ҚР Ұлт­тық кітапханасында Қазақ­стан Жазушылар одағының ұйымдастыруымен Ұлы Жеңістің 80 жылдығына арналған «Жеңіс жырлары» ат­ты әдеби-сазды кеш өт­ті. Кеш шымылдығы Мемлекет­тік Әнұранмен ашылып, көрермен қауымға ерекше рух, асқақ серпін сыйлады.

Алғашқы сөз Қазақ­стан Жазушылар одағының Басқарма төрағасы Мереке Құлкеновке ұсынылып, ол Жеңіс рухы мен әдебиет­тің байланысы жайлы тағылымды ой қозғады. Бұдан соң көрермендер назарына Жазушылар одағы әзірлеген соғыс даласында туған қаламгерлік мұралар, майдангер ақын-жазушылардың естелігі туралы арнайы бейнеролик көрсетілді.
Қаламымен жауға қарсы тұрған қазақ қаламгерлерінің тағдырын көзбен көріп, жанымен сезінген жандар — майдангер жазушылардың жақындары да естеліктерімен бөлісті. Олардың қатарында қазақтың қайталанбас қаһарманы, аты аңызға айналған батыр Бауыржан Момышұлы атамыздың келіні, қоғам қайраткері Зейнеп Ахметова және соғыс даласында қаламын қаруға айналдырған қазақтың көрнек­ті қаламгері, майдангер Қалмұқан Исабаевтың өмірлік жары Забира Исабай апайымыз болды. Олар майдан даласында болған қос қаламгердің өмірлік естеліктерінен, келешек ұрпаққа аманат қылып мол мұрасы жайында сөз қозғады.
Сонымен қатар әл-Фараби атындағы ҚазҰУ-дың журналистика факультетінің студент­тері соғыс уақытында жазған ақындардың жырларын оқыды. Бұдан соң бүгінгі күннің көрнекті қаламгерлері Қасымхан Бегманов, Бауыржан Жақып, Ерлан Жүніс, Назым Слямқызы, Аманғазы Кәріпжанов, Бүбішхан Тікебаева өз туындыларын оқып, жеңіс рухын поэзия тілімен өрнектеді.
Кеш аясында халық ақыны, жырау Нұрпейіс Байғаниннің «Жеңіс жырлары / Песни Победы» ат­ты қос тілде жарық көрген жаңа жыр жинағының тұсаукесер рәсімі өт­ті. Аталмыш туынды — батырлық пен асқақ рухтың шынайы үнін жеткізген, тарихи құндылығы жоғары туынды ретінде бағаланды. Кеш қорытындысында Алматы қаласы Түріксіб ауданы №203 жалпы білім беретін мектептің ұжымы «Бейбіт күн тілегі» ат­ты патриот­тық әнін хормен орындап, көпшіліктің көкейінде отансүйгіштік рухты асқақтатып, тыңдарман жүрегін тербет­ті.
Шара соңында Қазақ­стан Жазушылар одағының Басқарма төрағасы Мереке Құлкенов Қазақ­станның еңбек сіңірген қайраткері, жазушы Василий Шупейкинге және көрнекті ақын Сағынгерей Байменовке Қазақ­станның Құрмет­ті жазушысы атағын табыстады.

Қазақ­стан Жазушылар одағының
Баспасөз қызметі