Ғұмыры ғибратқа толы
02.12.2016
868
0

ҚР Ұлттық Ғылым академиясының президенті, химия ғылымының докторы, профессор, академик, қоғам қайраткері, ҚР Мемлекеттік сыйлығының лауреаты,  Д.В.Сокольский атындағы «Органикалық анализ және электрохимия» институтының бас дирек­торы Мұрат Жұрынов мерейлі 75 жасқа толып отыр. Ол 1941 жылдың 7 желтоқсанында Оңтүстік Қазақстан облысындағы кейінірек қала атанған Арыс елді мекенінде жұмысшы отбасында дүниеге келген. Мектепті бітірісімен ол Қазақ химия-технология институтына оқуға түсіп, оны 1984 жылы инженер-техник мамандығы бойынша үздік аяқтап, сол институттың «Электрохимиялық өндіріс технологиясы» кафедрасында екі жылдай оқытушы болып жұмыс істеді. 1967 жылы Мәскеудегі Д.И.Менделеев атындағы химия-технология институтының аспирантурасында оқып, 1970 жылдың қаңтар айында кандидаттық диссертациясын сәтті қорғап шықты. 1981 жылы қаңтарда сол Мәскеуде докторлық диссертациясын да қорғады.

Мұқаң мектепте оқып жүр­генде-ақ өзінің дарын­дылы­ғымен мұғалімдердің назарына ілікті. «Мен өзім де ауылдағы мектепті бітірдім. Орыс тілінен беретін мұғалімінде жоғары білімі жоқ, бірақ армиядан орыс тілін үйреніп келген, мінезі, балаларға, тәрбиеге деген көзқа­расы керемет өте жақсы кісі еді. Неміс тілінен сабақ берген ағай­дың неміс тілінен білетіні 20-30 сөз бен сөз тіркесі ғана еді. Сон­дай мектепте оқысақ та біз­дің ұрпақтың білімге деген құш­тарлығы зор еді» деген еді ғалым бір әңгімесінде. Жас өрен өзінің алғырлығы мен талпынысы арқасында ана тілі қазақ тілімен қоса, орыс тілін де жетік меңге­ріп, Мәскеудегі үш жылдық ас­пи­рантураны аяқтауға екі ай қалғанда мерзімінен бұрын түлен тереңдеп бойлай қоймаған тың да өте күрделі тақырыптағы кандидаттық диссертациясын қорғапты. Ондағы өзі істейтін зертханада бұрын ондай жағдай болмаған екен. Кейін таман Мұқаң неміс, түрік тілдерін де үйреніп, көп тілді меңгерген ғалым атанды.
1970 жылдан мол, құнды еңбектер беріп келген академик Мұрат Жұрыновтың ғылым саласындағы басып өткен жолы өрелі де өнегелі. Ол – Қаза­қ­-
с­тан­дағы электрохимиялық ғы­лымның ең басты жетекші ға­лымы. Отандық және шетел­дік басылымда шыққан оның зерт­теуімен 600-ден астам ғы­лыми еңбегі, соның ішінде 17 мо­но­графиясы, 120 авторлық куәлігі мен патенті жарық көрді. Ол сондай-ақ, 92 өнертабыстың (изобретение) авторы болды. Академик сондай-ақ «Квантовая электрохимия алкалоидов» (1986), «Химия эфедриновых алкалоидов» (1990), «Новые фос­форпроизводные эфедриновых алкалоидов» (1992), «Новые биоактивные производные алкалоидов» (1992), «Технология производства мышьяка» (1993) монографияларының  да авто­ры­­ның бірі. Оның ғылыми атағы мен беделі Қазақстан Республи­ка­сынан тысқары да кеңінен та­рап, шетелге де танымал қазақ ғалымы атанды. Қомақты зерттеулер жүргізіп, ірі жаңалықтар ашып, елеулі еңбектер бітірген еңселі ғалым өзінің іркіліссіз ізденіс, талмас талпынысымен осындай шоқтығы биік жетіс­тікке жетті.
