ЖАСТАР ҰЙЫМДАРЫНЫҢ КӨШБАСШЫЛАРЫМЕН КЕЗДЕСТІ
Қызылорда облыстық жастар форумы аясында облыс әкімі Қырымбек Көшербаев жастар ұйымдарының көшбасшыларымен және жастар қозғалыстарының мүшелерімен кездесті.
Кездесу барысында Қызыл-орда өңіріндегі жастардың жұмыссыздығы, білім беру мен кәсіптік білімді игеру мәселелері талқыланды.
– Біздің мақсатымыз – аумақтағы белсенді жастарды жинап, кестеге сай шара өткізу ғана емес, жастардың нақты мәселелерін талқылап, оларды шешу жолдарын айқындау. Форум жұмысы төрт секциялық бағытта өтеді. Мысалы, NEET (білімі және жұмысы жоқ) санатындағы жастармен жұмыс істеу мәселелері қаралды, – деп атап өтті аймақ басшысы Қ.Көшербаев өз сөзінде.
Жастардың өз бетінше дамуы үшін Қызылордада еңбек ресурстарының балансы жасалды. Оған сәйкес, еңбек нарығына қажетті мамандар даярланады. Бұдан бөлек, ЖОО бітірушілеріне де арнайы бағдарлама қарастырылған. Бүгінде 391 қызылордалық РФ Үкіметінің гранты есебінен Ресейдің алдыңғы қатарлы жоғарғы оқу орындарында оқиды. Төрт мыңға жуық студент «Серпін» бағдарламасы бойынша білім алып жүр. Тағы 512 жас Қызылорда облысы әкімінің грантын жеңіп алды.
«Жас Отан» жастар қанатының төрағасы Шахмардан Байманов Қызылорда облысының еңбек ресурстарының балансын әзірлеу және маргинал жастармен жұмыс жасау тәжірибесін Қазақстан бойынша таратудың маңыздылығын атап өтті.
Кездесуге қатысушылар жастардың қоғамдық-мәдени өмірін қалыптастыруға байланысты бірқатар ұсыныс-тілектерін жеткізді.