Алтын құйрықты құлындарым менің (әңгіме)
Жанұзақ ЖӨКЕН
– Алтын құйрықты құлын туатын күні бүкіл әлемді қараңқылық басып, алып қара құс келгенде барлық жылқышы ұйықтап қала береді екен. Кейін аталарың сол алтын құйрықты құлынды іздеп кетіпті.
Бұны қаншама рет естігенім есімде жоқ. Шешем әжесінен естіген екен. Ал әжем әжесінен естігенге ұқсайды. Күнде кешкісін үрпе-шүрпе төртеуміз шешемнің аузына қараймыз. Ол кісі үнемі осы ертектен бастайды.
– Әжемнің атасы тауып алып па?
– Әжеңнің атасы тек бір алтын құйрықты тауып әкеліпті.
– Ол қайда?
– Оны кейін шапқыншылар алып кетіпті.
– Олар кімдер?
– Оны әжесі апаңа айтпапты. Туыстарының іздеуінен алаңдаса керек.
Бала қиялым шарқ ұрып, алтын құйрықты құлынды ойлап жатып, ұйқыға шоматын едім. Әкемнің қашан қайтып келгенін білмеймін, әйтеуір күнде таңертең бізбен бірге таңғы асын ішеді, содан қара велосипедін мініп үйден шығып кетеді. Ал біз көршінің балаларымен асыр салып ойнауға кірісеміз.
Бүгін әкем үйге ерте келген. Алдына алып отырып тамақ ішті. Шешемнің күнде қайталай беретін екі-ақ ертегісі бар. Біреуі – алтын құйрықты құлындар мен күн санап өсетін Едіге дейтін батыр, жеті күнде жеті жастағы баладай болған екен деп бастайтыны әпкелеріме қарағанда маған көбірек ұнайды. Күніне барып қозыны көтеріп көрем, мен емес, қозы күн санап өскендей, кейде жығып тастап кетеді. Ақыры Едіге болып жалыққам. Содан да әкеме ертек айтқызбақ болған едік, ертек білмеймін дегеніне томсырайып қалдық. Әкемнің әжесі ертек білмейтін сияқты, болмаса айтып беретін еді. Бұл күні көп әңгіме болмады. Әкемнің шешеме ертең көшетін болғанымызды айтқаны, шешемнің үй ішіне бір сәт көз салып тұрып қалғаны ғана есімде қалыпты.
Арада үш күн өткенде басқа бір жерге көшіп кеттік. Алтын құйрықты құлынды іздеген шығармыз. Көштен кейін әкем күніне ерте келетін болды, кешкі ас кезінде бір киіз кітаптан көптеген әңгімелер оқып береді. Ақымақ қасқырдың түлкіге қалай алданғаны туралы ертекті он неше рет естідім. Бірақ маған шешемнің алтын құйрықты құлындары қызық сезілетін. Өмірде қанша бөрі болсаң да түлкінің алдында түк емес екеніңді ол кезде қайдан білесің.
Әкем жетектеп мектепке
апарғанда барып, ол кісінің мұғалым екенін білдім. Мектепте бала көп емес екен, үлкен-кішісі болып алпыс-жетпіс бала. Мектепте де, үйде де бізді әкем өзі оқытты. Енді ертектен гөрі кешкі өрістен қайтқан малды санау мен үшін қызық. Саусақтарым таусылғанда, жерге бір тас қойып, басынан бастап санаймын. Демалыс сайын ұзынды күн осылайша өтіп жатты. Әкемнің киіз кітабын өзім оқып алатын болдым. Шешем айтатын алтын құйрықты құлын туралы бұл кітапта ештеме жазылмапты. Бір күні әкем бірнеше кітап көтеріп келген. Ішінде көптеген соғыс туралы әңгімелер бар екен. Енді әжемнің әжесінің атасы алып келген алтын құйрықты әкеткен шапқыншыларды іздейтін болдым. Бірақ оны да таба алмаған едім. Ешқандай жерінде алтын құйрықты құлын туралы сөз жоқ.
– Болды, іздеме, ол кезде алтын құйрықты әкеткендер алтынды білмейтіндіктен бір жерге тастап кеткен шығар.
Шешем бұл сөзді айтқанда араны ашылған адамдардың бар екенін білмейтін сияқты, жиырма жылдан кейін барып шешемнің сөзінің қате екенін білдім. Бұл дүниеде алтынды танымайтын адам болмайды екен. Мүмкін, менің шешем ғана білмейтін сияқты. Иә, біздің елге алтын құйрықтан гөрі құлындар қымбат!
