Алматы облысында шілденің ми қайнатар қапырық ыстығы биыл ерекше. Нағыз шілде екендігін танытты. Осындай ыстыққа қарамастан Ұйғыр аудандық мәдениет үйінің іші адамға лық толы. Себеп, аудан жұрты өзінің жерлес ақыны, Мәдениет қайраткері Сәуле Досжановамен Қазақстан Халқы Ассамблеясының 20 жылдығы аясында кездескелі тайлы-тұяғымен келіпті.

Қазақстан Жазушылар және Журналистер одағының мүшесі, Қазақстан Республикасының Мәдениет қайрат­кері, Қазақстан Республикасы Парла­мен­ті Мәжілісі аппаратының жауапты қыз­меткері, ақын, журналист Сәуле Ма­ғазбекқызының шығармашылық кеші оның өмір жолына арналған шағын бейнефильмнен басталды. Ал­ғашқы құттықтау сөзді Ұйғыр ауданы әкімі Алимжан Тохтасунов алып, Сәуле Досжанованы шығармашылық кешінің өтуімен құттықтады. Қонақжайлық та­нытып, ақынның басына ақ шәлісін са­лып, камзол кигізіп, Алғыс хатын та­быстады. Той иесін сахна төріне отыр­ғызды.
Қазақстан Республикасы Парла­менті Мәжілісінің депутаты, «Нұр Отан» пар­тиясы фракциясының мүшесі Әли­хан Тойбаев Қазақстан Халқы Ассамб­леясының 20 жылдығы аясында өтіп жатқан шығармашылық кеште сөзін әріден бастап 5 институттық реформа­ның нақты 100 қадамы жайында айтып, осындай нақты қадамдар арқылы да­мыған 30 елдің қатарында бағымыз жа­натындығын да аса зор сеніммен айт­ты. Сөз соңын Сәуле қарындасының шы­ғармашылығына бұрып, жерлес­те­рінің алдына есеп бергелі келген ақын­ға шығармашылық табыстар тіледі.
Алматы облыстық Қазақстан халқы Ассамблеясы төрағасының орынбасары, хатшылық меңгерушісі Ғабит Тұр­сынбай Ассамблея жылы аясында өт­­кізіліп отырған шараның ұлттық нақ­ты 100 қадамның бір қадамы деп ба­ғалау­ға болатындығын айта келе ау­дан­ға ат басын бұра келген ел аға­лары­мен, ел аналарымен таныстырды. Қазақ­стан Республикасы Президенті әкім­ші­лігінің сектор меңгерушісі Нәзипа Ша­наи ибалы келін, өнегелі ана, абы­рой­лы ауылдас бола білген Сәуле ха­ным­ға рахметін айтып, ауызбіршілік пен татулықты ту еткен мемлекетімізде осындай әдемі кештер көп болғай деген жақсы ниетін жеткізді.
Сергей Есенин атындағы халық­ара­лық сыйлықтың және Алаш сыйлы­ғының иегері ақын Қазбек Иса да ақ жеңгесіне деген жүрекжарды лебізін жеткізіп, әдемі жыр шумақтарын арнады.
Ақынның Дүкенбай Досжанға арнап шығарған «Сағыныш» әнін Президент оркестрінің әншісі Элмира Жаңа­бер­генова шырқау шыңына жеткізе орын­дап, көрермендерді бір серпілтті.Мұх­тар Әуезов атындағы әдебиет жә­не өнер институты директорының кеңес­шісі, филология ғылымдарының док­торы Гүлжахан Орда да өз ойын ор­т­аға салды.
Қазақстан Жазушылар одағы «Ан-Арыс» баспасының бас редакторы Кә­­дір­бек Құныпияұлы Нұрлан Ораза­лин­нің Алғыс хаты мен бағалы сыйлы­ғын табыс етті. Мінберге көтерілген той иесі Сәуле Досжанова туған жеріне бір топ достарымен келгенде құшақ жая қарсы алған жерлестеріне шексіз ал­ғысын айтып, бірнеше өлеңдерін оқы­ды. Сыныптасы Нұрмұқан Шәймер­де­нов балалық шақтарынан естеліктер айтты.
Кештің қорытындысында Сәуле Дос­­жанова тағы біраз өлеңдерін оқып, Ассамблея жылы аясында өткен шы­ғармашылық кешіне атсалысқан ауданның азаматтарына алғысын айтып, әр кезеңдерден құрастырып бей­небаян жасап, ән жазылған өлеңдерін жи­нақтап, көрермен назарына ұсын­ған қыз-жігіттерге аналық батасын бер­ді. Туған жерін әркез сағынып жү­ре­­тін ақын қыздың кеші «Атамекен» әні­мен аяқталды.

Баян МАМЫРБАЕВА.
Алматы облысы.