Бала қиялының бағбаны
Құныпия Алпысбаев,
филология ғылымдарының докторы, профессор
Қазақ әдебиетінің тарихында журналистік қызметін жазушылық қырымен байланыстыра отырып, шығармашылығын ұрпақ тәрбиесіне бағыштаған қаламгерлер аз емес. Олар ұрпақ санасына ұлттық рух орнатып, бойларына ұлттық салт-дәстүр қалыптастыруды көздейтін шығармалар жазып, балалар әдебиетінің өркендеуіне белсенді атсалысты. Солардың бірі – өмір бойы «Қазақстан пионері» газетінде, «Балдырған» журналында, шетелдегі қандастарымызға арналған «Шалқар» газетінде жауапты жұмыстар атқарып, балалар басылымдарының еңбекторысы болған Құрманбай Толыбаев. Ол тірі болса, биыл тоқсанға келер еді. Құрманбай тағдыры өз замандастары тағдырына ұқсас та, ұқсас емес те болатын. Ұқсастығы – кіндігі атақоныс-атамекенінде кесіліп, атамекенде топырақ бұйырса, ұқсамайтыны – ғұмырының ширек ғасырын, балалық шағы мен жігіттік кезеңін шет жұртта өткізіп келуі.
Құрманбай Толыбаев өмірге келген жиырмасыншы ғасырдағы жиырмасыншы жылдардың орта кезімен отызыншы жылдары халықты мылтықсыз-ақ қырылуға мәжбүр еткен Сталиндік-Голощекиндік нәубетке ұласып, аштық пен қуғыннан жан сауғалау үшін қалың ел жан-жаққа жапырыла көшкені белгілі. Сол көптің ішінде жалғыз ұлы – бес жасар Құрманбайды арқалап алып, Шығыс Түркістанға тартып отырған Игілік би де бар еді. «Малым – жанымның садағасы» дегендей, өкімет тартып алғаннан қалған мал-мүлікті түгел жұртқа тастап, өз бастарын ғана әрең жеткізгендер тіршіліктің небір ауыр азабын кешті. Ұрпағын аман қалдырып, ұлттық салтын, тілі мен дінін сақтау жолында неге болса да көнді. Міне, сол қазақ халқының басына зұлмат әкелген жылдардың қияметін тартып, тағдырдың салмағын мойнымен көтере, жаншыла жүріп ер жеткен ұрпақтың қатарында белгілі жазушы Құрманбай Толыбаев та бар еді. «Мен Асы жайлауында жаз кезінде құрман айт күні туыппын. Сондықтан атымды Құрманбай қойған екен. Бұл қазіргі Алматы облысы, Шелек ауданының территориясы. 1931 жылы салықты өте көп салған соң, осы жылдың күзіне қарай біздің үйдің малы таусылуға айналaды. Одан әрі күнкөріс тіпті қиындай түсетіні айқын болады да, екі түйе, бірнеше атпен екі үйді бастап әкем Қытай жеріне, Құлжаға түнделетe шығып, бірнеше тәулік бойы жүріп әрең дегенде жетеді. Мені тордың ішіне дорбамен жотасына таңып алып өтіпті», – деген еді кезінде Құрекең, әкесі айтқан әңгімені еске алып. Әрине, ол жақта өткен соң да өмір жүгі жеңіл бола қойған жоқ. Ес біліп, етек жабуға жеткізбей-ақ тағдыр салмағы Құрманбай үшін ауырлай түсті. Сегізге толмай жатып 1934 жылы шешесі қайтыс болады. Жасы келіп қалған әке мен жалғыз әпке жанын ауыртып, жүректерін сыздатқан Құрманбай тағдыры екені сөзсіз. Тағдыр ісіне не шара? «Басқа түссе баспақшыл» деген емес пе. Көнбеске амал жоқ. Әйтеуір бір тәубе етерлік жәй – Құрманбайдың Құлжадағы үш-төрт ағайынды нағашы ағалары сүйеу болады.