Мұрат Жұрыновтың негізгі ғылыми жұмыстарының бағы­ты­на табиғи қатынастардан би­оло­гиялық активті заттарды электрмен синтездеп алу жатады. Оның ғылыми зерттеулері органикалық қосылыстардың әр түрлі кластарының электро­хи­мия­лық синтездің жаңа әдіс­терін жасауға, дәрі-дәрмек­тер мен бұрын белгісіз физиоло­гиялық активті қосылыстарды алуға арналған. Ол фосфор өн­дірі­сінің қатты және сұйық қал­дықтарына жататын феррофосфор мен фосфор шламдарын электрохимиялық  жолмен қайта өңдеу тәсілін анықтады. Ғалым сондай-ақ әр түрлі металл фос­фидтерін электро­химия­лық жолмен алу, табиғи дәрілік заттарды өсімдіктерден электро­химиялық тәсілмен экс­тракция­лау бағытында нәтижелі ғылыми зерттеу жұмыстарын жүргізді. Көптеген алкалоидтер негізінде ерекше электро­химия­лық әдіс­пен опиан қышқылы, котарнин, пахикарпин, тағы бас­қалар ар­қылы даярлаған дәрі-дәрмектер мен жаңа фармо­ко­ло­­гиялық активті заттарды синтездеу жолдарын зерттеді. Мұқаң өз шә­кірті А.Б.Басшовпен бірге ұсақ кристалды мыс ұнтағын алудың тиімді электро­химиялық әдісін ұсынды.
Ғылымға деген адалдық пен білімге деген құштарлықты бас­ты мақсат  тұтқан академик шы­найы  ғалымға тән қажыр­лы­лық, тиянақтылық танытып, қай жерде қандай қызмет атқар­са да, туған елі мен халқының мүд­десі жолында еселей еңбек етіп, әр салада өзіндік өшпес қолтаң­басын қалдырып, басшы­лық жұмысты да абзал ниетпен атқа­рып келеді. Осылайша бір бойында сан алуан өнері мен қа­білеті бар ғалым жастық жі­­ге­рімен, шебер ұйымдас­тыру­шылық қабілетімен биік белес­терді бағындырып 75 жас­тың жотасына толағай табыспен көтеріліп отыр. 1970-1982 жылдары Қазақ химия-технология институтының аға оқытушысы, доцент, кафедра меңгерушісі, декан, 1982-1985 жылдары Қара­ғанды мемлекеттік уни­верси­тетінің оқу ісі жөніндегі проректоры, 1985-1991 жылдары Органикалық синтез және көмір химиясы институтының директоры, 1991-1995 жылдары Ха­лық­­аралық қазақ-түрік уни­верситетінің ректоры болды. 1995-1997 жылдары Қазақс­тан Республикасының Білім министрі, 1997-2001 жылдары Халықаралық қазақ-түрік уни­верситетінің президенті қыз­метін атқарды. 2001 жылдан бері Органикалық катализ және электрохимиялық институты­ның директоры қызметін атқа­рып келеді. 2003 жылдың қазан айында ҚР ҰҒА-ның прези­денті болып сайланды. 2007 жылы
ҚР-ның Премьер-ми­нис­трінің штаттан тыс кеңес­шісі болды. 2010 жылы Қазақ-британ тех­ни­калық уни­­верси­тетінің ғылым бойынша проректоры болды.