– Алтын құйрықты құлындар үйір-үйір жылқыға айналып, аспанның арғы бетін мекен етеді екен. Дегенмен, әр тоғыз құлында бір құлынның құйрығы шолақ дейді, өйткені шапқыншылар алтын құйрықты құлындардың ішінде біреуінің құйрығын алып кеткен екен.
Маңайыма басқа балаларды жинап ертек айтқанға әуеспін, һәм бұл шешемнің айтатын алтын құйрықты құлындар туралы ертегінің аяқталар тұсы. Осыдан кейін әжемнің әжесінің атасы алтын құйрықты іздеп тапқан-таппағанын білмеймін. Бірақ балалардың бірде-бірінің алтын құйрықты құлынды іздегісі келмеген. Тіпті әкемнің өзі айтып қоймайтын, шешемнен ғана еститінмін. Мүмкін алтын құйрықты құлындар аналар ғана айтатын ертек шығар.
Арада жылдар тым тез өтті. Ержетіп жоғары мектепке аттандық. Көзбен көргеннен басқасының бәрі жалған дейтін тәрбие алдық. Мектепте абыройлы бір профессор бар еді. Алтын құйрықты құлын туралы айтып бердім. Үндемеген беті орнынан тұрып кетті. Араға бірнеше уақыт салып іздеп келіпті. Сенген екен. Аталарының алтын құйрықты құлынды іздегенін айтып берді. Бәрінен қызығы – ол өзі де іздепті, обалы сол, таба алмай жүр екен. Бірге іздейтін болдық, ақыры ол кісі алтын құйрықты құлындар жайлы білгендерімізді түгел жазып, таба алмасақ кейінгі ұрпаққа қалдыруымыз керек деп шешті. Шешемнің әжелерінен бері айтып келе жатқан ертектеріне сенетін адам ақыры екеу болдық. Жоқ, профессор аспанның арғы беті болатынына сенеді екен.
Мектеп бітірген соң қалада тұрып қалдым. Үйлендік. Бір сыдырғы күндер өтіп жатты. Түсімде алтын құйрықты құлындар шапқылап жүретін болды. Шешеме айтқым келіп ауылға бардым. Жылдар алып еңсесін басып, бүкірейтіп кеткен шешем алтын құйрықты құлындарды ұмытып кетіпті. Есіне түсіре алмады. Жоғалған алтын құйрықты құлындарды тауып келіп көрсеткім, үнемі айтатын ертектерін есіне салғым келген. Бірақ шешем өзінің алтын құйрықты құлындарының ешқайда жоғалмағанын айтып тұрып алды. Шешемнің осыншама тез ұмытшақ болғанына қайран қалдым. Балаларын үйге ертіп келген үлкен апайым ұлына алтын құйрықты құлын туралы ертек айтып жатқанын естідім.
– Әлемнің қожасы алып теңіздің арғы бетінде, аспанның арғы жағына жалғасар жол бар, сол жолмен аспанның арғы бетінен алтын құйрықты құлындарды тауып келе аласың.
Әпкемнің ертегісіне енді жол қосылыпты. Бұрын шешемнің аспанның арғы бетіне баратын жол туралы айтқанын мүлде естімегенмін. Әкеме айтып едім, ол кісі күлді.
– Шешең алтын құйрықты құлындарын баяғыда тауып алған.
Ауылдан көңілсіз қайттым. Жарыма айтсам, ол да бұл ертекті біледі екен.
– Асықпа, алтын құйрықты құлындарыңды тауып беремін, – дейді.
– Теңіздің арғы бетінде аспанның арғы бетіне барар жол бар екен.
– Онда сол теңізден өтуге
құлшына бер, сол кезде алтын құйрықты құлындарыңның жоғалмағанын көресің.
Жарыма өкпелеп жатып ұйықтап кетіппін. Алтын құйрықты құлындардың құйрықтары бүкіл ғаламды нұрға бөлеп шауып жүр екен. Алтын құйрықты құлындардың шыңғырлай кісінегенінен оянып кеттім. Аспанның арғы бетінен жететін алтын құйрықты құлындардың әр тоғызында алтын құйрығын жаулар алып кеткен бір шолақ құлын барын ойлап көз іле алар емеспін.
Менің алтын құйрықты құлындарым қайда жүр екен деші?!