Қазақ әдебиеті және Қазақфильм
02.11.2018
458
0

Руханият дүниесінің түбі бір, түп атасы – әдебиет. Бұл сөзге түсінік жазып, түкпірлеудің қажеті шамалы шығар, әйтсе де, киноның да, театрдың да, музыканың да сүйенері әдеби көркем шығармалар: проза мен поэзия екендігін ескерте салсақ, есті жұрттың «е-е» десері анық.


Қазақ әдебиеті мен қазақ кино­сының арасындағы шығарма­шы­лық байланыс пен бауырластық Мұх­тар Әуезов («Абай әні»), Бейім­бет Майлин, Ғабит Мүсірепов, Всеволод Иванов («Амангелді»), Шәкен Айманов, Мәжит Бегалин, Сұлтанахмет Қожықов, Ораз Әбі­шев­терден басталды да, жарасымды жалғасын таба берді. Бердібек Соқ­пақбаевтың «Менің атым – Қожа» повес­ін оқыған жұрт әлі күнге Аб­­долла Қарсақбаевтың экран­дағы «Қожасына» қол соғумен ке­леді. Төлен Әбдіковтың «Ер Сейіт пен Қыз Бәтіші» талантты режиссер Серік Жармұхаметовтың «Өтел­ме­ген парызы» болып таспаланды. Дулат Исабековтың «Гаухартасы» – режиссер Шәріп Бейсембаевтың да «Гаухартасы». Саусағымызды бү­гіп санамалай берсек, қазақ режис­серлері мен қазақ қаламгер­лері арасындағы «алтын көпірден» тарлан таланттарды көре түседі екенбіз. Міне, айдан асты, қазақ баспасөзі жазушы, кино-драматург Жүсіпбек Қорғасбектің «Қасқыр адам» атты повесінің желісі бойын­ша түсірлген толық метраж­ды драмалық «Талан» көркем фи­льмі туралы жарыса жазып, сүйін­ші­леп жатыр. Естеріңізге сала ке­тейік, бұл – Жүсіпбек Қорғас­бектің қала­мынан туған шығарма негізінде түсірілген екінші фильм. Алғаш­қысы – әйгілі «Жансебіл» болатын. Режиссері – марқұм Ая­ған Жәшімбаев еді. Қасым Жәкі­баев, Галина Макарова, Кеңес Нұр­ланов, Анна Таракановалар бас­ты рольдерді сомдаған «Жан­се­біл» «Қазақфильмнің» алтын қо­рына енді. Сөзімізді осы арадан қайы­рып, біз бүгінгі шағын шолуы­мыздан мына бір мәселені ерек­ше­леп айтқымыз келеді: Болат Қа­лым­бетов сияқты ағалар дәстүрін көріп қалған режиссерлер болмаса, қазіргі киногерлердің дені қазақ қаламгерлерімен қарым-қатынас жасау, шығармаларын оқып, шығармашылық одақ құру дегенді мүлде ұмытқан. Сондықтан да болса керек, олардың түсіріп жат­қан фильмдерінде ұлттық реңк, ұлт­тық мазмұн, ұлттық құнар жоқ. Әйтсе де, Қазақ әдебиеті және Қа­зақ­фильмнің арасындағы бұрынғы байланысты қалпына келтіруге болады деп ойлаймыз. Сондықтан газетіміздің алдағы нөмірінде аталған мәселе төңірегінде кеңірек ой өрбітпекпіз.

ПІКІР ҚОСУ

Ваш e-mail не будет опубликован.

Пікір