Көркем шығарма және мәңгілік
Құдайдың шексіз құдіретін айғақтайтын өлшем – өміршеңдігі мен өмірге аса жақындығын түсіну құбылысқа бара-бар ұғым. Өмірге жақын дүние ешқашан ескірмейді, ешқашан естен шықпайды, ешқашан елеске айналмақ емес. Күдік пен үмітті, күпірлік пен турашылдықты бірде досы, ал кей-кейде дұспаны ретінде таныған адамзат ұғымындағы Мәңгілік атты мән осы шығар-ау, шамасы. Бірақ кім білсін?! Сағат тілі 00.00 мен 00.00 аралығында ғана арлы-берлі жылжығанымен, Мәңгілік деген «фазаны» көрсете алмасы анық.
Техника, яғни материя дәрменсіз күйге түскен тұста, өнер, оның ішінде «Сөз өнері» өз хал-қадерінше Жаратушы сырына бойлап, көп көзінен жасырынған құпияны ашуға талпынбақ. Мәңгілікті таразы деп алсақ, бір басында талғам мен көркемдік, ал екіншісінде ұшқырлық пен ортақол шығармалар тұрары даусыз. Дегенмен, әлгі таразының әр кезеңде, әр заманда, әр дәуірде, әр ғасырда жел соққанда билей жөнелетін жапырақтай тұрақсыздау болғаны тағы шындық. Ұлы шығарма мен Ұлы әдебиет Уақыттан да биік, Уақыттан да қадірлі. Себебі, оның көркемдік құндылығын терең түйсінген оқырман жадында шектеулі өлшем емес. Өмір мен Өнер, Ой мен Образ қалып, бір сәтке «Бүкіләлемдік тартылыс заңы» жойылғандай әсерде боларыңыз анық. Әдебиеттің кереметі осында ғой. Құрлық пен құрлықты, ұлт пен ұлысты, Ғаламшар мен жұлдызды, тозаң мен сәулені, жүрек пен сезімді, Алла мен адамды жақындастыратын күші бардай көрінеді. Осы ретте «Көркем шығарма және мәңгілік» тақырыбында «Дөңгелек үстел» ұйымдастырып, қаламгерлерге сұрақ жолдаған ек.
Ғазизбек ТӘШІМБАЙ,
жазушы, публицист
ӨМІРДЕ ӘДЕБИЕТ ҚАНА МӘҢГІЛІК!..
Біз әдетте мәңгілік ешнәрсе жоқ, бәрі өтеді, бәрі өзгереді деп жатамыз. Философтар көбіне осылай дейді. «Елу жылда – ел жаңа, жүз жылда – қазан» дейміз. Иә, ұлы Абай айтқандай, «Заман соққан жел, дүние шалқар көл». Заман өзгереді, ұрпақ ауысады.
Әлем тарихында талай империялар болғанын білеміз. Мысалы, сонау Рим империясын, Шыңғыс хан империясын, Осман империясын, кешегі Кеңестер Одағын алайық. Солардың біреуі де мәңгілік болып қала алған жоқ. Біреулері ұзақ өмір сүрді, екіншілерінің ғұмыры қысқа болды. Оның есесіне олар жайында жазылған көркем туындылар ғана мәңгілік болып қалды.
Бір ғана мысал. Әлемді тітіреткен ұлы қаған Шыңғыс хан жайлы жазылған шығармаларда есеп жоқ. В.Ян, И.Калашниковтарды былай қойғанда, біздің классик жазушымыз Мұхтар Мағауин төрт том арнады.
Адамзаттың бағына туған орыстың ұлы ақындары мен жазушылары Александр Пушкин мен Михаил Лермонтовтың, Лев Толстой мен Иван Тургеневтің, Николай Гоголь мен Антон Чеховтың, қазақтың Ұлы Даласы өмірге әкелген атақты жыраулардың, сал-серілер Ақан мен Біржанның, күні кешегі Сүйінбай мен Махамбеттің, Абай мен Жамбылдың, Мағжан мен Сәкеннің, Ілияс пен Бейімбеттің, Ахмет пен Мұхтардың, Сұлтанмахмұт пен Сәбиттің, Ғабит пен Ғабиденнің, Қасым мен Мұқағалидың шығармалары тарихтың төрінен орын алып, мәңгілікке жайғасты. Өйткені, бұлар өздері өмір сүрген дәуір мен кезеңдердің шындығын көркем тілмен кестелей білді. Сондықтан да олар мәңгілік! Өмірден қанша ұрпақ ауысса да, қаншама ғасырлар өтсе де ұмытылмай бірден бірге көшіп, тарих керуеніне ілесіп келеді!