1981 жылы химия ғылымы­ның  докторы, профессор  ата­ғын алғаннан кейін Мұқаңның ғылыми атағы мен дәрежесі былайша жалғасты. 1986 жылы Джорджтаун университетінің құрметті профессоры, 1989 жылы Қазақ ССР Ғылым ака­де­миясының корреспондент мүшесі атағын, 1994 жылы
ҚР ҰҒА-ның академигі атағын ием­денді. 1995 жылы Жоғарғы мектеп халықаралық академия­сының академигі, 1995 жылы Ха­лықаралық инженерлік ака­де­миясының академигі және Нью-Йорк ғылыми академия­сы­ның академигі, 2015 жылы Менделеев университетінің құр­­метті докторы атағын ием­денді. Ғалымның сайланымы мен депутаттығына мыналар жатады. 1984-1991 жылдары Қарағанды облыстық мәслиха­тының депутаты, 1994, 1995, 1999 жылдары Оңтүстік Қазақ­с­тан облыстық мәслихатының депутаты болып сайланды. 1990 жылы Қазақ ССР Жоғары Кеңе­сі­нің депутатына кандидат болып, 2004 жылы ҚР-сы Парламент мәжілісіне депутат болып сайланды. 2007 жылы ҚР- сы Парламент Мәжілісінің жанын­дағы Қоғамдық палата кеңесінің мүшесі болды. 2011 жылы ҚР-ның президенттігіне кандидат Н.Ә.Назарбаевтың Республика­лық қоғамдық шта­бы­ның мүше­сі болды. Түркі әлемі Ұлттық  Ғылым академия­сы одағының президенті болды. Партияға қатыстылығына 2006 жылғы «Нұр Отан» партиясының саяси кеңесіне мүшелігі жатады.
Академик Мұрат Жұрынов­тың тұлғалық болмысы оның ғылымдағы күрескерлігі мен қай­раткерлігі ҚР ҰҒА-ның президенті болған тұста анық байқалды. «Ғылымсыз дүние бос. Адамзат табиғатына іздем­паз­дық қасиет тән. Қазіргідей күрделі заманда қоғам алдында тұрған қыруар мәселенің ше­ші­мін де ғылым анықтайды», – деп тұжырымдаған Мұқаң бұл жұмысқа аса жауапкершілікпен қарады. Ғылым академиясына президенттік қызметке келген 90 жылдардың ауыртпалығын зор жауапкершілік танытып көтере білген ғұлама ғалым әл­де­неше рет Елбасының қа­был­дауында болып, оның ақыл-кеңесін ой елегінен өткізіп, өз пікір пайымымен де бөлісіп, ғылымның сол тұстағы ең үлкен проблемасы оны басқару тетігін таба білуге тәуелді екеніне мән беріп, оңтайлы шешім қабылдай білуі академиктер сенім артқан басшының білім-парасаты мен ұйымдастырушылық қабілетін айқын танытты.
Ғалымның тағы бір тартымды қырына оның тек қана ғы­лыми шындыққа жүгінуді қол­дауы, асырып айтудан, фактіге сүйен­бей болжам жасаудан ау­лақ болуы жатады. Кезінде Ғы­лым академия­сының жалпы жиналысында ҚР Ұлттық Ғы­лым академиясының қоғамдық ұйым мәртебесіне өткенін айта келіп, оған мү­ше­лікке «ғалым­дарды сайлауда өте мұқият болайық. Оған ғалым­дардың ғалымы ғана өтсін. Кездейсоқ адам өтпейді. Нағыз ғалым болса, ғалымдар өздері бағалайды. Кімнің қаншалықты дәрежеде ғалым екенін біледі, өздері сайлайды» деген еді.
