АҚЫН КЕШІ ТАРАЗДА ӨТТІ
14.10.2016
1495
0

kulyash-apaТараз қаласында қос ақын – ҚР еңбек сіңірген қайраткері Қайырбек Асанов пен ҚР Мемлекеттік сыйлығының лауреаты Күләш Ахметованың 70 жасқа толу мерейтойы өтті. 

Ақын тойына зиялы қауым өкілдері, дос-жаран­дары, қаламдас іні-сіңлілері жиналып, тілектерін айт­ты. Мерейтой шымылдығы театрландырылған қойы­лыммен ашылып, тараздық артистер қос ақын­ның жастық шағын сахналық көрініспен өрбітіп, Қ.Асанов пен К.Ахметованың жырларын оқыды.

Ресми кешті ақын Қалқаман Сарин жүргізді. Кеш шы­мылдығын Жамбыл облысы әкімінің орынбасары Ер­ғанат Мәнжуов ашты. «Бұл шығармашылық кеш екі бірдей ақынға көрсеткен халықтың құрметі. Сіз­дерге деген елдің ықыласы айрықша. Сіздер жыр­ларыңызбен талай адамды сәулелі өмірге жетеледіңіз­дер. Жылы шумақтарыңызбен Отанды, елді сүюдің үл­гісін көр­сетіп келесіздер. Бір шаңырақтағы қос ақын тек Тараз жұртшылығының ғана емес, барша қа­зақ­тың мақта­нышысыздар», – деген Ерғанат Мән­жуов ақын­дарды құрметтеп, шапан жауып, камзол кигізіп қа­на қоймай, темір тұлпардың да кілтін ұстатты.

Ақын қарындасының тойына Астанадан арнайы кел­ген ғалым, мемлекет және қоғам қайраткері Мыр­за­тай Жолдасбеков ақынға деген ақжарма тілегін бы­лай жеткізді: «Қатар өсіп жетілген қос ақынның бү­гінгі жыр кеші құтты болсын! Біз қарындасымыз Күләш­ті ерекше жақсы көреміз. Кісілігі мен адалдығы, инабаттылығы мен нәзіктігі, пәктігі мен тазалығы үшін құрметтейміз. Қазақ жырын жоғары биікке жеткізген құдіретін ұнатамыз. Ағаға қарындастай жанашыр болмайды. Қызметте жүрген сәттерімде де қуана білді, қызметтен босап қалған шақтарымда да, қабырғасы қайысып қайғыра да білді. «Әруақтар тү­бінде бір қолдайды» деген өлеңі бар еді. Оған Әбиірбек Тінәлиев ән шығарды. Ол әнді сай-сүйегің сырқыра­май тыңдау мүмкін емес. Күләш не жазса да, тайға таңба басқандай анық жазады. Қайырбекті де ерекше жақсы көреміз. Іні тұтып, қадірлеп келемін. Екеуің де екі елдің бағы болдыңдар. Біраз уақыт Иранда тұр­дым. Сонда байқағаным, Күләштің өлеңдерінен Сағ­дидің, Хафиздың сарыны естіледі. Күләш – періште ақын. Бізде ақын қыздар жоқ емес, бар. Бұл өңірде таңдайына өлең ұя салған Ұлбике туған. Күләш Ахме­това сондай жүйрік ақынның сіңлісі. Күләш поэзиясы – тұнып тұрған адамгершілік, кісілік, парасатты­лық, инабаттылық. Күләштің бойынан әркез та­за­лық­ты көремін. Ол махаббатты жырға қосты. Ата-анасына, бабаларына, сүйген жарға, перзент­тері­не, аға-інілеріне, әпке-сіңлілеріне деген махаббатын жыр­лады. Күләш Отан туралы, табиғат, туған жер, Астана туралы керемет жазады. Осындай жарқын поэ­зияның авторы Күләш сәулелі адам… Ақынның Отан­ды сүюге арналған өлеңдері өте көп. Күләштің жыр­ларын оқудан жалықпас едім. Осындай таза, ай­тар ойын бүкпесіз ашық айтатын қыздардың бары – қазақтың бақыты. Қазақ жыры жасай берсін!».

Қазақстан Республикасы Премьер-Министрі Ба­қыт­жан Сағынтаев қазақтың екі бірдей ақынын құт­тықтап, арнайы құттықтау хатын жолдапты. Сондай-ақ,  ҚР Мемлекеттік хатшысы Гүлшара Әбді­ха­лықовадан, «Нұр Отан» партиясы Төрағасының бірінші орынбасары Мұхтар Құл-Мұхаммедтен, Вице-премьер Иман­ғали Тасмағамбетовтен, Мәдениет және спорт министрі Арыстанбек Мұхамедиұлынан, Энергетика министрі Қанат Бозымбаевтан, Ақтөбе облысы әкімі Бердібек Сапарбаевтан кеш иелеріне деген арнайы құттықтау хаттар келді.

Қазақстан Жазушылар одағының атынан ақын Маралтай Райымбекұлы Күләш Ахметованы құттық­тап, ақын апасына деген ақ тілегін айтып, ҚР Жазу­шы­лар одағының төрағасы Нұрлан Оразалиннің құт­тықтау хатын табыстап, арнайы сый-сияпатпен мара­паттады.

Қ.СЕРІКҚЫЗЫ.

 

ПІКІР ҚОСУ