1-ШІ ҚЫРКҮЙЕК – БІЛІМ КҮНІ
Бұл күн халықаралық мереке болып белгіленгенімен, Жер шарындағы барлық елдерде оқу жылы дәл осы күні басталмайды. Мәселен, Норвегияда оқу жылы сәуір айының аяғында, ал Үндістанда Білім күні – 1 маусым күні, Жапонияда жаңа оқу жылы сәуірдің басталуымен тұспа-тұс келеді екен. Польша, Испания сынды Батыс Еуропа елдерінде Білім күні – 1 қазанда атап өтіледі. Олардың кейбірінде нақты күн белгіленбеген. Ал көршілес Қытай елінде тегін оқу орындары мүлдем жоқ көрінеді.Бұл жүйеге Аспанасты елінің халқы ешбір қиналыссыз қарайтын секілді. Ал біз мектептегі оқыту бағдарламасының қиындығымен қоса, оқу орындарында оқу ақысының да өте қымбат екенін айтып қамығамыз. Одан бөлек, балаларға мектеп формасы мен оқуға керекті құрал жабдықтармен қамтамасыз етудің де аса оңай болмайтындығын айтамыз. Енді бір елдерде арнаулы мектеп формалары жоқ, есесіне сапалы білім беруге көңіл бөледі екен. Әрине, әр елдің, әр уақыттың өзіндік ерекшелігі бар. Ойын қуған дала баласы мен еңкейген кәрі де мектепке қарай ағылатын Білім күні – баршамызға өзгешелігімен есте қалатын күн. Алғаш мектеп табалдырығын аттап, көкірегін қуаныш кернеген жас бүлдіршіннің шалқыған көңілі мен перзентінің әр қадамына сәттілік тілеп, іштей шүкіршілік еткен ата-ананың толқуы екі бөлек сезім. Бүлдіршін үлкен өмірге қадам басқанына шаттанса, ата-ана ұрпағының ертеңіне алаңдайды. Осы орайда еш қиындықтарға қарамастан, өз негізімізден ажырамай, білімнің шыңына самғайтын саналы ұрпақ тәрбиелеу үшін не істеуіміз керек? Кешегі ата-ананың ұрпақ болашағына алаңдауы мен бүгінгі ата-ананың ойындағы уайымның аражігі қандай деген көңілде жүрген сауалдарға жауап іздеп көрген едік…