдебайұлының өзі бас болып шығарған Абай институтының «Хабаршысы» да ұлттық ақпарат кеңістігінен өз орнын алды, оқырмандары жаңа сандарын күтіп жүр. Қысқасы, Ж.Дәдебаев қайраткер ретінде өнер мен мәдениетіміздің, руханиятымыз бен әдебиетіміздің кәсіби деңгейде дамып, өрістеуіне мол үлес қосып жүр. Бекем пікірлі, бекзат бітімді, байыпты һәм байсалды, көсем және шешен ретінде мойындалған осы бір жанның шығармашылығы, сыншылығы, ұстаздығы, ағартушылығы хақында оң пікір қалыптасқан, бірақ жариялылығы жетіспейтіндей. Осындайда жапон халқының «Терең өзендер үнсіз ағады» деген нақылы еске түседі. Бірін-бірі қайталамайтын қалың кітаптар шоғыры, жарты мыңнан астам мақала, елтану мен аймақтанудың тауқыметтері туралы көптеген кітаптар, жазбалар мен сұхбаттар, пікір алысулар, дөңгелек үстел материалдары, радиоконференциялар, теледәрістер, деректі фильмдер де құнды ойға, қисынды пікірге, азаматтық ұстанымға толы. Демек, қайраткер тұлғаның терең ғылыми тағылымы мен үздік ұстаздық өнегесін, қайраткерлік қарымын таратып талдаудың қисыны мол, қажеттілігі даусыз.
Ұлттық әдебиетте бой көрсеткен әрқилы кезеңдік ізденістерді зер салып қадағалап отыратын әдебиетші өзгеге еліктеудің көріністерін, басқаны байқамай еңсерудің үлгілерін ажырата білуді шәкірттеріне үйретіп отырады. Оларға әрбір көркем құбылысты байыппен қабылдап, шынайы бағалаудың жолдарын көрсетуде. Мәдениетаралық ықпалдастық пен әрқилы әдеби ымыраның астарына мән беріп, орынсыз әрекеттерден сақтандырған байқампаз ғалымның бұқаралық ақпарат құралдарындағы ақыл-кеңесі мен уәжіне назар аударылса ғой.
Әдеби кезең пен үдерісті зерттеудегі ғылыми ыждаһаттылығы, жан-жақты дайындығы, дерек пен дәйекке деген ерекше ықыласы мен құрметі, шығармашылық иесіне деген кісілік көзқарасы – Ж. Дәдебаев еңбектерін ерекшелеп тұратын негіздер мен белгілер. Ғалым әдебиеттанудың ең ділгір заманауи мәселелерін қамтитын тақырыпты дәл таңдай біледі, зерттеудің мақсаты мен міндеттерін айқын белгілеуге ерекше мән береді. Қорытынды пікірлер мен айтылатын өнікті ойлардың қисындылығы мен тұжырымдылығын қадағалайды, ал талдаудан туған тұжырымды толғамы мен дәйекті байламының перспективалық мәні де құрметке лайық. Әріптесі мен оқырманына ой салатын, оларды даму мен кемелденуге бағыттайтын Жакеңнің зерттеулері іргелі ғалым үшін де, ынталы жас үшін де таптырмас ақпарат көзі, тағылымды пікірлер мекені бола беретіні анық. Демек, қайраткердің көздегені – ұлттық өнер мен әдебиеттің, ғылым мен білімнің дамуы мен өркендеуі, жұртының рухани жаңғыру жолындағы өнімді бірлігі. Қайраткер тұлғаның тарихи қияндарға қол созуы, ғылыми қиындарға ұмтылуы, әлеуметтік, қоғамдық қалтарыстарға жиі үңілуі, жоғалғанды түгендеуге тырысуы, елі мен жерінің тұрмыстық тауқыметін кеңінен қамтуы да – назар аударарлық тағылымды істер.
Өркениет жолындағы зайырлы қоғамның адамды қайраткер, азамат, тұлға ретінде бағалауы мынадай деңгейлерден құралады екен. Біріншісі – еңбегінің ресми мойындалуы. Ж.Дәдебаев – Қазақстан Республикасының Жоғары мектебінің ғылым академиясының академигі, Халықаралық Жоғары мектеп академиясының мүшесі, Қазақ білім академиясының, Халықаралық Айтматов академиясының толық мүшесі. ҚР Президентінің «Сапа саласындағы жетістіктері үшін» сыйлығының лауреаты. Қазақстан Жазушылар одағының мүшесі. Бұл бағалар – жарты ғасырға жуық жанкешті еңбектің қоғам мойындаған заңды нәтижесі.
