«Әділетсіз баға» немесе көркемдік
Жұмыр жердің бетіндегі күллі игі-жақсы әрекеттің бәрі Адам үшін… Сіз ұстап отырған газет, үстел үстіндегі журнал, сөредегі кітап та адамзаттың рухани ашықпауының амалы. Десек те, бүгінгі қоғамның сөзін сөйлер мерзімді басылымдар өздерінің халықтың рухани «емшісі» екендіктерінен хабары жоқтай көрінеді. Әлқисса, негізгі айтарымыз бұл емес. Газетпен салыстырғанда журналдың жүгі ауыр һәм жауапкершілігі мол екенін іштей білгенімізбен, кейде іс жүзінде айыра алмай жатамыз. Әсіресе, әдеби журналдарды парақтай қалсаңыз, еріксіз осы ойдың есігін қағасыз. Қазіргі проза өкілдерінің бірінің: «әдеби журналдар әлі шығып жатыр ма?» дегені бар еді. Төбеден қойғандай әсер қалдырған бұл сұраққа дәл сол уақытта не деріңді білмей, дал болып қалады екенсің. Күмәнді ойдың жетегімен қолға түскен әдеби журналдардың осы жылғы шыққан нөмірлеріне шолу жасауды жөн көрдік. Журналдар әдеби міндетін қай деңгейде атқарып жүр? Кім, қалай ізденіп жатыр? Алдағы әңгімеміздің ауаны осы болмақ…
– Сәлеметсіз бе!
– Сәлеметсіз!
– Әдеби журналдарды жиі оқисыз ба?: «Жұлдызды», «Жамбылды», «Үркерді»!
– …Олар әлі шығып жатыр ма?
– …
І. «Үркер» журналы хақында
«Үркер» журналының жыл басынан бергі шыққан нөмірлерін парақтағаннан кейін 47 беттік басылымның әдеби бағыттағы материалдарына қарағанда «Бағдар», «Біздің сұхбат», «Көзқарас», «Жаңғырық» айдарларымен жарияланатын мақала-сұхбаттары қызықтырды. Әдеби ахуалына келсек, бар басымдықты поэзияға салатындай. Мәселен, №2 санға Жұлдыз Бейсек пен Айдана Қайсарбекқызының бір топ өлеңдері жарияланса, №3 санына үш бірдей ақынның (Мағиза Құнапияқызы, Сәнді Ақылаева, Гүлбақыт Қасен) өлең топтамаларын шығарған. Ал журналдың прозасы, тек әңгімемен ғана шектеліп тұр. Оның өзі бір санда бір ғана автор. Поэзиямен салыстырғанда прозаның жағдайы жұтаңдау. Десек те, әр нөмірде тұрақты жарияланып жүрген аударма жұмыстарына ішіміз жылығандай болды.
Ендігі сөзімізді журналдың №2 нөміріне жарияланған Ержан Жаубайдың «Қардың биті» әңгімесі хақында өрбітсек.
Шығарманы оқымай жатып, еріксіз тақырыбына үңілесіз. «Қардың биті». Оқырманды қызықтырады. Ойланасың: қардың биті болушы ма еді? Автордың бұл әңгімесі Моңғолия жеріндегіқазақ салшыларының кәсібінен хабар береді.Шығарманың өн бойы құпия һәм белгісіз дүниелерге толы. Және бір сыдырғы баяндауға құрылған өзге әңгімелермен салыстырғанда «Қардың битінің» оқырманға берері мол. Сөз қолданысы ерекше. Кейінгі өскелең ұрпақ түсіне бермейтін салшыларға қатысты көп сөзбен таныстық. Автор әңгімені басынан аяғына дейін өз тарапынан ғана баяндайды. Қалаған кезінде Мысаны, яки оның серігін сөйлетеді. Негізгі кейіпкер жоқ. Бірді-екілі кейіпкерін есімімен атағаны болмаса (Мыса, Мағауия, Шәкербай, Қазыбай) қалғаны «салшылар» сөзінің қатарында. Автор оқырманды әңгіменің шешуші сәтіне дейін тыңдатудың амалын кейіптеу арқылы дөп тапқандай. Шығарма барысында ақбас кемпір туралы айтылады («Е, Алла, ақбас кемпірден сақтай гөр»). Оқып отырған жеріңнен тоқтай қала ойланасың: «ақбас кемпірі» кім болды? Әлде қар жауып кетпесін дегені ме?» деп өзімізше болжап қоямыз. Оның өзеннің асау толқындары екенін оқиғаның соңын ала білгенде оқушылық болжамымыздың қате шыққанына іштей қынжылдық һәм авторға таңғалдық. Шығарма иесі жол мотивін (су бетіндегі жол) еркін қолданып отыр. Байқасаңыз, әңгімеде айтарлықтай идея да, кеңістік те, кейіпкер де, оқиға да жоқ. Тек, автор таңсық дүниені тақырып қылып алуымен ұтып отыр.