Академик  ғалымның  өмір­лік өнегесі қомақты ғылыми ең­бек­терімен ғана шектелмейді.Ол сондай-ақ тағылымды тәр­бие­ші, ұлағатты ұстаз. Адам тәр­биелеу – ұлы міндет. Ұстаз­дық – ұлы қасиет. Ұстазы жақ­сы­ның ұста­мы жақсы. Ұстаз бағасын шә­кірті береді. Ұстаз талантты болса, шәкірті талапты болады. «Тірлігіңді жылдарға жоспарла­саң ағаш ек, ғасырларға жос­пар­ласаң жастарды тәр­биеле» дегенге ұқсас қанатты сөз тілімізде аз емес. Осы атал­ғанды ескеріп, ұлты мен Отаны­ның болашағы жолында тер төгіп, өз бойындағы асыл қасие­ті мен білімін өсер ұрпақтың бойына дарытуға атсалысқан Мұқаң – зор құрметке бөленген ұстаздардың бірегейі. «Ұстазға ең бірінші қажет нәрсе – адам бойында сирек кездесетін көркем мінез, сабырлылық, білім мен қажырлы еңбек» деген ғалымның ой-толғамы шә­кірт­терінің ақылшысы, тәр­биешісі ретінде көрініс тапқан. Академик ғылымға талантты, ынтық кісілерді қатыстыруға ылғи көңіл бөліп, оларға тікелей көмегін тигізіп жүрді. Оның жетекшілігімен 32 ғылым кандидаты мен 6 ғылым докторы даярланды. Мұқаңның өзінің шәкірттеріне өнеге боларлық кісі қызығарлық  адами қасиеті­не қолына алған істі қиынды­ғына қарамастан ерінбей аяғына жеткізіп тынатын тиянақты­лығы, адам мен қоғам алдындағы жауапкершілікке мән беретін­дігі, іске мұқият, сөзге берік, уәдеге мәрттігі жатады. Еліміз­дің әр өңірінде жемісті еңбек етіп, абырой-атаққа ие болып жүрген шәкірттері Мұқаңды өз ісінің жүйрігі, ой-өрісі биік, энциклопедиялық терең білімі бар ұлағаты мол ұстаз, жүрегі таза, талапшыл деғдар азамат деп зор ықылас-ілтипатпен еске алады.
Мұқаңның ең бір жан жадыратар қасиетіне оның тіл жана­шырлығы жатады. Бұл жағдай біздің осы мақаланы жазуымызға себеп болды. Ол ана тілін сүйе білді әрі сол үшін күресе білді. Туған халқының қастерлі тілі, қасиетті ділі, қадірлі діні дегенде оның шығарға жаны бөлек. Қазақ тіліне деген ыстық ықы­ласы мен перзенттік сүйіспен­шілі­гінің ерекше екені зерделі де зейінді ғалымның биік-биік мінберлерден айтқан тіл мәде­ние­тіне қатысты ой-толға­мынан, халқымыздың дәстүрлі сөз өнеріне бар өнердің басы деп ден қойғанынан байқалады. Мемлекеттік тіл мәртебесіне ие болған қазақ тілінің мәселесі академиктің назарынан тыс қалып көрген емес. Ойлы азаматтың іскерлік қабілеті оны ана тілінің де қамын жейтін қайраткер биігіне көтерді. Осы кезге дейін қазақ тілінің өз тұғы­рына, деңгейіне қона алмауы, мемлекеттік идеология­ның, ұлттық руханияттың ұйт­қысы бола алмай жүргені ғалымның мазасын алғаны байқалады. Бұл – қазақ тіл білімі ғылымының жай-күйін қаузап, соған бір септігімді ти­гіз­сем деген халқының әдеби тілін жетік  меңгерген  азаматтың кісілік болмысының алтын арқауы еді.
Елімізде ғылымның дамуына өзіндік үлес қосып, тың серпін берген ірі зерттемпаздық пен зор қоғамдық ұйымдас­тырушылықтың, саяси белсен­діліктің тамаша үлгісін көрсетіп отырған  академиктің халқы­мыз­­дың ана тілі жөніндегі ой-толғамы мәселенің өзектілігін танытады. Қазақ тілі тағдырын қаумаласа отырып қарастыра­тын бұқаралық ұйым құру, тілге қатысты шаралар мен атқарар шаруаны тиянақтауға қатысты академиктің айтқан ой-толға­мына, өз тарапынан көрсе­тілер ілтипатына Ахмет Байтұр­сын­ұлы атындағы Тіл білімі инсти­тутының ғалымдар қауы­мы әрдайым дән риза.
