БИЯЗЫ КІРГЕН МЕШІН БЕРЕКЕЛІ БОЛҒАЙ!
Маймылмен мұнда ғана танысқан қазақтың жыл санауына мешін қалай кіріп кетті екен деп енді таңдана берсең, әр жылға бір мақұлықтың атын еншілеген жораның тарихы тым әріге барып тіреліп, түбі жоқ жорамалдарымен діңкеңді құртады.
Жиырмасыншы ғасырдың бірінші жартысындағы қазаққа жайсыз тиген қырғынды-жұтты жылдардың мешін жылына тура келуі – осы жылға аяқ артқан сайын бізді екіұшты сөйлеуге итермелейтін болыпты.
Бұл маймыл о баста бір қауым ел болған деседі. Құдайдың өзін алдамақ болып, қаһарына ұшырап, не адам емес, не жануар емес, кеспірсіз бір мақұлыққа айналыпты (Қазақтың «адамнан азған» дейтін көне дүниетанымы еске түседі). Мешін туралы түркі-моңғолдарда да осыған ұқсас мифтік сарындағы бір аңыз бар: Айналасына тыным бермей, жалпақ жұрттық жосығына мойынсұнбай, іштей іріп-шіріген, азғындаған бүкіл бір тайпаны әбден түңілген қалың ел жұрттан аластап, тастап кетіпті дейді. Әлгі тайпа ақыры азып-тозып, азайып, тірі қалған азғантайы жүре келе тілден, адамдық кейіптен ажырап, жабайы кепке ауысыпты. Содан бері бұл мақұлықтар (маймыл, мешін) адамзат баласын өзіне бақталас санайды екен-міс. Мүшел айналып келген сайын жайсыздау тиіп жататыны да сондықтан көрінеді.
Біз ғана емес, жыл санаудың дамыған, таралған ошағының бірі саналатын қытайлар да «қызыл маймыл», «отты маймыл» деп, бұл жылғы атқарар істерін «жеті өлшеп, бір кеседі» дейді.Бірақ қазақтың малы мен жанын қатар жалмаған мешіннің аса жайсыздығы әлгі соғыс жүріп жатқан 1944-пен тәмамдалады. Одан бергі 56-дағы тың игерудің зардаптарын айтпасақ, аса өкпе арта қоярдай ештеңеміз жоқ сияқты.
Бүгінге келсек… Экономикалық дағдарыс, теңгенің тұрақсыздығы біз тоқшылыққа балап жақсы көретін қой жылында басталғанына қарамастан, атышулы мешін жылына жаба бергіміз келіп тұратыны несі екен. Жылдың жаман-жақсысы болар ма, түбін қазсаң, қай жылда кімнің басы қалмады дейсіз! Кімнің тойы болмады дейсіз…
Таздың басы мен пұшықтың мұрнына да қона беретін адасқақ бақ мешін екен демей, биылғы жылдың да еншісіне бұйырғай деген игі тілектен асар не бар, тәйірі…
Наурыздағы тілек:
– Қызыр дарысын! – деп түйінделетін…
Алмас НҮСІП.