Игілік те әдеттегі көптің бірі емес, ел ішінде беделі бар, өмірге ойлы көзбен қарайтын, көңілге тоқығаны көп, салауатты адам болатын. Ептеп ескіше сауаты бар ол жиырмасыншы ғасыр басындағы қазақ зиялыларының еңбектерімен таныс болып, қолына түскенін жинап та жүретін. М.Дулатовтың «Оян, қазақ!» жинағының Игіліктің үйінде болуы, оны әке аманатындай сезінген Құрманбайдың өмір бойы сақтап, тәуелсіздік таңына жеткізуі соның бір айғағы.
Өзі жете алмаған оқу-білім төріне ұрпағым жетсе деп ойлайтын. Сондықтан Құрманбайды сол аймақтағы үлкен шаһар Құлжада оқыта бастайды. Құрманбай да зерек, оқуға ынталы еді. Сабақты өте жақсы оқумен бірге әдебиетке деген сүйіспеншілігі ерте оянды. Әдеби кітаптарды, газет-журнал беттерін қалдырмай оқып, рухани байи береді.
Жазғы демалысты жайлау төсінде мал бағып, көкпар тартқан қырдағы елде өткізетін болашақ жазушы, қаймағы бұзылмаған қазақ салтының құшағында ер жетті. Осындай сахаралық өмірдің бел ортасында жүріп, қыз ұзату, келін түсіру барысындағы айтыс, сыңсу, жар-жар сияқты халықтың өнер үлгілерін көзбен көріп, құлақпен есту, ежелгі жыр, дастандарды отбасында, ошақ қасында тыңдап өсуі оның кейінгі шығармашылығына жемісті әсерін тигізгенін көруге болады. Осылайша ол бір жағынан ауыз әдебиетінің сан түрлі үлгілерінен тікелей сусындаса, екінші жағынан жазба әдебиеттің тағылымын танып өсті.
Болашақ жазушының бозбала шағы Шығыс Түркістандағы түрлі әлеуметтік қақтығыстар, қилы төңкерістер кезеңіне сәйкес келеді. Жиырмасыншы ғасыр басындағы қазақ даласындағы ұлттық ояну дәуірінің, өркениетке ұмтылу идеяларының бұл жерде де ұшқын атып, жаңғыра бастаған шағы еді. Ұлт-азаттық үшін күрескендердің, ағартушылық бағыттағы азаматтардың озық идеялары кейбір кітаптары көшкен елмен бірге барып жүзеге аса бастаған. Туған жерінде аттарын атауға болмайтын Шәкәрім Құдайбердиев, Ахмет Байтұрсынов, Міржақып Дулатов, Мағжан Жұмабаев еңбектерін бірлі-жарымды көзіқарақты зиялылар оқу-ағарту жұмыстарында пайдалана білді. Құрманбай Толыбаев та осы аяулы азаматтардың аттарын біліп, шығармашылық өміріне ойлы көзін сала бастады, алған білімін, көрген тағылымымен ұштастыруға ұмтылды. Көңіл-күйін, өмір түйінін, тағдыр иінін, заман тынысын өлең тілінде көрсетуге талпынды. Алғашқы өлеңдері жарияланып, көңіліне ұялаған қуаныш дем бергендей болды.
Өсе келе Құлжадағы түрлі мәдени шараларға, газет-журнал істеріне белсене атсалысты. 1934 жылы Құлжадағы гимназияға қабылданып, оның ұйғыр бөлімінің толық орта білім сыныбын 1944 жылы бітірген Құрманбай бірер жыл ауылда болады да, 1945 жылдың күзінде ғана осы қаладағы қазақ мектебіне мұғалім болып орналасады. 1947 жылы «Төңкеріс таңы» газетіне шақырылады. 1948 жылы «Одақ» деген әдеби, саяси әлеуметтік журналы ашылып, соған ауысады. Белгілі жазушы Бұқара Тышқанбаев та осында істейтін. 1950 жылы март айында журнал Үрімжіге көшеді де, Құрманбай бірге кетуге келіспей Құлжада қалып қояды. 1950-1951 жылдары «Халық хабаршысы», «Жаңа жол» газеттерінде істейді. «Жаңа жол» 1952 жылдың 1 қаңтарынан бастап «Іле газеті» деп аталады және алғашқы күннен бастап 1955 жылғы 3 тамызда Қазақстанға қайтқанға дейін Құрекең осы газеттің бас редакторы болады.