Мұқаңның жеке қабылда­уында болған кездерімде мемле­кеттік тілдің бүгінгі жай-күйіне, оның даму, пайдалану, қолдану аясын кеңейтудің жолдарын қарастыруға қатысты салмақты саясат ұстанып, қазақ тілін көркейтудің оңтайлы тәсілімен орыстілділерге оны құрмет тұтқыза үйретудің тиімді екені жайындағы ой-толға­мы­н өзім­нің оқулықтарым мен монографиямда ескерген тұстар бар.
Академиктің айтуға тұрар­лық тартымды қырына ел мә­дение­тіне іргелі үлес қоса білген қоғам қайраткерлігіне көтеріліп отырғаны, өзінің терең ойлы, салмақты сөзімен қоғамның түйткілді мәселесін қозғай алуы жатады. Ол қазіргі Қазақстан қоғамында қалыптасып отырған жағдайды қалт жібермей, әр алуан бас қосуда, әңгіме-сұх­ба­тында өзінің ой тұжырымымен бөлісіп отырады. Қазақ десе бауыр етін кесіп беруге даяр па­триоттығын танытатын отан­сүй­гіштік пен ұлтжандылық – білім мен ішкі мәдениетін же­тілдірген, өткеннің інжу-маржанын бойына терең сіңір­ген, елі мен жерінің рухани-материалдық құндылығын жан-жақты игерген, халқының жарқын болашағы мен игілігі жолындағы перзенттік парызын ұмытпай, ізгі ізденісімен күресе білетін азаматтық санамен қа­лыптасатын қасиет деп жүрміз. Осы орайда Мұқаңның қай­рат­керлік қырын, азаматтық кел­бе­тін, адамгершілік қасиетін ай­қын аңғарамыз. Ол қазағына қалтқысыз қызмет көрсетіп жүр­ген кең жүректі жайсаң, нар тұл­ғалы ғалым, асылдың сыны­ғындай болған нағыз сегіз қыр­лы, бір сырлы жан. Өз елін, өз жұр­тын ұлы аспандатса, халық та ондай ұлының мәртебесін биік­тетіп, ардақ тұтады емес пе.
Халқына сіңірген еңбегін өзінің перзенттік парызы сана­ған академиктің толассыз ең­бегі, аршынды адымдары, ел мүддесі жолындағы ізденістері ескерусіз қалмай үкімет тарапынан да, ғылым қауымдастығынан да жоғары бағаланды. Маңдай тер, табан ақының да өтемі бар екені даусыз. Ғалымның иемденген мемлекеттік және
ха­лы­қ­аралық марапаты мен сый­лық­тары, премиялары, құр­метті атақтары айтарлықтай қомақты. 2005 жылы «Парасат» орденімен, 2011 жылы «Барыс» орденімен марапатталды. Алған медальдары мынадай:
2001 жылы Токио универ­си­тетінің алтын медалімен, 2003 жылы Францияның ғылыми-өндірістік қоғамының медалі­мен,  2006 жылы Украинаның Ұлт­тық Ғылым академиясының алтын медалімен, 2007 жылы В­.­И.­Вернадский атындағы ғы­лы­ми орталықтың күміс меда­лімен марапатталды.
Мұқаң, сондай-ақ ҚР-нің ғылым, техника және білім беру саласы бойынша Мемлекет­тік сыйлықтың иегері. Ол 2001 жылы Анкарада Түркі әлемінің Халықаралық сыйлығының иегері атанды. 1982 жылы Жо­ғарғы Мектептің үздігі атағына ие болды. Ғалым Оңтүстік Қа­зақ­с­тан облысының және Арыс ауданының құрметті азаматы атанды.
