Шығыс Қазақстан облысы, Аягөз ауданы, Шынқожа ауылында, күре жолдың бойына Шынқожа Базарқұлұлы батыр бабамыздың нар тұлғасын сомдап, тарихтан белгілі Шұбар атты тұлпарымен құрметтеп тұғырына қондырдық. Ұлт мақтаны – ұлыс тойына басшылық жасап, ұйымдастырған Аягөз ауданының әкімі Баяхметов Бақытжан Кәкенқажыұлы.

Осының бәрі Тәуелсіз еліміздің 25 жылдығына тарту ретінде өз қо­лымыздың өз жағамызға жет­кен­дігі­нің белгісі деп түсінемін.

Тұрғаш Қалықжанов сынды аза­маттар, Төлеген Жирентаевтай ел ақсақалдары бас болып, Шы­н­қо­жа батырдың мүсінін жасат­тыр­ған Оңалғазы Болсамбеков есімді кәсіпкер бауырымызға ақ батасын беріп, арғымақ мінгізді. Игі шараға Болат Шахмұхаметов, Рефхат Мұ­ха­мадиев, К.Сакипов, Асан Қара­шо­лақов, Берік Жирентаев, Болат Жирентаев, Зарипа Жұмаева, Ай­дархан Нұхманов, Марат Батыр­баев, тағы көптеген ел азаматтары қо­мақты үлес қосты.

Аягөз ауданы осы тойға Астана, Алматы, Жезқазған, Ұлытау, тіп­ті Қытай Халық Республикасынан ат арытып келген бауырларымызды тік тұрып қарсы алып, сый-құрмет көрсетті. Осы тұста Шынқожа батыр атындағы ауыл­дың мектеп директоры Мұстапа Тұр­сын­ұлы­ның еңбегін ерекше айта кету парыз. Мұстапа Тұр­сын­ұлы Шын­қожа батырдың ауылдағы бұрынғы мүсінін мектептің алдына орнатты. Аламан тойдың басында Парламент мәжілісі депутаты Нұр­тай Сәбильянов, Парламент мә­жі­лі­сінің экс-депутаты, «Құрмет» орде­нінің иегері Ержан Рахметов, Жезқазған-Ұлытау аймақтық музей басшысы Кенжал Балкенов бастаған зерттеушілер мен Қытай Республикасынан Әлмұхаметұлы Ешмұханбетпен бірге келген ба­уырларымыз конференцияда арнайы сөз сөйледі. Қазақстан Журналистер одағының мүшесі, ай­­мақтық «Аягөз әлемі» жур­на­лы­ның және «Мөлдір сана» газетінің бас редакторы Бақытөмір Шалғым­бай­дың мағыналы баяндамасы көп­шіліктің көңілінен шықты. Аста­надан келген дінтанушы Дархан Аманжолұлы шеттен келген қан­дастарын тосып алып, жол көр­сетіп отырды, жөн білген кісі­лігіне ри­за болыстық.

Айтулы ас – аламан бәйге бо­ла­ды деп бірнеше ай бұрын сауын айтқанда, ұлы даламыздың түкпір-түк­пірінен бүркітін баптап, бәйге­сін жаратып, құсбегі, атбегі, түйе балуан­дар көптеп жиналыпты. Ба­луандар күресіне 40-тан аса жігіт қатысты. Бірінші орынға Абай ауда­ны атынан қатысқан Ай­бек Нұ­ғы­маров ие болып, қомақты қар­жы­лай сый алды. 25 шақырым аламан бәйгеде Аягөз ауданының Бо­зай ауылынан «Берік қара» тұл­пары бірінші болып көмбеден өтіп, «Hyundai Accent» автокөлігін сыйлады. Кешқұрымнан түн жарымына дейін Аягөздің орталық  алаңын­да қазақ эстрадасының шоқ­жұл­­дыз­дарының қатысуымен концерт өтті. Оған Қазақстанның ең­бе­гі сіңген әртісі Роза Рымбаева мен Мәди және Әли Оқаповтар, Тоқ­тар Серіков пен Бейбіт Сейдуалиева, Абай Бегей, Ақылбек Жеменей, т.б. әншілер қатысып, аягөз­дік­терге тамаша көңіл сыйлады.

Дүйсенғали СЕРІКҚАЛИҰЛЫ,
Қазақстан Журналистер одағының мүшесі, ақын.