Әдебиеттің мәңгілік екеніне бір мысал. Уильям Шекспирдің «Гамлеті» бес ғасырдан бері, ал Николай Гогольдің «Ревизоры» екі ғасыр бойы әлем театрларының сахналарынан түспей келеді! Бұл не деген құдірет?! Өйткені, осынау екі алып тұлға кезінде көтерген мәселе – жемқорлық пен жағымпаздық, арамдық пен аярлық, зұлымдық, пен залымдық, жарамсақтық пен жалақорлық, топастық пен тоңмойындық қай дәуірде де адамзат өмірінің бөлінбес бір бөлшегі болып келеді. Мұндай мерездер қай қоғамда болса да адам баласы бар жерде ылғи да белең алып отыратын құбылыс. Бәлкім, әйтеуір бір замандарда мұның да емі табылатын болар. Ал әзірше адамзаттың ұлы ойшылдары мен ғұламалары бұған жауап таба қойған жоқ. Бітіспес күрес жүріп жатыр.
Александр Пушкиннің «Ескерткіш орнаттым мен қолдан келмес, ел ізі оған деген суи білмес» деп көрегендік жасауының өзі не тұрады! Ал ұлы Абай: «Өлсе өлер табиғат, адам өлмес, бірақ та ол қайтып келіп ойнап күлмес» демеп пе еді?! Сондағы ұлылардың мегзегені өздері қалдырған мұралардың мәңгі өміршеңдігі дер едік. Сондықтан да ақиық ақынымыз Мұқағали Мақатаев: «Өлсе өлер Мұқағали Мақатаев, бірақ та өлтіре алмас өлеңді ешкім!» деп жырлап кетпеді ме?
Айтса айтқандай, Пушкин мен Лермонтовтың Абай аударған өлеңдерін алып қараңыздаршы. Қандай керемет! Немістің ұлы ақыны Гетеден Лермонтов аударған «Горные вершины» деп аталатын екі-ақ шумақтан тұратын жыр жауһарын Абай қалай қазақшалады десеңізші! «Қараңғы түнде тау қалғып»!
Осы өлеңнің орыс және қазақ тілдеріндегі нұсқаларын салыстырып көрелікші:
Лермонтов:
«Горные вершины
Спять во тьме ночной.
Тихие долины,
Полны свежей мглой.
Не пылит дорога,
Не дрожат листы.
Подожди немного,
Отдохнешь и ты».
Абай:
«Қараңғы түнде тау қалғып,
Ұйқыға кетер балбырап.
Даланы жым-жырт дел-сал ғып,
Түн басады салбырап.
Шаң шығармас жол-дағы
Сыбдырламас жапырақ.
Тыншығарсың сен-дағы,
Сабыр етсең азырақ».
Егер де осы бір жыр жауһарын неміс Гете жазғанын, оны орыс Лермонтов аударғанын, одан Абай қазақша сөйлеткенін білмеген жан бұл жолдарды кім жазғанын дөп басып айта алмас еді. Осынау екі ғана шумақ талай дастанның жүгін көтеріп тұрғандай! Ұлы туындылардың өміршең болатынын осы бір шағын мысалдан-ақ байқаймыз.
Әлем әдебиетінің классиктері Марк Твеннің, Виктор Гюгоның, Иоганн Гетенің, Александр Дюманың, Эрнест Хэмингуейдің, Мұхтар Әуезовтің, Шыңғыс Айтматовтың, тағы басқалардың орны бөлек. Олардың шығармалары мәңгі жасайтын туындылар. Бұдан біз әдебиеттің мәңгілігін көреміз.