Ақкөңіл, жарқын мінезді, жаны жайсаң Мұқаң білікті ұстаз, зерделі ғалым болумен қа­тар, қамқор отағасы, қадір­мен­­ді әке бола білді. Данышпан ба­баларымыз  ер бала тәрбие­сінде әкенің орнын ешкім ал­мас­тыра алмайтынын қадап айт­қан. «Ұлға отыз үйден тыйым, он сан үй­ден сын» дегенге орай жігітке ай­тылар сынның көптігін, қойы­лар талаптың жоғары еке­нін ескерген Мұқаң­нын тағы бір атап айтуға тұрар­лық еңбегі – өз кіндігінен өрбі­ген ұрпағының барлығына қа­зақы әдеп пен тәрбие берген­дігі. Олар қазіргі таңда білімді де білікті маман атанып, жоғары лауазымды қызмет атқаруда. Парасатты да аяулы жары, ар­дақты ана Нұ­р­мағанбетова Мария Ибеновна екеуі тәрбиелі, білімді, ұлағатты ұлдарын, неме­ре­лерін өсіріп, өз отбасын жапырағы жайылған, көсегесі көгерген, немерелерінің қызы­ғына бөленген мәуелі бәйте­рек­тей жайқалтты.
Тегінде ниеті түзу, текті аза­матқа Жаратқан Ие жақсы жар сыйлайды деген бұрынғылар айтқан сөз бар. Соған орай ер азамат көтерген биіктің, тын­дыр­ған қыруар шаруаның, абыройы мен беделі асқақтап, жұл­дызы жоғарыдан жарқырай түсуінің ар жағында әйел тұра­тыны белгілі. «Әдепті, арлы жар сүйсең, оңғарылар бар ісің», «Өмір­де азаматтың бағын ашар ажары – алған жары», «Алғаны жақсы азаматтың асығы алшысынан тұрмақ» деп тегін айтыл­маған. Өйткені, тіршіліктегі сәттіліктің бәрі отбасынан бас­тау алады. Мұқаңның өмір бойы атқарып келе жатқан ғы­лыми-зерттеушілік жұмысы мен бас­шылық қызметіндегі қиын­шы­лықты жеңу барысында жеткен ұлан-ғайыр жетіс­тіктері тағдыр қосқан жарының тілектестік көңілмен аялаған жан-жақты қамқорлығымен, керекті кезінде ақыл-кеңесімен қуаттандырған, дұрыс жолды бағдарлауға сеп­тігін тигізген парасат-пайы­мы­мен, достық қалтқысыз көмегі­мен жүзеге асқаны Мұқаңның шаршап-шалдықпаған ширақ қалпынан, көтеріңкі көңіл-кү­йінен анық байқалғандай.
«Өмір ел-жұрты сыйлап құр­меттеген жақсылармен, жақ­сы адамдармен сәулелі, тұғыр­лы», «Уақыт – әділ сыншы, мін­сіз таразы» дейді халық да­на­лығы. Халқымыздың біртуар ұлы өзінің зор абыройы мен атағына рухани адамгершілігі мен аза­маттығының арқасында ие болды. Оның кісілік келбеті мен болмыс-бітіміне келсек, саналы да сарбаз, шыншыл да шынайы, қамқор да қарапайым қалпынан айнымайтындығы, кімге де болса қол ұшын беруге әрдайым даяр тұратыны сүйсін­діреді.  Өмірде орнықты ойы, таңдаулы ұстамы мен ұзақ жыл­ғы ғылыми еңбек жолы бар адам­гершілік игі қасиеттері, табандылығы мен тиянақ­ты­лығы, артық сөйлемейтін ұстам­дылығы, айналасына шуақ шашып жүретін жаны жайсаң да таза, мінезі мәрт, арманы асқақ, талғамы биік, кісілігі мен кіші­лігі жүзі­нен білініп тұратын, жү­регі жұм­сақ, иманы берік, іш­кі мә­дениеті  жоғары, тақуа мі­незді, табиғатынан аса сыпайы, барынша адал, еш бөспей­тін, аспайтын, тасымайтын, мол пішініне сырт көрінісі, болмысы сай, терісі кең, ақжарқын, ақ еділ жанды елімізге кеңінен танымал зиялы қауым зор құрмет білдіріп бағалады. Ол сырбаз мінезімен, аса кішіпейіл де адал қасиетімен әрдайым азаматтықтың ешқашан адас­тырмайтын биігінен табылды.