№2 санының алғашқы бетіндегі «Таң алдындағы жазбалар» айдарымен берілген Ұларбек Нұрғалымның «Керек…Керек…Керек» деген қазақ әдебиетіндегі сын туралы үзік ойын көзіміз шалып қалды. Мынадан соң «осы нөмірге сыни мақала жарық көрді ме екен?» деп дәмеленіп қалғанымыз рас. Журналды ары сапырып, бері сапырып, ақыры сыннан хабар болмаған соң, ойладық: қазір таза әдеби журналдардың өзінде сыни мақала жоқтың қасы, «Үркерге» не деп өкпелейміз? Мақау адамнан сөз сұрағандай… Журналдың біраз бөлігін сырттағы авторлар құрайды. Редакцияның өз ой-толғамын, пікірін, әдеби мақаласын ара-тұра кездестірдік, бірақ көңіл жұбанарлықтай емес. Ақын-жазушылардың дайын шығармаларын алып, түрлі-түсті қағазға баса бергеннің бәрін әдеби журнал санатына жатқызсақ, талғамымыз қайда қалмақ? Әдебиетсүйер оқырманның әр айдағы кезекті нөмірін тағатсыздана күтердей дүниенің болмауын жаңалықтың жоқтығына баладық. Ал жаңалық жоқ жерде ізденістің барына сену қиын екен.
ІІ. «Жамбыл» журналының айтары бар ма?
Әулиета жерінен жарық көретін «Жамбыл» журналының қадамы нық, мақсаты айқын, тақырып аясы кең. «Өлең өлкесінде», «Елге аян», «Қазіргі қазақ прозасы», «Қанат қақты», «Әулиета әңгімелері», «Есте қалған есімдер» және «Әдеби зерде» атты айдарлармен жарияланып жүрген көркем шығармалар мен тұшымды мақалаларға қарап, журналда ізденістің бар екенін аңғардық. Мәселен, №1 нөмірдің беташар мақалалары Шерхан Мұртазаның
85 жылдығына арналған екен. Алмас Нүсіптің «Айша анадан туған Шерхан – Барсхан» әдеби мақаласы қаламгер ағаға деген інілік ізеттің рухани көрінісін жасағандай («Қазақ әдебиеті» газетінің 2016 жылғы №2 санында жарық көрген бұл мақала журналдың өз қазанынан қайнап шыққандай әсер береді екен). Ал Әділ Дүйсенбектің «Естелік фрагменттерін» оқып отырып, «Қызыл жебенің» авторымен өзіміз бірге жүріп, араласқандай әсерде қалдық. Мұның кейінгі жас ұрпақтың назарына қаламгер атына тұрғызылған естелік ескерткіші болып қаларына кәміл сенгендейміз. Және аталған естелік-эссені осы санның салмақты, әрі құнды материалы деп бағалар едік.
