Рахманқұл рухына тағзым
24.11.2017
913
0

Белгілі әдебиеттанушы, түркітанушы ғалым, филология ғылымдарының докторы, профессор, ҚР ҰҒА-ның, Түрік тіл құрылымының (Түркия), Халықаралық Айтматов академиялары­ның академигі Рахманқұл Бердібайдың туғанына 90 жыл толу мерейтойы республика көлемінде кеңінен аталып өтілуде. Осы оқиға туысқан түрік елінде де сырт қалмады.

Қазақстанның Түркиядағы елшілігі мен Еуразия Жазушылар одағының қол­­дауымен Рахманқұлдың «Ел боламыз де­сек…» атты кітабын Түркияда тү­рік тіліне аударып, «Бенгу» баспасынан бас­тырып шығарды. Анкара қала­сында өткен салтанатты жиынның аясында түріктің белгілі жазушылары мен ғалым­дары қатысқан осы кітаптың таныстырылымы өтті.
Салтанатты мәжіліске Қазақстан­ның Түркиядағы Елшісі Абзал Сапар­бек­ұлы, Түркияның бұрынғы Мәдениет министрі Намык Кемал Зейбек, қазақ­тың белгілі түрколог-ғалымы Шәкір Ыбы­раев, Еуразия Жазушылар одағы­ның төрағасы Якуб Омароғлы, Р.Берді­бай­дың туысы кәсіпкер Бектас Шірік­баев қатысты.
Кітапқа түркі әлеміне танымал ға­лымның жаһандану дәуіріндегі қазақ тілінің, әдебиетінің, жалпы руханияты­ның зәру мәселелері жайлы құнды пі­кір­лер айтқан еңбектері енген. Сондай-ақ ұлт болашағы, түркі бірлігі хақындағы ордалы ойлары да түрік оқыр­манда­ры­ның ойынан шығары анық.
Рахманқұлдың «Ел боламыз десек…» кі­табы Ферах Түркер мен Якуб Өмер­ұлы­ның алғысөзімен ашылған. Сондай-ақ, профессор Дандай Ысқақұлының «Рах­манқұл Бердібай: түркі дүниесінің жаңа дәуірдегі Қорқыт Атасы» атты кө­лемді мақаласы түрік оқырмандарына қазақ ғалымының шығармашылық өмір жолымен таныстырады. Кітапты түрік тіліне Гүлжазира Аманбайқызы мен Ұфық Тузман аударған.
Жиынға зиялы қауым өкілдері, жур­налистер мен осы елде оқып жүрген қа­зақстандық студенттер қатысты.

ПІКІР ҚОСУ

Ваш адрес email не будет опубликован.

Пікір