Сергекті серік еткен парасат-пайымы биік ғалым қандай лауазымды қызметті атқарса да, асқақтығы жоқ қара­пайым­дылығымен, сырбаздығымен, кішілігі мен кісілігінен таймаған нағыз қазақы мінезге тән сабырлы да салмақты, байсалды да салиқалы қалпымен, бия­зылы­ғымен, қағілездігімен тұл­ғасы таудай болса да, кісіге жо­ғарыдан қарап, йық теңестіріп текетіреспейтін азамат­ты­лы­ғымен, тектілігімен үлкен-кі­ші­ні өзіне баурап алған. Ол абыройлы еңбекпен жеткен жетіс­тігімен парасат-пайы­мының  биіктігімен  даналықтың кемеліне келген шағын атап өтіп отыр. Мұның ар жағында ойы ұшқыр, санасы сергек, арманы асқақ, көкірегі сау, білімі терең, нар мінезді, бір сөзді, бәрінен намысты жоғары қоя­тын, имандылық пен адамгер­ші­лік тізгінін тең ұстаған, за­ман­ның жүгін арқалаған хал­­қымыздың мақтан тұтар аза­ма­тының өрлік пен өжеттігі, ұлттық намысы, ешкімге ұқса­майтын өзіндік болмыс-бітімі жатса керек. Өзінің қиын­дығы мен қызығы көп еңбек жолында жиған тәрбиесі де, көргені мен көңіліне түйгені көп Мұқаңда дос та, жолдас та көп. Бұл – оның  жақсы азамат ре­тін­дегі бір белгісі. Ол қазақтың талай жақсысы мен жампозының жанынан табылып, оларға үлкен құрмет көрсете жүріп, кісілік келбетімен, айырықша бітім-болмысымен өзін де сыйлата білді.
Мұрат Жұрынов ұлтқа риясыз қызмет етудің, отбасында жақсы отағасы болудың, ақыл­ман ақсақалдықтың, салиқалы сарабдалдықтың  үздік үлгісін көрсетіп отыр. Жасынан зерек те  ұғымтал, аңдағыш та сезім­тал, көкірегі ояу, санасы сергек, қия­лы қыран ғалым өмірде де, еңбекте де бақытын тапқан адам. Оның қызу еңбек, жалынды күреске толы ғұмырының мәнді де сәнді өтіп жатқаны анық. Абзал жан, дарынды ға­лым Мұқаң мерейлі 75 жасқа күш-қайратының мол шағында келді. Әлі де тың, ойы сергек, белсенді, ұдайы ізденіс үстінде. Қаламы қарымды, ойы шолымды, пікірі алымды ғалымның шабытты шағы қашан да серік болып жазары көбейсін. Елім деп есейген, ұлтым деп ұлысына қызмет етіп қайраткерлік көр­сетіп жүрген ер азаматқа еге­менді елі үшін атқарар ерен ең­бегі ел алдында еленіп, әрдайым халықтың ілтипатына бөленіп, зиялылық пен парасаттылықтың биігінен көрініп, қашан да, қайда да еңсесі биік, мәртебесі жоғары бола бергей деген тілек білді­реміз.

Сейдін Бизақов,
филология ғылымының докторы, профессор.

ПІКІР ҚОСУ

Ваш e-mail не будет опубликован.

Пікір