Журналдың «Қанат қақты» айдарына көзіміз түсіп, «Жастар шығармашылығынан кімдер бар екен?» деген сұраулы оймен бірдеңесінші бетті іздей бастадық. Мақсат Рамазанұлының «Барсик» әңгімесі журналдың жас қаламгерлерге деген талғамының қандай екенін айқындап тұр. Айтпақшы, редакция ұжымы оқырманды келесі санда нені оқитындарын да алдын ала құлақтандырып қояды екен. Журналдың ең соңғы бетіндегі «Келесі саннан оқитындарыңыз: «Өлең өлкесінде», «Қазіргі қазақ прозасы», «Қанат қақты», «Әулиеата әңгімелері», «Есте қалған есімдер» деген хабарламаны көргенде кішігірім таңданысымызды жасыра алмадық. Әдеби журналдарға шолудың боларын алдын ала болжағандай №1 нөмірде «Елге аян» деген жаңа айдар бастап отыр екен. Аннотациясында жазылғандай аталған айдарда қаламгердің кітаптарына қысқаша шолу жасалып, оған қоса шығармасы жарияланбақ. «Елге аян» айдарының алғашқы болып тұсауын кескен – Мархабат Байғұт. Алдағы әңгімемізде жаңа айдардың жаңа шығармасына («Қажылықтың қабылдануы») қарай ойыссақ…
«Қажылықтың қабылдануы» әңгімесін салқынқанды оқырманның өзі мырс етпей оқи алмайтын шығар. Шығарманың өн бойы тұнған сарказм. Ащы шындық. Оның арғы жағына үңілсеңіз, бүгінгі қоғамның бет-бейнесін бірден танисыз. Шыны керек, ертегі оқып отырғандай болдық.Кейіпкерлердің есімі болмаған соң, яки оқиғалардың ширақ өрбуінен немесе баяндалу ерекшелігінен де болар.
«Үшеуі дос еді» деп басталар әңгіме қысқалық концепциясына құрылған. Қысқа болғанда да, тым қысқа. Автор жетекші ойы мен тақырыбын ашуда көп сөзден гөрі бір ғана сөзді құп көреді. («Жолағы қайда? Жарығы қайда?» білмеді. Сезбеді. Сезінбеді»). Әңгіменің негізгі тірегі һәм кейіпкерлері үш дос. Автор өзі атағандай «Бірінші Дос, Екінші Дос, Үшінші дос». Және жанама рольдегі Қошеметтің образын жазушы сәтті ойлап тапқан. Аталған шығарманы өлең түріндегі әңгіме десек те жарасатындай. Бұған автордың кей тұстарда сөздерді ұйқаспен қолдануы дәлел. Әңгіме оқырманның санасында, ең алдымен, адал достықтың көрінісін қалыптастырады. Одан соң, әрине, мейірімнің. Кейін қағанатшылдық қасиеттің дәмін сездіргендей. Шығармадағы диалогтарға бажайлап қарап отырсаңыз, заман келбетін көресіз. Майда тілмен айнытпай берген. Әңгіме құрылысының күрделі еместігі, оқиғаларының шиеленіспеуі, сөздерінің түсінікті һәм қысқалығы жағынан балаларға арналған шығармалардың қатарына қосуға да болатындай-ақ. Автордың көркем туындысынан түйгеніміз: мейірімді адамның мерейі әрқашан үстем болмақ. Мейлі, оны қоғам байқамасын…
ІІІ. Қадамы құтты «Адырна»
Жоғарыда аталған журналдармен салыстырғанда, «Адырнаның» жарыққа шыққанына көп уақыт бола қойған жоқ һәм тәжірибесі де аз. Десек те, журналдың №1 санына үңілсек, әлгі айтқан сөзімізді қайтып алатындай екенбіз. Көшке жаңадан ілескен әдеби басылым болған соң ба, еңбектері мен ізденістері журналдың алғашқы парақтарынан-ақ көрініп тұр. Ауқымды, әрі қызық айдарларға құрылған журналдың мазмұнын оқып отырып, қай бетті бірінші ашарыңды білмей, дал боласың. «Проза», «Поэзия», «Эссе», «Үздік үлгі», «Тәржіме», «Сын», «Тарихи эссе» және «Кино» айдарымен түйінделетін журналдың талғамы биік секілді. Және бүгінгі қоғамда орын алып жатқан мәдени, әдеби оқиғалардың журнал материалдарында кездесуі басылым кеңістігінің ауқымды екенін байқатқандай.
