Жуырда «Atameken» баспасынан ақын-журналист, Қазақстанның еңбек сіңірген қайраткері, Жастар одағы және Халықаралық «Алаш» әдеби сыйлығының иегері, Қазақ­стан Жазушылар одағы басқарма төрағасының орынбасары Қасымхан Бегмановтың 15 томдық шығармалар жинағы жарық көрді.

Ақынның өзі бұл жинақ жайында: «Иә, бұл 15 томдық кітаптар – жарты ғасырға созылған шығармашылық ауыр бейнет­тің өтеуі. Қаршадайымнан басталған ақындық мұңлы жолды жалғыз жүріп өт­тім. Мені Алла, сосын, аяулы аруақтарым қолдады. Періштелер қақты. Бұл жолдың бойында маған кімдер кездеспеді, не болмады? Басыма қандай қиыншылық туса да жігіт­тік, адамдық арыма қылау түсірген жоқпын. Ала жіп ат­тамадым. Ешкімді дат­тамадым. Біреудің қайтарғам жоқ бақ-талабын. Жаманды ақтамадым. Кек сақтамадым. Топқа қосылмадым. Әлдекімдердің сойылын соққан жоқпын. Басты мұратым – жазу болды.Өлеңдерім екі том болды. Кезінде абыз ақсақал, зерт­теуші-ғалым Жағда Бабалықұлымен және қазақтың жүзге жуық ғұламаларымен сұхбат­тастым. Соның нәтижесінде, «Этнографпен әңгіме» кітабым мен «Дәстүр: кеше, бүгін, ертең» ат­ты этнографиялық сыр-сұхбатқа негізделген, ауқымды төрт­томдық еңбегімді жаздым. Сол сұхбат­тасқан ғұламалардың көбі қазір жарық дүниеде жоқ. Бұл әрбір қазақтың шаңырағында тұруға тиіс, ұрпаққа керек, әбден сұрыпталған дүние еді.
Сіздер жақсы білесіздер мен кезінде Мұстафа Шоқайдың жолымен жүріп өт­тім. Жалғыз емес, өзім ұйымдастырған экспедициямен бірге… Мұстафа үшін Өскеменде ұлтшыл орыстармен сот­тастым. Бұл сот жайлы сол тұстағы бүкіл баспасөз шулады. Соның нәтижесінде екі том кітап жаздым.
Иә, 15 томдық шығармалар жинағымды баспаға бес адам дайындады. Соңғы томды құрастырып, оқып шыққан «Простор» журналында қызмет істейтін, дарынды қаламгер Татьяна Бакановаға, әкелі-балалы азамат­тар – «Atameken» баспасының директоры Қайрат Жолдасұлы мен дизайнер-бет­теуші Дәулет Қайратұлына ағалық алғысымды айтамын.
Студент кезімнің, бозбала жастық шағымның куәгері, алғашқы жазған өлеңдерімнен бастап, бүгінге дейін әрбір жырымды жинап жүретін астаналық ұлағат­ты ұстаз Роза Есенбаева мен іскер маман, он бес жылдан бері менімен бірге «Дәстүр» этнографиялық журналын бірге шығарып келе жатқан талант­ты журналист, ұйымдастырушы, баспагер Салия Абдикаримованың еңбектеріне табыс тілеймін. Қазақтың осы екі аяулы қызына төңіректері түгел, денсаулықтары зор, дәулет­ті, сәулет­ті, ұзақ, бақыт­ты ғұмыр кешсе екен деген тілегімді айтқым келеді», – деп жазды әлеумет­тік желіде.
Ендеше, Қасымхан Сейітханұлына алдағы уақыт­та да шығармашылық табыс тілей отырып, қазақ руханиятына қосқан елеулі еңбегі үшін барша оқырмандары атынан алғыс білдіргіміз келеді.