ЖҮЗ ЖАСАҒАН ЖҮРЕК
18.11.2016
1358
0

Биыл Жамбыл Жабаевтың 170 жылдығына арналған түрлі шаралар еліміздің әр өңірінде ұйымдастырылуда. Ел Тәуелсіздігінің 25 жыл­­ды­ғымен тұспа-тұс келген дүлдүл ақынының мерейлі жасы кеңінен аталып өткені заңды, әрине.

Әрі эпик, әрі айтыс ақыны, абыз жырау, әрі жауынгер жыршы Жамбыл – биік парасатты өнерпаз, аза­маттық саяси поэзияны қа­лып­тастырушы. Ол жырау­лар­дың байтақ эпикалық дәстүрін, қазақ сөз өнеріндегі ғажайып имп­рови­зациялық үрдіске жаңа мазмұн да­рытты. Жамбыл – жырдың то­лас­сыз бұлағы, өшпес өнегесі, тоз­бай­тын асылы. Ол жасампаз ұр­пақ­пен бірге жасай береді. Көзінің тірі­сінде-ақ КСРО Мемлекеттік сыйлығының лауреаты атағын алып, өзінің де, халқының да даңқын дүйім дүниеге паш еткен Жамбыл бейнесі қазақ өнерінің барлық түрінде, барша жанрында шабытпен бедерленіп, ұлттың ру­хы биік ұлы тұлғасы екенін әй­гіле­ді. «Жамбыл жырлары теңіз түбінде шашылып жатқан маржан секілді. Оны жинап алып халқының қо­лы­на беру – біздің әрқайсымыздың аза­маттық борышымыз», – деген Сә­кен Сейфуллиннің өсиеті бүгін­де орындалып жатқандай.
Менің пірім – Сүйінбай,
Сөз сөйлемен сыйынбай!
Сырлы, сұлу сөздері
Маған тартқан сыйындай!
Сүйінбай деп сөйлесем,
Сөз келеді бұрқырап
Қара дауыл құйындай! –
деп Сүйінбай ақынды ұстаз тұтқан ақын халықтың әлеуметтік саяси өмірін ақындық шыншылдықпен, азаматтық жауапкершілікпен бедерлей білген.
Ақынның мерейтойы Алматы қаласында да өз деңгейінде тойланды. Жуырда Жамбыл атындағы қазақ мемлекеттік филармониясында өткен ойға көсем, сөзге ше­шен ақын бабамыздың мерейтойына орай ұйымдастырылған шараға Алматы қаласының әкімі Бауыржан Байбек қатысып, жиналған қауым­ды салтанатты мерекемен құт­тықтады.
Алғашқылардың бірі болып сөз алған қала әкімі: «Елбасы Нұрсұлтан Назарбаев: «Ұлылардың мұрасы да, мұ­раты да, атақ-даңқы да, мерейтойы да – кейінгіге үлгі. Ал үлгіге қа­рап ұрпақ өседі», – деген еді. Есімі әр­бір қазақ баласына қастерлі Жам­был Жабаев бір өңірдің немесе бір дәуірдің ғана ақыны емес. Ол бар­ша адамзат құндылықтары тура­лы ой толғаған, иісі қазақтың барлығына ортақ кемеңгер ойшыл, ұлы гуманист», – деді өз сөзінде.
Айта кету керек, Жамбыл Жа­баев­тың 170  жылдық мерейтойы Елбасының тікелей тапсырмасымен Мәскеуде, Санкт-Петербургте, Астраханда, Анкарада кең көлем­де аталып өтті. Ал Сербия астанасы Белградтағы ақынның ескерт­кі­шін Елбасының өзі ашқан. Осы­лайша өлеңдері әлемнің қы­рықтан астам тіліне аударылып, ХХ ға­сыр­дың Гомері атанған жыр шайы­рының мерейлі жасын өт­кізуге алыс-жақын шетелде ерекше қолдау көрсетілуде.
«Жылдың басында Қазақстан Жазушылар одағы Жамбылдың
170 жылдығын арнайы атап өткен еді. Қазақ Ұлттық университеті ақын­ның екі томдығын, Алматы мем­лекеттік университеті бір том­дығын басып шығарды. Белгілі қа­ламгер Нағашыбек Қапал­бекұлы­ның «Жамбыл – толғау» атты еңбегі жарық көрді. Біз де өз тарапымыздан «Жамбыл Жабаев» энциклопедиясын шығаруға қол­дау білдіріп отырмыз», – деп сөзін сабақтады Б.Байбек.
Кеште Жамбыл Жабаев туралы «Жүз жасаған жүректен…» атты фи­льм көрсетіліп, жас өнерпаздар ұлы шайырдың өлеңдерін жатқа оқыды. Ал Қазақстанның еңбек сіңірген қайраткері Сәуле Жан­пейі­сова, Қырғызстаннан арнайы кел­ген Асылбек Маратов пен ақын­ның шөбересі Бекмұрат Жамбылов сахнаға шыққанда халықтың қо­ше­меті ерекше болды. Бұл жырау­дың өшпес өнегесінің ұрпақпен бірге жасап келетінінің  дәлелі болса керек.
КСРО Мемлекеттік сыйлы­ғы­ның лауреаты, Жамбыл ақынның 170 жылдығы Алматы қаласының 1000 жылдығымен тұспа-тұс келіп отырғаны.

Меруерт НҰРЛАН.

ПІКІР ҚОСУ