АКТЕР МӘРТЕБЕСІ
Қазақ театр өнері 1960 жылдары үлкен жетістіктерге жетті. Ұлт сахнасына айтулы өзгеріс әкелген сол кездегі талантты буынның бір өкілі – Сәбит Оразбаев.
Жуырда Қазақстанның халық артисі, Мемлекеттік сыйлықтың лауреаты. ұлттық сахна өнерінің абызына айналған актер Сәбит Оразбаевтың 80 жасқа толған торқалы тойы М.Әуезов атындағы қазақ мемлекеттік академиялық драма театрында салтанатты түрде аталды.
Қазақстан Президенті Нұрсұлтан Назарбаевтың мерейтой иесіне жолдаған құттықтауын Мәдениет және спорт министрі А.Мұхамедиұлы оқып берді. Игі тілекке толы осындай хаттар ҚР Мемлекеттік хатшысы Г.Әбдіхалықовадан, ҚР Парламенті Сенатының төрағасы Қ.Тоқаевтан, Мәжіліс төрағасы Б.Ізмұхамбетовтен, ҚР Жоғарғы сотының төрағасы Қ.Мәмиден, Оңтүстік Қазақстан облысының әкімі Б. Атамқұловтан және өзге де өңір басшылары мен лауазымды тұлғалардан келді. Сенат төрағасы Қ.Тоқаевтың және Қазақстан Жазушылар одағының құттықтауын жеткізген ҚР Мемлекеттік сыйлықтың иегері, ақын Нұрлан Оразалин Сүйеу қартты сомдап, сүйкімді келбетімен танылған актерге арнаған өлеңін оқыды.