АНКАРАДА ӘЗ НАУРЫЗ ТОЙЛАНДЫ
06.04.2018
1182
0
Түркияның бас қаласы Анкарада Көк Ту Қазақ Мәдениеті Қоғамы түркі халықтарының дәстүрлі, ұлық мейрамы Наурызды атап өтті. Бұл шарада Түркияда қоныс теуіп тұрақтап қалған отбасылы қазақтар мен арнайы шақырылған өзге ұлт өкілдері бас қосып, бір-бірімен жақын танысып, мерекелік дастарқаннан дәм тату құрметіне ие болды.
Ұлыстың ұлы күні қарсаңында құры­лып, салтанатты кеште тұсауы кесілген Көк Ту Қазақ Мәдениеті Қоғамының басшысы Ләззат Мүйләзімоғлы Қоғам­ның мақсат-міндеті мен болашақта ат­қарылатын жұмыстары туралы: «Көк Ту Қазақ Мәдениеті Қоғамы қазақтың ұлт­тық құндылықтарын дәріптей отырып, Қазақстан мен Түркия арасындағы әріп­тестік, серіктестік, достық қарым-қа­ты­насты одан әрі нығайтуға себепші болады деп үміттенеміз. Қоғам аясында бола­шақта қазақ тілін, салт-дәстүрін, қазақ ұлттық музыкалық аспаптарын, ұлттық би, қол өнер жұмыстарын оқытатын жә­не үйрететін курстар ашылады деп жос­парлануда. Студент жастар мен жасөс­пірімдерге, балаларға арнап мәдени, әдеби, ғылыми тақырыптардағы түрлі кездесулер мен байқаулар, спорттық жарыстар ұйымдастырылатын болады. Екі ел арасындағы байланыстарға үлес қосу мақсатында әр түрлі бағыттардағы жобалар жүзеге асырылады. Бұның бәрі, әрине, болашағымыз жастар үшін», – деп алдағы жоспарлармен бөлісті.
Көк Ту Қазақ Мәдениеті Қоғамын құрушылар туралы мәлімет бере кетсек: Ләззат Мүйләзімоғлы – Түркия Мәде­ниет және Туризм Министрлігі жанын­дағы Түркі Әлемі музыкалық аспаптар оркестрінде өнерпаз, қоғамның құрушы басшысы. Ілге Қарагөз Ахметова – Түрік стандарттары институтының Сыртқы қарым-қатынастар бөлімінің сарапшысы және сапа менеджменті жүйесінің ауди­торы. Торғын Сұлтанқызы – журналист, Лаура Сүер – Түркия Ақпарат және баспа басқармасының аудармашысы, Рустам Арғымбаев – заңгер, Асел Лахаева – Хажеттепе университетінің докторанты, журналист. Кәрім Байғұтов – Хажеттепе университетінің докторанты, өнертану­шы. Меруерт Сатынбек – Хажеттепе университетінің докторанты, түрколог.
Салтанатты кеште сөз алып, құттық­тауын жеткізген ТҮРІКСОЙ халықара­лық ұйымының бас хатшысы Дүйсен Қасейінов: «Мәдениет және білім сала­сын­да­ғы кез келген бастамаларда, әсіресе, азаматшалардың ұйымдастыру­шылық қабілеті ерекше көзге түсетінін атап өткім келеді. Түркі халықтарының мәдениеті мен өнерін дамыту ұйымы ретінде қолға алған бастамаларыңызды жүзеге асыруда қашан да қолдау білдіруге дайынбыз», – деп жүрекжарды лебізін білдірді.
Салтанатты кештің тағы бір мәртебелі қонағы, Қазақстанның Түркиядағы Елшілігінен келген Жауапты хатшы Арнұр Мұхаметкәрім Көк Ту Қазақ Мә­де­ниеті Қоғамының бауырлас елдер Қазақстан мен Түркияның әріптестік, достық қарым-қатынасын нығайтудағы ықпалына зор сенім білдіріп, бұдан әрі ат­қарылар жұмыстарға толағай табыс тіледі.
Мерекелік кеште Түркия Мәдениет және Туризм Министрлігі жанындағы Түркі Әлемі музыкалық аспаптар оркестрінің өнерпазы Фериал Башел Түзүн құттықтау сөз сөйлеп, қоғам жұмыстарына сәттілік тіледі және Нұртуған жыраудың «Кәнеки, тілім сөйлеші» термесін, «Бір бала» халық әні мен Мәриям Жагорқызының «Дудар-айын» әуелете орындап, тамашалау­шы­лар­­дың құлақ құрышын қандырды. Сондай-ақ Анкара Университетінің Жур­налистика бөлімінің студенті Дінмұхаммед Қасымбек өнер көрсетіп, кеш қонақтарының ыстық ықыласы мен зор қошеметіне бөленді.
ПІКІР ҚОСУ

Ваш адрес email не будет опубликован.

Пікір