Екіншісі – ғалымның кәсіби деңгейде, зерттеушілік ортада, әріптестер арасында, ғылыми аудитория алдында бағалануы. Жанғара Дәдебайұлы – филология ғылымдарының докторы, профессор. Жарты ғасырға жуық ғылым мен білім саласында тұрақты, табысты және үзбей қызмет етіп келеді. Түркия, Қытай, Словения, Ресей, Қырғыз-
стан, Өзбекстан, Тәжікстан, Әзірбайжан елдеріндегі халықаралық ғылыми конференцияларда баяндама жасаған. Әлемнің оннан астам елдеріндегі ең беделді ғылыми басылымдарда мақалалары жарық көрген. Қазақ Ұлттық университетінде «әдеби шығармашылық», «көркем аударма» мамандықтары бойынша кәсіби кадрлар дайындайтын кафедраны алғаш рет ұйымдастырып, жұмысын жолға қойды. Филология факультетінің деканы қызметін ұзақ жылдар абыроймен атқарып, филологиялық білім берудің заманауи тұжырымдамасын дайындауға бас болды, өздері дайындаған жаңа біліктілік стандарттарына сүйеніп, ұжымының өркендеуіне айтарлықтай үлес қосқанын көпшілік мойындаған. Ғалымның кәсіби біліктілігін, ұйымдастырушылық қабілетін, кісілік келбетін таныған университет басшылығы оған оқу орнындағы ең күрделі саланың жұмысын үйлестіру мен басқаруды сеніп тапсырды. Ж.Дәдебаев университеттің инновациялық (кредиттік) оқу жүйесіне өтуін қамтамасыз ететін нормативтік құжаттарды дайындауға бас болды. Жоғары оқу орнының елдегі алғашқылардың бірі болып тәжірибе ретіндегі жаңа оқыту жүйесіне іркіліссіз өтуі ойдағыдай жүзеге асырылды. Осы жұмысты атқарған ұжымның еңбегінің нәтижесі ҚР Президентінің Сапа белгісіне ие болды. Ж.Дәдебайұлы – білім беру мен кәсіби маман дайындаудың теориясы мен методологиясының зәру мәселелерін қамтыған жинақтардың, құжаттардың, зерттеулердің авторы, яғни түйіп айтсақ, ол республикадағы білім беру жүйесінің білікті маманы, кәсіби сарапшысы.
Ғалым еңбегін бағалауда жиі қолданылатын әлемдік тәжірибедегі көрсеткіштің бірі – Хирш индексі екені белгілі. Яғни арнайы ғылыми зерттеулердегі жеке ғалымның еңбегіне берілген бағалар мен жасалған сілтемелердің саны және сапасына талдау жасау. Бұл көрсеткіш тұрғысынан да Ж.Дәдебаев алдыңғы қатарда тұр. Қырықтан астам отандық диссертациялардың авторефераттарында оның еңбектеріне тікелей сілтеме жасалып, орнықты баға берілген. Ғалым-педагог қаламынан туған «Абайдың антропологизмі» монографиясы, «Шешендік өнер теориясының негіздері» кітабы, «Әдеби шығармашылық», «Абайтану» пәндері бойынша дәрістер жинағы жөнінде оң ғылыми пікір қалыптасқан, олар жоғары оқу орындарының бағдарламаларынан берік орын алып, оқытуда кеңінен қолданылуда. Ғылым еңбектері әдебиет теориясы, қазақ әдебиетінің тарихы, қазақ ауыз әдебиеті сияқты оқу пәндерінің тәжірибесінде де молынан пайдаланылуда. Ғылыми ойы құнарлы зерттеуші қазақ әдебиеті пәні бойынша орта мектеп оқулықтарын жазуға белсене араласып жүр. Он жылдам астам уақыт бойы еліміздің Жоғары Аттестациялық комиссиясының төрағасы мен сараптамашысы болған, ұзақ уақыт бойы ғылыми кеңестердің жұмысына жегілген Ж.Дәдебаевтың республика үшін жоғары білікті ғылыми кадрлар дайындауға қосқан үлесі айтарлықтай. Оның ғылыми жетекшілігімен жиырмадан астам докторлық, кандидаттық диссертациялар сәтті қорғалған.
Алпыстың асуынан алқынбай өткен ғалымның жетпістің жотасына шыққандағы кейпіне көз салсақ, осы он жылда бітірген ісі көп екен. Абайтанудың 36 томы баспаға дайындалыпты. Сонымен қоса, тақырыбы тың, нысаны жаңа «Әдеби компаративистика және көркем аударма» атты оқу құралы студенттердің игілігіне айналып үлгеріпті. Тақырып ауқымы кең, ғылыми ақпараты таң қалдыратын «Тақырып және идея» зерттеуі ойлы оқырманын тауыпты. Ал, «Абайдың антропологизмі» атты инновациялық ұстанымдар мен перспективалық пікірлерге толы, абайтануға қосылған қомақты үлес деп саналатын монографиясы жарық көріп, ғылыми айналымға еніпті. Зерттеуде адам келбеті, заман сипаты, жан мен тән, мән мен мағына, ақыл, махаббат сияқты категориялардың жаңа қырлары мен сырлары, сыны мен сипаты айқындалған. Төрт ұжымдық монографияны дайындауға қатысқан екен. Оның жетекшілігімен әдеби компаративистика және аударматанудың заманауи мәселелері бойынша үш дәрістер жинағы жарық көріп, оқу үдерісінде қолданылып жүр. Ж.Дәдебаевтың мұрындық болуымен үш халықаралық мақалалар жинағы басылып шыққаны мәлім. Осыған қоса ғалымның танымдық, тағылымдық, ақпараттық құндылығы жоғары екі жүзге жуық мақаласы республикалық, облыстық баспасөзде жарық көрген.
Тұжырып айтсақ, қайраткер ғалымның қоғам көңілінен шыққан үлгісі, ұрпағына берер тағылымы мен өнегесі айтарлықтай ауқымды, сан-салалы әрі мәнді екен. Ғылыми еңбектерінің терең мазмұны, ағартушылық қызметінің ғибраты, қайраткерлік қарымы да мол осындай азаматтан елі мен жұрты әлі талай сүбелі еңбектер күтеді. Еңбегін елейтін, кісілік келбетін танитын қалың елі, жанашыр отбасы,тілектес ұжымы, құрметтейтін құрдастары, адал оқырманы мен шәкірттері аман болсын дейміз.
Темірғали Есембеков,
әл-Фараби атындағы
ҚҰУ-нің профессоры,
филология ғылымдарының докторы