Шығыс Түркістандағы қазақ әдебиеті мен өнерінің көш басшыларының бірі Бұқара Тышқанбаев ұйымдастырған ойын-сауық, әдеби іс-шаралардың белсенді мүшесі болады. Күрекеңнің әдеби өрісінің кеңейіп, жазуын қалыптастыруда алғашқы кезде осы аға буын жазушының көмегі аз болмаған. Өмірінің сол бір кезеңі туралы Құрманбай Толыбаев былайша сыр ағытады: «Өзінің қоғамдық жұмысын Үрімжіде оқытушылықтан бастаған Бұқара бізге қарағанда ысылған еді. Білгенін басқаларға үйретуге жалықпайтын. Білімін жетілдіруіне қол ұшын беретін. Бір күні маған сары қағазбен қапталған кішкене қолжазба кітап берді.
– Мынаны ешкімге көрсетпей оқып шық.
Ішкі бетінің басында «Шұғаның белгісі» деген тақырып тұр. Кімнің жазғаны белгісіз. Ешкімнің аты, жөні жоқ. Ол кезде Құлжа театрында «Шұға» атты пьеса жиі ойналатын. Оны да кім жазғанын білмейміз. Сол «Шұғамен» қатысы бар ма екен деп ойладым да, түнімен көз ілмей, отыз-қырық беттік кітапшаны екі-үш қайтара оқып шықтым.
– Мынауыңыз тамаша әңгіме екен, кім жазған? – деп сұрадым ертесіне апарып беріп. Бұқара әлденеден сақтанғандай сыбырлай сөйледі:
– Аузыңнан шығарма. Бұны жазған Бейімбет Майлин деген кісі. «Халық жауы» болып кеткен…
Ондай «жаулардың» Совет елінде және өзіміздің Құлжа қаласында да болғанын білетінмін. Ішім удай ашыды. Бірталай ағаларымыз, туған-туыстарымыз «жау» боп жойылған. Сондай серкелерінен айрылған халықтың жас түлектері енді-енді түлей бастаған-ды».
Осы алғашқы адымдағы түлектердің алдыңғы тобын әдебиет саласында Бұқара басқарған еді. Бұқараның Құрманбай үшін ағалық тағылымы Үрімжіге кеткен кезде де толастаған жоқ. Бұқара Үрімжіден хат жолдап, Құрманбайдың газетке шыққан өлеңдеріне сын-пікір айтып, ақыл беріп отырды. Ағаның ақылы да бос кетпеді. Іні көңілін өсіріп, жетілдіре берді, қанаттандыра түсті.
Өз елінде ұмытыла бастаған Әсеттің әншілік мектебін қайта тірілткен, әншілік өнердегі өзіндік өрнегін қалыптастырған қазақ халқының ғажайып әншісі Дәнеш Рақышевпен бірге тағдырлас өмір кешіп, сол аймақтағы халықтың ән, күй мұрасын, әсіресе, Әсет әндері мен өлеңдерін жинауға араласты. Әсет өмірінен алып жазған «Әсет» романын жазуы сол кездегі ерекше еңбектің нақты көрінісіндей.