«Адамның қандай екенін жанарына қарап ұғасың» деген тәмсілді әдеби журналға әкелетін болсақ, «Адырнаның» қаншалықты өз атына (әдеби журнал) сай еңбек етіп жатқанын мазмұнынан-ақ аңғардық. Не оқимын десеңіз, өз еркіңіз! Көркем шығарма мен өлеңнен өзге эссе, аударма, сыни мақала, кино… әдеби басылымға керектінің бәрі бар. Тек, журнал атына келіп түскен оқырман хаттарына бір айдар арнаса, толысқан үстіне толысар еді. Және жарияланар авторлар мен шығармаларды қайталамауға тырысу керектігін «Адырнаға» да айтамыз. Әдеби басылымдар бірін-бірі бақылап, қадағалап отырмаса, бәсекелестік қайдан пайда болсын? Ал бәсекелестік болмаған жерде жүзден жүйріктің шығарына сенімімізден күмәніміз басым. Дүбірге енді қосылып жатқан «Адырна» келешекте көп оқырманның іздеп жүріп оқитын журналына айналары бек мүмкін.
ІV. Талайдың тұсауын кескен қарт «Жұлдыз»
«Жұлдыз» журналына қарап түрлі авторлардың шығармалары жинақталған кітапты сүйсіне оқып отырғандай күй кештік. Ойымыз кенеттен селк етті: кітап емес, журнал екен ғой… Әдеби басылымдардың «ақсақалы» атанып жүрген «Жұлдыз» журналына қатысты жүрекпен сезіп, көңілге түйген бірді-екілі жағымды, жағымсыз пікірімізді іркіп қала алмадық.
Соңғы шыққан №3 нөмірдегі 208 беттің 184 беті проза мен поэзияға арналыпты. Ал қалған
18 бетін «Өнер» айдарындағы Нәзира Байырбектің «Нұржамал» атты эссесі құраса, 3 беті Рафаэль Ниязбектің «Тауқымет» романы талданған әдеби мақалаға беріліп, соңғы екі жарым бетіне Әлихан Бөкейханның аудармаларына үстіртін шолу мақаласы («мақала» деуге де келмес) жарияланыпты. Осыдан соң журналдың ширек ғасыр бұрынғы нөміріне (№4, 1991 жыл) көз жүгірттік. Ондағы мазмұн ерек, талғам бөлек: 100 беті көркем шығармалар һәм өлең-поэмалармен толықтырылса, арғы жағындағы 100 беті әдеби естеліктерге, очерк және публицистикаға, өнерге, сыни мақалаларға, тарихи тұлғаларға, сықақ әңгімелерге және редакцияға келіп түскен хаттарға арналған. Кез келген ойы ұшқыр оқырман аталған сандардағы айырмашылықты һәм кемшілікті бірден байқаған болар. Ендігі бізді қызықтырған мәселе – журналдың жартысынан көбін алып жатқан проза мен поэзияға деген редакцияның талғам-таразысы. Жыл басталғалы бір ғана Тұрысбек Сәукетайдың «Мен – жындымын» романы әр санға бөлініп жарияланып келді. Ал прозаның қалған бөлігін өзге авторлардың әңгіме-хикаяттары құрап тұр. Мазмұндағы көркем шығармалардың бәріне сөз арнай алмағанымызбен, №1 нөмірге шыққан Толымбек Әбдірайымның «Тағдыр сыйынан» алдында бұл әңгіме де Қазақ әдебиеті» газетінде жарық көрген болатын. «Жамбыл» журналы Шерхан Мұртаза жөніндегі мақаланы редакцияның рұқсатымен жарияласа, Т.Әбдірайым бір әңгімесін екі бірдей әдеби басылымға ұсынуы көңілге сиымсыз. Тегінде, бұл осы күні көптеген автордың жағымсыз әдетіне айналып барады.