Нарбин КЕНЖЕҒҰЛОВА, журналист, аудармашы, жазушы
Шынайы да көркем…
Әлем әдебиетінде де, соның ішінде қазақ әдебиетінде де мәңгі өмір сүретін шығармалар бар ма? деген сұрақ туындауы әбден мүмкін. Әрине, сөзсіз ондай шығармалар баршылық. Егер де әлемдік деңгейдегі туындыларды алатын болсақ, мәңгілік шығармалар қатарында Шекспирдің, Абайдың шығармаларын алуға болады. Біріншіден, бұл авторлардың туындылары мәңгілік, себебі, олар әр қоғамда да өзекті, адамзат тағдырының әр дәуірінде де өміршең мәселелердің жүгін көтеруде, екіншіден, олар шынайы да көркем шығармалар. Мәңгілік шығармалар қатарында діни мазмұндағы кітптарды да қарастыруға болады. Гегельдың айтуынша, діни әдебиеттерде ежелгі заманда өмір сүрген адамдардың жан-жақты білімдері жинақталған. Ал білімге сусындау – алға, болашаққа қарыштап жүріп, прогрессивті түрде даму үшін өте қажет нәрсе. Мысалы, Индия елінің «Махабхарата », «Рамаяна» атты діни кітаптарында бірнеше мыңжылдықтар бұрын болып өткен оқиғалар бейнеленген, бұл кітаптар сол халық үшін мәңгілік шығармалар. Сонымен қатар, оларда міндетті түрде көркем шындық бар. Заманауи ғалымдардың пікіріне сүйенсек, «Махабхаратада» ежелгі индиялықтардың ұшатын аппарат-тары -вимандар қазіргі реактивтік ұшақтарға ұқсайды…
Ал өзіміздің отандық әдеби туындыларына жүгінсек, халқымыздың бетке ұстар, маңдайалды шығармаларының бәрі де, «Абай жолынан» бастап, көркем шындықтың арқасында «мәңгілік» деген мәртебеге ие бола алады.
Меніңше, көркем шындықтың бірнеше критерийлері, бірнеше сипаттары бар. Оларда, біріншіден, типтік образдар сомдалуы шарт . Мысалы, әр халықтың, ал нақтырақ алсақ, этностың тек өзіне ғана тән типтік образы бар. Нағыз француздың образын Ромен Роллан өзінің «Кола Брюньон» атты шағын ғана шығармасында сомдаған, ал нағыз қазақтың образын өмірден ерте кеткен өте талантты жазушы Ақан Нұрманов «Құланның ажалы» атты Құланның образында бейнелеген. Бір қызығы, көптеген жазушылар, олардың ішінде ұлы классиктеріміз де бар, нағыз қазақтың образын сондай сұңғылалықпен, сондай көрегендікпен, жан-жақты сипаттау арқылы бұрынды-соңды бере алмаған сияқты. Мүмкін, мен субъективті пікір айтып отырған болармын, бірақ көркем шындық пен мәңгілік шығарманың астасатын жері – тек қана шынайы, бірде- бір жалған жасушасы жоқ, жақсы мен жаманның тепе-теңдігі сақталған типтік образды сомдай білу. Сонымен қатар,нағыз талантты қаламгер тілдік, мәтіндік, композициялық әдіс-тәсілдерді толық меңгеріп, интуициялық шабыт пен шынайы сезімнің табиғи жағдайда ұштасқан тылсым нүктесінде ғана мәңгілік шығарманы дүниеге әкеле алады.
Заманауи оқырмандардың кітап оқуға құлықтары жоқ. Оған себеп – Интернет пен жаңа медиа туындыларының әсері. Сондықтан да шағын кітаптар, қысқа әдеби туындылар адамзат өркениетінің өмірінде елеулі орын ала бастады. Бірақ олардың өз кемшіліктері де баршылық. Мәселен, атышулы Пабло Коэльенің шығармаларын алайық. Көптеген оқырмандар бұл автордың «жиендік» жасайтынын біле бермеуі де мүмкін. Ол өзінің «Алхимик» атты кітабында американдық фантаст жазушы Урсула Легуинның «Волшебник из Земноморья» атты романынан идеяларды, үзінділерді алып «жиендік» жасаған, сол шығармадан атышулы «Гарри Поттердің» де авторы «Сиқыршылар мектебінің» сипаттамасын көшірген.
Бұл әлемдік әдебиет саласында болып жатқан жағдай. Өзіміздің отандық әдебиетте бұндай жағдайлар болмайтынына сенімді болып, шынайы көркемдігі жоғары, мәңгілік шығармалардың келешекте көптеп дүниеге келетініне сенімді болайық, ағайын!
