23 қыркүйекте Астана қаласындағы Ұлт­тық академиялық кітапханада «Таласбек сыйлығын» табыс ету кеші ұйымдастырылды.

Белгілі жазушы, күйші, кинодраматург, өнертанушы Таласбек Әсемқұловтың шығармашылығын ұлықтауға арналған байқау жыл сайын дәстүрлі түрде өткізіліп келеді. V «Таласбек» сыйлығының «Үздік әдеби туынды» номинациясы бойынша ақын Тоқтарәлі Таңжарық «Сен осы қалада жүрген секілдісің» өлеңімен лауреат атанды. Сондай-ақ Таласбек Әсемқұлов атындағы IV республикалық күйшілер байқауы екі кезеңге жүйеленді. Қорытынды кешке екінші кезеңге өткен күйшілер қатысып, жұрт алдында байқаудың талабына сай күй шерт­ті. Күйшілер байқауының әділқазылары қатысушылардың күйін сахнада тыңдап, бағасын берді. Нәтижесінде, 1-орын Ілияс Тұрсынбекке, 2-орын Арман Жаныбековке, 3-орын Қайролла Сұңқарға бұйырды.
Осы жобаның жетекшісі, жазушы, мәдениет­танушы Зира Наурызбаева үздік атанған әдеби туындының авторы хақында: «Таласбектің бір сөзі бар еді: қаламгер жетіліп төрт сатыдан өтеді: 1. Нашар және қарапайым (оңай); 2. Нашар және күрделі; 3. Жақсы және күрделі; 4. Жақсы және қарапайым (оңай). Тоқтарәлінің өлеңі – осы төртінші сатыға шыққан, бір романның жүгін арқалаған дүние», – десе, жазушы Сағадат Ордашева аталған шығармаға:
«Тоқтарәлі – әдебиет­тің түрлі жанрында қалам тербей алатын көпқырлы қаламгер. Оның поэзиясы шөл далада бітік өскен қара орман секілді, астары – терең, жазуы – көркем. Осы өлеңі де аялдап, ойлануға шақырады, кинотуынды ленталарындай жетелеп отырады, әлемдік картиналардың жиынтығы ойшылдың жүрек елегінен өтіп өлеңге айналған, қамырық пен қападағы қалпымызды қарапайым әрі күрделі стильмен сурет­тей алады. Ол Жаратушыға сауал жолдайды әрі күмәнданады. Сонысымен әдемі, биік»,
– деп баға берді.
Кеш соңында Қазақ ұлт­тық өнер университеті ректорының міндетін атқарушы Раушан Нұртаза, белгілі күйшілер Сәрсенғали Жүзбай, Ардаби Мәулет пікір айтып, дәстүрлі «Таласбек сыйлығына» сәт­тілік тіледі.