«Қамшының сабындай қысқа болғанымен өрі мен еңісі, бұралаңы мен бұлтарысы көп фәни жалғанда жайбарақат ғұмыр кешу мүмкін емес-ау!..». Әңгіменің дәл осылай басталғанынан мазмұнының трагедиялы өмірдің оқиғаларына құрылғандығын ішіміз сезгендей болды. Шығармада шұбалып жүрген кейіпкер жоқ: оқиға төрт адамның арасында өрбиді (Алтынай, Берікқан, Ақшабақ, Күлтай). Автор әңгіме басында Алтынайды негізгі кейіпкер ретінде көрсетсе, ортасында Ақшабақты, соңында Берікқанды басты назарға алады. Ал оқиға басындағы басты кейіпкеріміз Алтынай – типтік бейне. Яғни ол қоғамдағы жалғызбасты қыздардың автор көркемдігіндегі образы. Әңгіме басында Алтынайдың дәрігермен диалогы беріледі. Мұның шығарманың әдеби кіріспесі екенін ізін ала кейінге шегініс жасауынан аңғардық. Автор көркем шығармасының идеясын әңгімелеп отырып, білдіріп қоятындай: «Қызмет, мансап әйел затына қуаныш сыйламайтындығын бағамдады». Әңгімеде мифтік сарынның бір белгісін Алтынай мен Әзәзіл арасындағы диалогта сәтті қолданған. Әзәзіл мен адамның ортасында дискурс жүргізуде көп қаламгерлердің жолы бола бермейді. Ал мұнда шынайы бейнеленген. Жалпы, автор өз ойын жеткізерде көбіне диалогқа арқа сүйейтінін аңғардық. Дәрігер мен Алтынайдың, Әзәзіл мен Алтынайдың, имам мен Ақшабақтың және Бекең мен Ақшабақтың, Ақшабақ пен Күлтайдың екеуара әңгімесін автор тақырыпты ашудың жалғыз жолы есебінде қабылдаған іспетті. Аталған шығармада жағымсыз кейіпкер жоқ. Таңғалмаңыз, расымен солай. Әйелінің көзіне шөп салып жүрген Бекеңнің өзін автор тым жаман адам қылып көрсетпейді («Берікқан Аллаға сенетін. Қазір де қасиетті Құрандағы беташар сүрені оқып отырған»). Және бір сәтті сюжет Күлтайдың құрбысымен диалог арасында Мұқағалидың өлеңін оқуы. Жалпы, шығармаларда поэзияның кездесуі сирек кездесетін құбылыс. Автордың кейіпкерінің аузына салған мына бір сөзіне «Күйеуің неге сенің ғана меншігің болуы тиіс. Не деген іштарлық? Сонда ана бейшара қыз тізесін құшақтап, өмірден байсыз өтуі тиіс пе? Ол сенің күйеуіңнің перзентін жарық дүниеге әкелмей ме?! Ана болу бақытына ие болуға оның да моральдық құқығы бар шығар», келісер-келіспесімізді білмей, екіұдай сезімде болдық. Бәлкім, бұл ойдың да жаны бар шығар. Бүгінгі қоғамдағы жалғызбасты әйелдердің көбейіп бара жатқанынан хабарымыз жоқ емес. Бірақ біздің автордың әлгіндегі ойын қазіргі қоғамның жатсынатыны тағы анық. Әлқисса… Мұнда ескі сүрлеуге бағынған баяндау жоқ: айтар ойын тиянақтап болған кезде оқиға орнын ауыстырып отырады. Бұл оқырманды жалықтырып алмаудың амалы болса керек. Айтпақшы, әңгіме ішінде радиодан «Тағдыр сыйы» деген ән шырқалады. Сол ән мен шығарма атауының ұқсастығын жазушының өзіндік тәсіліне баладық. Содан не керек, әңгіменің соңына жете алмай, тыпыршып отырған сәтте шығарма шорт кесіледі. Берікқан іссапардан келсе, некелі жары мен сүйген қызы өз шаңырағында отыр екен. Мәз-мейрам. Осылайша әңгіме көңілді нотада аяқталады. Нүктесінің қайда екенін іздеп, аласұрып біз қалдық… Ойыма келген ең бірінші сөз «түсі шығар…» дедім… Автордың оқиғаны бұлай түйіндеуінің сырын түсінбедік. Бәлкім, Ақшабақ имамның әңгімесінен кейін ойын күрт өзгертті ме екен? Бірақ мұндай сюжеттер жоқ. Біздіңше, автор шығарма нүктесін әр оқырманның өз еркіне қалдырып тұрғандай… Тағы бір пайымым: әңгіменің жалғасы бар. Егер осы аталған болжамымыз автордың (Толымбек Әбдірайымның) назарына іліксе, үнсіз қалмаса екен дейміз.