Темірғали КӨПБАЙ,
ақын, Халықаралық «Алаш» әдеби сыйлығының иегері
КӨРКЕМДІКТІҢ МӘҢГІЛІГІ
«МӘҢГІЛІК» ұғымы көркем шығарманы ғана емес, жаратылыс атаулыны түгел қамтитындықтан ең әуелі оның адам санасындағы нақты көрінісін айқындап алу керек. Неміс философы Эммануиль Кант өз кезінде мәңгілік туралы: «Санадан биік «шексіз» ұғымды ақылмен айқындап, сөзбен жеткізуге бола ма?» деген сұрақ қойған еді. Мәңгілік сөзінің анықтамасын біз әдетте философиялық, теологиялық, теософиялық зерттеулерден жиі ұшырастырамыз. Біреулер оны шексіздікке баласа, тағы бір ойшылдар ешқашан бітпейтін тіршіліктің күйбеңіне теңейтіні де рас. Қасиетті кітаптар мен діни әдебиеттердегі Ғалам мен Жаратушының мәңгілік сипаты туралы интерпретациялық талпыныстар өз алдына бір әлем. Қысқасын айтқанда, мәңгілік ұғымын адам баласы өз ақыл-ойының шегінен тысқары тылсым дүние деп есептейді. Жалпыға ортақ бұл көзқараспен келіспейтіндер ғұламалар мен ақын-жазушылар, классикалық музыка мен қылқалам шеберлері ғана. Өйткені, олар өз туындыларының бірнеше ғасырды көктей өтетініне сенеді. Ондай сенім болмаса ғылымға, әдебиетке, өнерге келудің де қажеті шамалы.
Қадым заманнан бері көркем туындының мәңгілік сипаты туралы айтылмаған сөз қалған жоқ. Бұл жаңа тақырып емес. Солай десек те, ұлы уақыттың тезінен сүрінбей өтіп, ұрпақтан ұрпаққа мирас болып келе жатқан әдебиет жауһарлары өзі үшін өзі жауап береді. Адам өледі, Адамзат өлмейді. Ақын өледі, поэзия мәңгілік!
Уақыт пен Кеңістіктегі қозғалыстың мәнін дәл таныған ұлы тұлғалар мәңгілік сырын мағыналы іс-әрекеттерден, даналық сөздерден, ойшылдықтан іздеген дер едім. Ойлы дүние ғана мәңгілікке жол алады. Осы күнге дейін жеткен көне жәдігерлердің бәрі де бұл ойымызды растай түседі. В.Белинскийдің «Ойсыз сөз – жансыз тән» дейтін қанатты сөзі бекер айтылмаған. Демек, мәңгіліктің жолына ат қосатын нәрсе – ойлы шығарма. Меніңше, кез келген шығармашыл тұлғаның ең негізгі міндеті (миссиясы) – келешекке ойлы, мінсіз мұра қалдыру. Мінсіз мұра – бұл дара таланттардың ғана маңдайына жазылар бақ екенін мойындауымыз керек. Мұраты биік өлең ақынды өлтірмейді. Мысал үшін, Абайдың кезінде кімдер өмір сүрмеді? Мыңдап мал өргізген байлар, шіренген шонжарлар, азуын айға білеген аға сұлтандар. Бүгін солардың бірі жоқ, Абай бар. Мұқағалидың тұсында кергіп жүрген министрлер, бір өзін жарты патша, жарты құдай санаған обкомдардың бірінші хатшылары аз болды ма? Солар қайда кетті? Бірі жоқ, Мұқағали бар. Абай мен Мұқағали мұрасы уақыт өткен сайын халық санасында жаңа қырынан жарқырай береді. Міне, шынайы өнер құдіреті деген осы! Мәңгіліктің еншісіне айналған мінсіз мұра деген де осы!
Кез келген талантты ақынның жауһар жырлары халықтың қазынасына айналады. Демек ол халықтық мұраны байытады. Халықтың ақын-жазушыларды ерекше қастерлейтіні де сондықтан. Халық өз кезегінде сүйікті перзенттерін аспанға көтереді, даңққа бөлейді. Реті келсе, құрмет көрсетеді. Сөз зергерлерінің мұрасын көзінің қарашығындай қастерлеп, ұрпақтан-ұрпаққа жеткізуге қызмет етеді. Халықтың жүрегінен орын алған көркем туынды өз авторының өмірден өткеніне қарамай, сол халықпен бірге жасай береді. Көркем шығарманың өміршеңдігі мен мәңгілік сипаты халықтың ыстық ілтипатымен астасып жатады.
Әзірлеген
Әлібек БАЙБОЛ.
ПІКІРЛЕР18