Көрнекті ақын, драматург, Мемлекет­тік сыйлықтың иегері Нұрлан Оразалиннің «Көкжал дәуірі» поэзия жинағы «The Wolf Epoch» атауымен Америка Құрама Штат­тарында жарық көрді.

Әлемдегі сөйлеушісі ең көп тілдердің бірінде жарық көрген бұл кітап – белгілі публицист Бигелді Ғабдуллин жетекшілік ететін «Аudarma» баспасының алғашқы өнімі.
Сүйінші жаңалықты алғаш болып жеткізген Б.Ғабдуллин «Көкжал дәуіріне» қатысты тағы бір маңызды жайт­ты атап өт­ті:
– Оразалиннің бұл кітабы Amazon платформасында лайықты орын алып, бірден №1 белгісін иеленді. Мұндай белгі кітап жарияланған алғашқы 90 күн ішінде өз категориясында жоғары сатылым көрсеткен туындыларға беріледі. Бұл – жаңа шыққан, бірақ тез танымал болған кітаптар үшін өзіндік бір «медаль» іспет­ті. Бұл жаңалық авторғада, осы шедеврді шығару үшін жанын салған Данияр Сүгірәлінов екеумізге де үлкен қуаныш.