Бұл орайда «Шалқы, Сайрам!», «Келші, аяулым», «Айнабұлақ», «Мақтанышым, елім», «Аңсаған аяулым», «Саясында алманың», «Туған жер», «Достарым» сияқты Дәнеш әндеріне жазған өлеңдері бір төбе. Сөйтіп, әрқилы қоғамдық-әлеуметтік істерге тыңғылықты араласа жүріп, жазушылық қадамын шыңдай берді, тақырып аясын кеңейте түсті. Туған халқының кішкентай да болса қажетіне жарауға ұмтылып, әке үмітін ақтау мен тілегін орындау мақсатында осылайша ер жетті. Алда тоқсан тарау жол жатты.
Ал аяулы әкенің көп армандарының бірі сәтін түсірерлік күн болса, туған жермен қайта қауышу болатын. Алайда, оған жетпеді. Әкесі көз жұмғанша айта беретін туған жер жайлы сыр, оған деген ыстық махаббат Құрманбайдың көкірегіне ұялап, құлағынан кетпеді. «Қайран туған жер! – деуші еді, әкесі Игілік қамыққан көңілмен, артта, алыста қалған атақоныс, атамекенін есіне алып. Қайран Асы, қайран Қарқара! Көрер ме екем тіршілікте?» – деп алып, туған өлке туралы сағынышқа толы сыр төгер еді. Мөлдір бұлақты, көк майсалы, сыңсыған қарағайлы, табиғат көркіне бай сұлу өлкені аңсаған көңіл, елжіреген жүрекпен толғайтын. Қыс қыстау болатын Бақай тауының етегінен басталып, Шелек өзенінің құярына дейінгі қорысты шүйгін Іленің бойы, Тораңғысы мен жыңғылы мол сексеуілді тоғай, атты адам ішіне кірсе көрінбей кететін, тіпті адасып әрең жол табатын қалың жынысты алқап елдің ырысты мекені еді ғой. Асқар Алатаудың қия шатқал, адырлы арналары мен малға құтты өріс, салқын жайлау Асы жайында, қой, жылқы сонылап барып жайылатын, шыбынсыз жаздың белгісіндей, қызығы мол жәрмеңкелі атақты Қарқара туралы әке айтқан әңгіменің әсері Құрманбайдың бала көңілін баурап, туған Отанға деген сағыныш сезімін үрлеп, қиялына қанат бітіре жөнелетін, жер жаннаты сұлу өлкені өзінше ойға елестететін, қиялға бататын. Сөйтіп жүргенде, Құрманбайдың бұғанасы қатып есейгенін, жігіт болып ел қатарына қосылған зиялы азамат ретінде игілікті іс атқарған кезін көре алмай әке де өтті өмірден. Ақыры әке жетпеген тілектің бірі, атамекенге оралудың сәті оған елуінші жылдардың ортасында туады. Көзі ашық, көңілі ояу зиялылардың қатарында жүрген Құрманбай алғашқылардың бірі болып ұмтылып, 1955 жылы Қазақстанға қайта оралады.
Осылайша жастық шағын, ширек ғасырға жуық ғұмырын Шығыс Түркістанда өткізген жазушы өз Отанына оралған соң, ересек тартқанына қарамай, білім нәрімен терең сусындау мақсатында жоғары оқу орнына түсіп, Қазақ мемлекеттік университетін тәмамдаған соң, мерзімдік басылымдарда ұзақ жылдар бойы қызмет атқарды. «Қазақстан пионері» мен «Балдырған» журналында бөлім басқарды, «Шалқар» газетінде бас редактордың орынбасары болды. Поэзия, проза жанрларында бірдей қалам тартатын Қ.Толыбаев үздіксіз ізденіп, талмай еңбектеніп өзіндік өрнегі бар танымалы балалар жазушысына айналды. Оның балаларға арналған хикаят, әңгіме-аңыздарының тұтас болмысында белгілі жүйе, авторлық идея, стильдік өрнек жатыр. Әр алуан табиғат құбылыстары, түрлі аң, құс, жан-жануар өсімдік әлемін көркем образбен бейнелеу арқылы тылсым дүние жұмбағын ашып береді, бала қиялын өсіруге, тынымын кеңейтуге әрекет жасайды.
