Түркістан облыстық «Фараб» әмбебап ғылыми кітапханасы көктемнің шуағымен қатар келген мереке қарсаңында ерекше әдеби кеш ұйымдастырды. «Түнгі кітапхана» жобасы аясында өткен «Сіз күткен көктем…» ат­ты поэзия кеші көктемнің сұлулығын, нәзіктігін және жаңаруын жырлайтын кеш болды.

Іс-шараға зиялы қауым өкілдері, жас ақындар мен өнерсүйер қауым қатысты. Сонымен қатар әдеби кештің негізгі ерекшелігі – өнер көрсеткен қатысушылардың қатарында кітапханашы жастар мен белсенді оқырмандардың болуы. Бұл кеш кітапхана оқырмандары мен шығармашылық жастарға шабыт сыйлап, өз өнерін көрсетуге үлкен мүмкіндік берді.
Поэзия кешінің мақсаты – ұлт­тық әдебиет­ті дәріптеу, жас қаламгерлерді қолдау және көктемнің көркемдігін өлеңмен өрнектеу. Кеш барысында танымал ақындардың өлеңдері оқылып, жас талант­тардың туындылары тыңдалды.
Бұл шара – «Фараб» кітапханасының мәдени-ағартушылық бағыт­тағы жұмыстарын жандандыруға, оқырмандармен тығыз байланыс орнатуға және шығармашылық орта қалыптастыруға арналған бастамаларының бірі.
Кеш барысында тақырыптық кітап көрмесі және көрме-инсталляция келушілер назарына ұсынылды. Қыз баласының кішкентайынан бастап, ана болғанына де­йінгі көрініс келушілердің көңілінен шықты. Кешке келген ару қыздарға арнайы мерекелік сыйлық ұсынылып, ақындар өз өлеңдерін оқыды.
Поэзия кешіне Қырғыз елінен келген қонақтар да қатысып, қазақ өнеріне тәнті болғандарын жасырмады. Қырғыз ақындарының өлеңдерін оқып, кештің әсерлі өтуіне өз үлестерін қосты.

Айдар Сейдәзім