Жамбыл облысы кітап оқу мәдениетімен қайта қауышқан өнегелі өңірге айналды. Тараз қаласында өткен «Кітап – ұлт­тық құндылық» ат­ты республикалық кітап фестивалі де –осы сөзіміздің бір дәлелі. Облыс әкімі Ербол Қарашөкеевтің «Әулиеата – кітап оқитын өңір» ат­ты жобасы аясында өткізілген іс-шараға есімі елге белгілі қаламгерлер мен баспа өкілдері қатысты.

Фестивальдың ажарын ашып, кітапқұмар қауымның рухани әлеміне көзқуаныш сыйлаған Қазақ­станның еңбек сіңірген қайраткері, белгілі ақын, публицист Қайырбек Асановтың «Махаббат», «Шапағат» және «Парасат» деп аталатын, ат­тары да поэзия ұйқасымен өрілген үш томдық жинағының тұсаукесері болды.
Облыста іссапармен жүрген ҚР Президентінің кеңесшісі Мәлік Отарбаев пен облыс әкімінің орынбасары Серік Сәлемов фестивальдың ашылу салтанатына қатысып, сексеннің сеңгіріне шыққан Қайырбек ақынның үштомдығының тұсуын кесіп, деніне саулық пен шабыт тіледі. ҚР Президентінің кеңесшісі, жазушы Мәлік Отарбаев кітап құндылығы, оның ақыл-ой кеніші екені туралы ойларын ортаға сала келіп, Президент­тің де кітапты көп оқитынын, жақында ғана Тараз қаласында тұратын жазушы Көсемәлі Сәт­тібайұлының «Жалғызқара» ат­ты романын оқып, жылы пікір білдіргенін жеткізді.

* * *

Белгілі ақын, Қазақ­станның еңбек сіңірген қайраткері, «Тараз қаласының Құрмет­ті азаматы» Қайыр­бек Асановтың 80 жасқа толуына орай, «Ғибрат­ты ғұмыр – көркем жыр» ат­ты әдеби кез­десу Тараз қаласындағы орталықтандырылған көпшілік кітапханалар жүйесінің Мұхтар Әуезов атындағы кітапханасында да болып өт­ті.
Бұл кез­десуге ақындар Баймахан­бет Ахмет, Үміт Битенова, Ербол Қамбатыров және белгілі әншілер Пернебек Оспанов, Бақыт Шағырбаев, М.Дулати атындағы Тараз Мемлекет­тік университетінің филология және журналистика факультетінің оқытушысы Бақытжан Мақашов және Тараз қаласы Мәдениет және тілдерді дамыту бөлімінің басшысы Бақыт Тоқсанбаева қатысып, қазақ поэзиясында өзіндік үні бар белгілі ақын Қайырбек Асановтың шығармашылығы мен жарты ғасыр бір шаңырақ астында бақыт­ты өмір сүріп келе жатқан аяулы жары, «қа­зақ поэзияның ақ гүлі» атанған Күләш Ахметова туралы ойларын ортаға салды.
Кез­десудің құрмет­ті иесі, сексеннің сеңгіріне шыққан ақын Қайырбек Асанов өзінің шығармашылығы мен еңбек жолы туралы әңгімелеп, оқырмандар сұрақтарына жауап берді. Өңірді кітап оқумен қайта қауыш­тырған білікті басшыларға алғыс айт­ты.

Марат Құлибаев,
Жамбыл облысы