Балалар әдебиеті… Адам өмірінің осынау алғашқы он-он бес жылын бөліп алып, оған бағышталған көркем сөз түріндегі шығармаларды «балалар әдебиеті» деп атау жайдан-жай болмаса керек. Өйткені, әр ұрпақтың ес кіре бастаған кезінен есейген кезіне дейінгі аралықта ұлттық сана қалыптастыратын, эстетикалық әсер ұялататын, қоғамдық тәрбие беретін ерекше құралдың бірі – сөз өнерінің осы саласы екені әркімге де белгілі. Бұл тұрғыдан келгенде де, бүгінгі қазақ балалар әдебиеті жарық дүниеге қылтиып көрінген күні-нен бері қарай осындай келелі, көп салалы мақсаттарынан бір жалтарған емес деуге болар еді. Әрқилы қоғамдар, олардың жүргізген идеологиясы, кезеңдік науқандар қанша қақпайласа да, ол өзінің күре жолы – адамгершілік бағытынан айнымай, қайта соны кеңейтіп, тереңдете берді.
Кешеден бүгінге келуде дәстүр жалғастығы болғандығы ақиқат. Барды бағалап, саралай білу көпшіліктің керегіне жарата түсу бүгінгі күннің басты міндеті болмақ. Бір кезде қазақ мектептерінің қысқаруымен байланысты ұлттық балалар әдебиетінің де ығысқаны рас. Соған қарамастан жас ұрпақты туған елін сүюге, табиғаттың сырларын білуге, ұлттық дәстүрін ұстанып, халқының тарихын білуге, асыл арманға жетелейтін шығармалар қатар түзегенін ризашылық көңілмен айтуымыз керек.
Міне, осындай шығармалармен балалар әдебиетінің бүгінгі биікке көтерілуіне үлес қосқан қаламгерлердің сапында Құрманбай Толыбаев та бар.
Байыптап қарасақ, қазақ ауыз әдебиетінің біз білетін, көп таралған нұсқаларынан балаларға арналмағаны кемде-кем. Бірінде батырлыққа баулиды, бірінде адамгершілікке, жақсылыққа жөн сілтейді, бірінде табиғат сырын білуге, тіршілік әлемінің құпиясын барлауға бағыттайды, бірінде қиял-арманға жетелеп, бірінде қарапайым еңбекке тәрбиелейді.
Сондықтан ауыз әдебиеті халықтың сәбилік дәуірінің мұрасы болуымен қоса, халық қамын ойлап, оларға ерте бастан жан-жақты тәрбие беру мақсатында шығарманы балаларға арнайы тудырған да сияқты. Сол арқылы түрлі наным-сенімдер, салт-дәстүр бала көңіліне ерте ұялап, ұлттық психология сақталып, тұрақты дамып отырған.
Бала қиялын баурап алатын, қалыптан тыс жағдайлардың оқиғаға желі болуы – ауыз әдебиетіндегі ұтымды үрдіс… Міне, осы өнегелік сипатты меңгеруге тырысқан ақын, жазушылар өз шығармаларында қиял-ғажайыптық көріністерді, аңыздық сарындарды мол пайдаланады.
Жазушы Қ.Толыбаев ерекшелігінің басты белгілерінің бірі, шығармаларын ауыз әдебиеті үлгісіндегі аңыздық, хикаяттық, мифтік сипатта жаза отырып, бүгінгі өмір тынысын кірістіре бейнелеуінде жатыр. Айталық, «Құзғын», «Түлкінің табаны», «Есер қарға», «Қояндар», т.б. шығармаларында хайуанат жайлы ертегілердегі образдық үлгі алынғанымен, жаңа философиялық түйіндер жасалады. Ал «Әупілдек әупілдекті қалай үйренді», «Шауқарға», «Сауысқан», «Жарғанат неге түнде ұшады», «Жайра» сияқты әңгімелерінде құстар мен мақұлықтардың жеке тіршіліктері суреттеледі.