Ендігі сөзді журналдың №3 санына «Сөз сәулесі» айдарымен шыққан Темірбай Мұқашевтың «Қайраткер кешкен тауқымет» атты әдеби-көркем мақаласы хақында өрбітсек. Рафаэль Ниязбектің «Тауқымет» романы жайында жазылған бұл мақаланы журналдың осы жылғы жаңалығына балар едім. Автор роман желісін судыратып мазмұндап отырмай, нақты талдау жасауды жөн көріпті. Және шығарманың астарын оқырманға жеткізумен қатар, тарихи романдарға тоқталып, тарихи тақырыпқа қалам сілтеп жүрген жазушыларға құлаққағыс ретінде өз ойын да жасырмады. Романдағы оқиғаларды өз оқырмандық түйсігінше тарқата келе, сыни көзқарасын да білдіріп қалды («Олай болса «Асқаров сотына» тереңірек тоқталып, кеңірек суреттегенде романның тарихи салмағы еселеп артып, оқырман Асанбайдың тоталитарлық жүйені күйрете жеңіп, әділеттің салтанат құрған сәтін ерекше тебіреніспен қабылдар еді. Автор осы жағына мән бермеген»). Журнал мазмұнында осы тектес нақты, әрі әдеби үдерістің қозғалысын сездіретін мақалалар көбірек жарияланса, көпшіліктің басылымға деген бүгінгі көзқарасы сәл де болса өзгерер ме еді…
Мақтаудың шығармашылық адамына әркез пайдасы тие бермесе керек. Жөнімен айтылса, кім, кім туралы не айтса да келісе кететініміз тағы бар. Жалпы, мақталар кісі мен мақтайтын «мейірімді» адам өз мақтауының орнын білсе екен дейміз. Бұл тақырыптың тиегін бекерге ағытып отырған жоқпыз. Сөзімізге журналдың №1 нөмірінде «Мерей» айдарымен жарияланған Сырымбет Кәрімұлының «Құс қанатында» атты мақаласы сеп болып отыр. Мақала қаламгер Қайсар Әлімнің шығармашылығы туралы. Шығармашылығы деймін-ау… әсте олай емес. Жазушы әңгімелерінің мазмұнын һәм кімге арналғанын жаңылмай, айтып шыққаны болмаса, әдеби талдауды, яки бір сыни пікірді кезіктіре алмадық. Мақала «Қайсекең екеуміз де Торғайдағы әйгілі Сарықопаның бойында туып-өстігінен» басталып, қаламгермен алыс туыстығы бар екенін және бала кездерінде қалай ойнап-күлгендерін, болашақ жазушыға үйіндегілердің айтқан жылы тілектерімен жалғасады. Одан әрі мақтаулы сөйлемдер бұршақша жауып, көз аштырмады («Мүйізі қарағайдай республикалық басылымдар да Қайсекеңсіз шықпайтын болды»). Содан не керек, «Мәңгілік шер» хикаятының, «Аңсау», «Қара кемпір» әңгімелерінің құр мазмұнын баяндай келе, Тұрысбек Сәукетайдың шығармалары хақында айтқан ыстық лебіздеріне кезек берді. «Қайсар Әлімнің айлығы мен қайда туып, кіммен ойнағанының бізге керегі не? Әңгімелерінің астарына үңіліп көрсе, қане?» деп мазасызданып отырсақ та, мақаланың соңы немен аяқталарын білгіміз келді. Күткеніміз де көп кешіккен жоқ: Қайсар Әлімнің жазушы ғана емес, «Меккеге барып, қасиетті Қағбаны тәу етіп қайтқан, бес мезгіл намаз оқып, жан-жүрегімен иманға ұйыған – қажы» екенінен хабардар болдық. Ащы күлкі езуімізге еріксіз жиылды. Редакция ұжымына айтарымыз: әлгіндегідей әдеби-көркемдіктен ада мақалалар «Жұлдыздың» мерейін төмендетпесе, ешқашан өсірмейді.
