Жуырда Лев Гумилев атындағы Еуразия ұлттық университетінде Қазақстанның еңбек сіңірген қайраткері, Халықаралық «Алаш» әдеби сыйлығының иегері, жазушы, филология ғылымының кандидаты Тұрлыбек Мәмесейіттің «Тау мінезі» атты кітабының таныстырылымы өтті.
Іс-шараға филология ғылымының докторы, профессор Рақымжан Тұрысбек модераторлық етті. Кітаптың тұсауын Еура­зия Ұлттық уни­вер­ситетінің акаде­мия­лық мәселелер жөніндегі прорек­торы Ардақ Бейсенбай, Ұлттық ғылым академиясы­ның академигі Шерубай Құр­манбайұлы, Жазушылар ода­ғының Астана филиалы директоры, «Түркістан» газетінің бас редакторы Бауыржан Бабажанұлы, белгілі қаламгер Ораз Қауғабай, филология факультетінің деканы, ақын Серікзат Дүйсенғазы кесті.
Парламент Мәжілісінің депутаты, белгілі ақын Жанарбек Әшімжан: «Өмірін шығармашылыққа арнаған тұлға. Қа­ламгердің қай туындысын оқы­саңыз да, уақыттың тынысын, адамның іс-әрекетін, кейіпкерлерінің мінезін табиғи болмысымен қоса сезіне аласыз. Тұрлыбек аға Астана қаласының рухани тұрғыда өсіп-өркендеуіне де өлшеусіз үлес қосты. Шәкірт тәрбиелеу ісінде тер төкті. Алдағы уақытта қаламгердің есімін мәңгі есте қалдыру мақ­са­­тында өзі тұрған үйдің қабыр­ға­сына ескерткіш тақта орнатып, Жазушылар ода­ғы­ның Астана қалалық филиа­лы­мен бірлесіп, түрлі іс-шара­ны қолға аламыз», – дей келе, Тұрлыбек Мәмесейіт­тің есімін ел есінде қалдыру мәселесіне тоқталып, бастама көтерді. «Тоғысқан толқын», «Зерделілік айнасы», «Дидар», «Беторамал», «Түсіме тау кіреді», «Бесік пен несіп», «Плач охотника», «Әулие-шоқы», «Тектінің кегі», «Тау», «Қарқара көтерілісі», «Жасын түскен маусым», «Таң­жарық» т.б. кітаптардың авторы Тұрлыбек Мәмесейіт туралы академик Шерубай Құрманбайұлы, Жазушылар одағы Астана филиалының директоры, ақын Бауыржан Бабажанұлы, ЕҰУ филология факультетінің деканы, ақын Серікзат Дүйсенғазы, Алма­тыдан онлайн қосылған белгілі жазушы, сыншы Нұрдәулет Ақыш пен ақын Дәулетбек Байтұрсынұлы т.б. қаламгерлер мен әдебиеттанушылар ой-пайымдарын ортаға салды.