Көлемі бір-ақ бет «Құзғын» әңгімесінде бір ғана деталь арқылы үлкен тәрбиелік мәні бар ой тастайды. Құлқын үшін қандай да бір іс-әрекеттен қайтпайтын адамдар тобының жас ұрпақ қана емес, ересектерді де жаман қылықтан жиренуге шақыратын образы жасалған мұндай шығарманың мәні зор. Мысалы: «Құзғынның құлқын құмарлығы Көкқарғаның құйқасын шымырлатты. Ызалана шаңқылдап, іші өртенгендей күйінді. Оның қаныпезерлігінен, қара ниетінен түңіліп, тақылдата таңдай қақты да, үрейленгендей ұша жөнелді. Ал тұқымының өлігін қадірлейтін ниет Құзғында болған жоқ», – деп түйін жасайды. Қырда туып өскен кім-кімнің болса да, әңгімені оқып шыққан соң, ес білгелі көкірегіне ұялаған Құзғын туралы жағымсыз ұғымның сырына енді қанып, мәніне енді түсінгендей болары шындық. Бұл жерде адам кейпінде суреттелген Құзғын бейнесі керісінше Құзғын арқылы елес беретін адам тұлғасы жатыр. Жазушы шеберлігін айқындайтын тұстың бірі осы болса керек.
Құс екеш құсқа дейін өз ұрпағының келер күніне кемел үміт артатынын бейнелеп бере келіп, «Шауқарға» әңгімесінде автор адамға тән арман мен тілекті ашып көрсетеді. Бірақ сол арманның орындалуы текке қатысты, генетикалық негізге байланысты болатынын ескеріле бермейтін сияқты өмірде. Мына «Шауқарға» әңгімесінің астарында осы бір құбылысты еске салып тұрғандай. Көркем сурет жасалып, тартымды тілмен баяндалатын шағын әңгіме оқушысын зеріктірмейді. Қайта қиялын тербеп, ойлануға жетелейді. «Көкек» әңгімесінде көкектің атына байланысты халықтық аңызды авторлық баяндау арқылы жаңа сюжеттік желімен байытып, қызықты образ, терең философиялық түйін жасайды.
Бір айта кететін нәрсе, Қ.Толыбаевтың кез келген әңгімесінің болмыс-бітімінде мультфильмге арқау болатын сюжеттік желі жатқандығы, мульфильм сценарийіне тән жинақты стильдік өрнек айқындылығы деуге болады.
Жан-жануарлар мен жәндіктерді кейде жеке адам мағынасында алып отырса, кейде тұтас халық ретінде бейнелейді. Хайуанаттар жайлы ертегілерді еске түсіретін «Қояндар» әңгімесінде жазушы қоянды халық мағынасында ала отырып, өмірлік мәні бар философиялық ойдың астарын кейіпкер бейнесі арқылы ашуға тырысады. Дүниедегі ең қорқақ деген қоянның өзі өмірлік тәжірибені ой қорытындысына салып, ауызбірлік, ынтымақтастық идеясын берік ұстану нәтижесінде жер бетінде құрып кетуге таянған ұрпағын сақтап қалу, әрі қайта өрбіту жолы дәл бүгінгі таңдағы өз халқымыз үшін ескерту де, өнегелі қағида да дей аламыз. Қ.Толыбаевтың әрбір әңгімесінде қызықты сюжет, тартымды баяндау шеберлігімен қоса осындай мағыналы ой, тағылымды түйін жатуынан көркемдік сапаны, шеберлік үлгіні көреміз.
Жалпы, Қ.Толыбаевтың жазу ерекшелігінің бірі, қысқа қайыру мен бір әңгімеде бір ғана деталь төңірегінде ой қорыту. Айталық, «Қыранның ұясы», «Қыран мұңы» әңгімелерінің әрқайсысында қыранның жеке-жеке әр түрлі қыры суреттеледі. Балаларға керек танымдық қуат дейтініміз осы.