«Үркерге» айтылған сын мұнда да қайталанбақ: №1 сандағы Айгүл Ісмақованың «Қазақтың ұлы көшін суреттеген роман» атты әдеби-сыни мақаласы жалғыз өзі осы жылдықтың «әдеби сын» айдарының салмағын ұстап тұр. Әр шыққан нөмір арасында әдеби байланыс жоқ. Өткен санда жарияланған әңгімелер һәм мақалаларға келесі санда пікір шығып тұрса, журналдың өн бойында әдеби қозғалыстың бар екені білінер еді. Мәселен, жоғарыда айтып өткен мақаладағы Рафаэль Ниязбектің романын («Тауқымет») аталған мақалаға дейін немесе кейін жариялап жіберсе, сәтімен болмақ. №3 нөмірдегі «Арулар жырлайды» айдарымен берілген бір топ жас ақындарға тоқталмасқа болмайтындай. Осы орайда мына бір оқиға есіме түсіп отыр:
Жұмекен (Нәжімеденов) «Жұлдыздың» бас редакторы Тахауи Ахтановқа:
– Таха! Менің мектептес бір жолдасым роман жазыпты. Маған оқып берші дейді. Поэзия болса, бірсәрі. Прозаға мен не дей аламын? Сіз қарап, әділін айтыңызшы, – дейді.
Романды оқып болған соң, Тахауи:
– Мына романды жазған адам кім? Осы арада тұра ма өзі? Елде болса шақыр! «Жұлдызға» жариялаймыз! – десе, Жұмекен:
– Шақыртып керегі жоқ!
– Неге?
– Ол адам алдыңызда тұр!
Кейін бір Жұмекенді көргенде Тахауи:
– Әй, Жұмекен, жолдастарыңның біреуі случайно жаңа роман жазып бітірген жоқ па? – деген екен. Мұны еске алып отырған себебім, сол уақыттарда «Жұлдызға» жариялану – көп ақын-жазушылар қолын созса, жете бермейтін биіктік болатын. Және «Жұлдызға» әңгімесі, я өлеңі шыққандарды халық танып, әдеби орта мойындайтын. Өйткені, олар соған лайық еді. Және редакция ұжымы да әр авторға талғаммен һәм жауапкершілікпен қарайтын. Жоғарыда айтқан жас ақын қыздардың тізіміне, өлеңіне қарап отырып, сол биіктіктің аласарып қалғанын сезгендейміз.
Журналға басылып жатқан әңгіме-хикаяттар мен өлең-мақалалардың бәрі дерлік алғаш жарияланып отырғандар дей алмаймыз. Әдеби газеттер мен сайттарда немесе өзге де әдеби журналдарда шығып жүрген материалдар. Бұл тұрғыда «Жұлдызға» ғана кінә артқанымыз әділетсіз. Неге десеңіз, бұл қазіргі барлық әдеби басылымдарға тән дерт. Десек те, журналдың №3 санындағы «Жаңа әңгімелер» топтамасымен берілген Әнес Сарайдың бір топ шығармалары суыған көңілімізді жылытқандай болды. Тек, әңгімелерін берерде бас жағына редакцияның автор шығармаларына қатысты ой-пікірі жетіспейтіндей.
Жоғарыда келтірілген әр ойды өз дәйегімен айтуға тырыстық. Салмақсыз сөйлемеуге талпындық. Сенімсіз сөз бағыттауға «Жұлдыздың» «киесінен» қорықтық. Сонда да «талайдың тұсауын кескен қарт «Жұлдыз» бүгінде қай болашақ классиктің, болмаса лириктің тұсауын кесіп жүр екен?» деген мазалы ой санамыздан кетпей, тұрып алды.
Қазақ әдебиетінің бір қабырғасына айналған журналдардың бүгінгі ахуалы һәм болашағы сөз түсінер әр оқырманды алаңдатады. Және бұл шолу мақаланы біреуді сынап, яки мінеу үшін жазып отырған жоқпыз. Мұны жаңағы айтқан «алаңдаудан» туған бұлқыныс деп қабылдарсыздар. «Саудада достық жоқ» деуші ме еді? Әдебиетте де оның болмағаны жөн.
Маржан Әбіш.