Ұтымды кейіптеулер арқылы нақты сюжетке құрылып, жанды бейнеде көрсетілген «Әппақ қыс», «Көк ала бұлттар», «Самал», «Күн бөбегі», «Көк теректер», «Соқпақ», «Қаңбақ», «Көлеңке», «Тау мен өзен», «Таулар сөйлейді», т.б. әңгімелер философиялық ойларға негізделіп, бала психологиясын баурап алатын әсері мол шеберлікпен баяндалады.
Поэзиядағы ұлы Абай салған жаңа әдеби дәстүрдің бірі – табиғат құбылыстарын жанды бейнеге айналдыру үлгісін Қ.Толыбаев өзінің шағын прозалық шығармаларында ерекше дамыта түскен. Бұл тұста ескертіп айтар нәрсе, қыс құбылысын ұлттық бояу, өрнекпен сурет жасап, соныдан соқпақ сала қайталанбас бейне сомдаған Абай ізімен кетпейді. Қ.Толыбаев бір мезгілдің өзін диалектикалық даму, күн санап өзгеру, уақыт ырғағымен ауысу күйін ертегілік cипатпен жұптастыра суреттейді. Шығарманың көркем жасалған реалистік болмысына қызыға қарап, ертегілік сипатына еліте түсеміз.
Кейіптеуді барынша байыппен қолданып, табиғат құбылысының бір сәті Аппақ қыстың пейзаждық жанды портретін былайша көз алдымызға әкеледі: «Біздің жаққа Аппақ Қыс түн ортасында жетті.Үсті басы үлпілдеген мақтадай ақ ұлпа, түймедей бір қара меңі жоқ. Алабұрта әкіреңдеп, буырқана бұлқынбады. Одыраңдай топырламады. Сескене секіріп, секеңдемеді. Манаурай ұйқыға батқан елдің пырдай ұйқысын бұзған жоқ. Қайта тәтті ұйқыдағы әлемнің ың-шыңсыз тыныштығына секем тудырғысы келмегендей салмақпен, сабырмен, асқан сақтықпен қимылдайды. Ақ жібек орамалға көміле оранған. Құшағын далита жайып жіберіп, жалпақ өңірін айқара ашады да, терісін тұрған жел өтіне тосқауыл құрады. Аяғын да шықырлатпай, тықыр шығармай, ақырын ғана еппен адымдайды. Кеудесін тік ұстап тұра қалып, төңірегіне суылдата ақ күмістен шашу шашады». Қимыл үстіндегі, жанды әрекет иесі адам кейіпті Аппақ Құс бейнесі осы тұрғыда баяндалады.
Нақты сюжет арқылы тірі бейнеге айналған кейіпкерлер, Аппақ Қыс, Сары Аяз, Ақ боран, Күн-ана, Алатау өзара тіл қатысу, іс-әрекет үстінде көріну барысында мінез ерекшеліктері ашылады. Өмір заңының бұлқыныс қалпы мен кезекті ырғақпен ауысып отыру философиясын көрсетеді.
Халықтық ұғым-түсінікті табиғат анамен байланысты толғап, сананы танымдық арнаға бұратын хикая-аңыздың бірі – «Наурыз ата және оның балалары» атты шығарма. Алпыс жылдан астам уақыт бойы ұлттық дәстүр ретінде мейрамдау рәсімінен шығып қалған Наурыздың мүлдем ұмытылып, жоғалып кетпеуіне мұрындық болған еңбектер деп, негізінен ақын-жазушылардың жазған әр түрлі жанрдағы әдеби шығармалары мен ауыз әдебиеті оқулықтарын айту керек. Соның бірі – қаламгердің осы аталған еңбегі.
Қ.Толыбаевтың аталмыш еңбегінде Наурыз туралы ұғым қалыпты түсініктен өзгешелеу, ауқымдылау күйінде алынады. Жыл мерзімін құрайтын төрт мезгілді Наурыз атадан тарайтын Қыс пен Күз деген екі ұл, Көктем, Жаз деген екі қыз ретінде суреттеп отырып, әлемнің жаратылу құпиясын қиял-ғажайыптық тұрғыдан көркем бейнелеп береді. Сырлы әлемнің сырын тануға меңзейді. Баяндау тәсіліндегі ертегілік стиль тақырыпты меңгеріп, автордың мақсатына жетуіне ұтымды роль атқарып тұр.
Тегінде Қ.Толыбаевтың әңгімелеріндегі сюжет ықшамдылығы, оқуға жеңіл баяндау тәсілі, жазушының бала психологиясын терең білетін қасиетін танытады. Әңгімелердегі пейзаж көріністері, қызық оқиға желісі жасөспірім оқырманды алға шақырады. «Күн бөбегі», «Көк ала бұлттар», «Қызыл гүл мен Бұлбұл», «Ақ гүл» әңгімелерінің танымдық қуаты мен әсері айрықша. Балаларға құрғақ ақыл айтқаннан гөрі, осындай мазмұнында танымдық мәні бар әңгімелердің пайдасы зор болмақ. Табиғаттанудың түрлі салалары бойынша жағдай баяндаумен салыстырғанда, аң, құс, жәндік, мақұлықтар мен жануарлардың қилы іс-әрекеттерін бейнелеп беруге байланысты көрінетін мінез-құлқы, жеке қасиет ерекшеліктері балалардың есінде әлдеқайда жақсы сақталады. Оның үстіне, аң мен құстың жағымсыз қылықтары бала көңіліне бірден жиіркеніш сезімін тудырып, ондай істен аулақ болуға тырысады. Мысалы: «Өз даусына өзі мәз» атты әңгімеде мағыналы тіршіліктен, еңбек дағдысынан, әсемдік әлемі, өнер ұғымынан мүлде хабары жоқ Көкек бейнесі жағымсыз әсер етсе, ондағы Бозторғай, Бұлбұл бейнесі өнерлі, еңбекқор, үлгілі мінез иесі болуға шақырады.
Жазушының қай шығармасын алсақ та, ойы көркем, тілі жатық, оқиғасы қызық, әрі танымдық сипаты мол болып келеді. Ол «тоқырау» жылдарының өзінде жаттанды коммунистік тәрбие насихатын жасамай, жас ұрпақты табиғат аясына шақырып, қиялына қанат бітіруге, сырлы әлемнің құпиясын білуге үндеген. Адамгершілік қағидаларын көңілге тоқып, инабаттылықты қалыптастыруға, еңбек тәрбиесіне, барды бағалай білуге жөн сілтейді. Өзінің көркемдік бағасын дер кезінде ала алмаған бұл шығармалар ұрпаққа талай сырды жеткізіп, талай ойды ұқтыратыны сөзсіз. Қ.Толыбаевтың шығармалары шалқар дала төсі мен асқар таулар қойнауының тылсым сырының көркем көрінісі, жанды бейнесі деуге болады.
Қаламгер балалар үшін көркем шығарма жазумен шектелмей, бала танымын арттырып, ойын өрістетуге керекті кітап құрастыруға да уақыт тапты.
Жазушының кейбір өлеңдері және ертегілері орыс, қырғыз, өзбек, түркмен, украин, беларусь, грузин, татар тілдеріне аударылған.
Жазушы азды-көпті ғұмырында артына із тастап, мол еңбек тындырған, тынымсыз қалам тербеген қажырлы қалып танытты. Жазушының бүгінге дейін жарық көрген он сегізге жуық кітабы соның айғағындай. Оның он беске жуығы балаларға арнап жазылған. Өнер тақырыбына жазылған «Нар идірген», «Әсет» атты кітаптары Құрманбай Толыбаев қаламының көркемдік қуатын танытқандай. Әсіресе, соңғы «Әсет» (1995) роман-новелласы жазушы ағаның әлі де талай айтылар, әңгіме шертілер сырынан үміт күттіргендей еді.