ТАМЫРЫ ТЕРЕҢ ТАҢБА, БЕДЕРІ ҚАЛЫҢ БЕЛГІ – XVI
22.05.2023
2669
0

Мамырдың 12 жұлдызы Алатаудың баурайында, әйгілі шаһар – Алматыда Алаштың қалам ұстаған қауымын бір ниет, бір мақсатта бас қостырған дүбірлі жиын өтті. Бұл – Қазақстан Жазушылар одағының кезекті XVI құрылтайы-тұғын. Әр құрылтайдың бес жыл сайын өтетінін ескерсек, біз атап отырған цифр XVI құрылтай тарихи дәуірді, қазақтың кәсіби жазу-сызуының жылнамасын еске түсіретін тамыры терең таңба, бедері қалың белгі.
Әлқисса, алыс-жуықтан атқа қо­нып, Алматыны бетке алған қалам­гер­лер керуені межелі күні (11 мамыр) «Ал­маты» қонақүйінен қоныс тепті. Сөз сүлейлері қаланың «алтын аудан» саналатын аймағында сағы­нысып қауышып, алып-ұшып табысып, арқа-жарқа болды. Келесі күні қонақүйге қарсы орналасқан Абай атындағы Қазақ Мемлекеттік Академиялық опера және балет театрының әсем ғимаратында өтетін үлкен құрылтайды асыға күтті.    

«Тойдың болғанынан боладысы қызық» жиынның да басталар сәті жетті. Қара шаңырақ өнер ордасының залы адам­ға лық толды. Әнұран айтылды. «Түн ұйықтамай, күн отырмай» баба-дала төсінде мемлекет құрған түркі жұртының тұқымы орнынан түгел тұрып, оң қолын кеуде тұсына қойып, айбатты әнұранын бірге әуелетті. Бұл жөні бөлек жоралғыдан кейін Республика Президентінің қаламгерлерді аталмыш құрылтайдың ашылуымен құттықтаған, Жазушылар одағының ел өміріндегі үлкен орны туралы толғаған үшбу хатын Ақпарат және қоғамдық даму министрі Дархан Қыдырәлі оқып беріп, жиынның сәтті өтуіне тілектестігін білдірді. Құрыл­тайды жүргізген ақын Бауыржан Жақып Covid-19-індеті кезінде жүзден аса қаламгер көз жұмғанын қаперге салып, жиналған жұрт орындарынан тұрып, бір минут үнсіз аза білдірді.
Індеттің кесірінен қаламы қуатты қан­шама қаламгерінен көз жазып қалғанын үнсіз еске алғаннан кейін жұрт бұдан бес жыл бұрын сайланған Қазақстан Жазушылар одағы Басқарма Төрағасы, ақын Ұлықбек Есдәулеттің баяндамасына құлақ түрді. Бес жыл бойы Жазушылар одағы қандай шаралар атқарды? Елдің рухани өмірінде алыс-жақын шетелдермен әдеби, мәдени байланыс барысында нендей жаңалықтар болды? Мұның бәрі аталмыш баяндамада егжей-тегжейлі айтылды. (Баяндама газетіміздің алдыңғы нөмірінде толық жарияланды және ол газет құрылтай делегаттарына берілді).
Негізгі баяндамадан кейін Бақы­лау-тексеру комиссиясының есептік хабарламасы таратылды. Комиссия төрағасы, жазушы Әлібек Асқаров өткен бес жылда Жазушылар одағы­ның есеп шотына түскен қаржыны, иелі­гіндегі дүние-мүлікті түгел түгендеп берді. Есеп­тік хабарламадан кейін жарыссөз бас­талды. Жазушы Дулат Исабеков, ақын Иранбек Оразбаев, жазушы Кәдір­бек Сегізбаев, ақын Пәтигүл Мақ­сатова, ҚР Мәжіліс депутаты ақын Қазыбек Иса, «Прос­тор» журналы редакторының орын­басары Любовь Шашкова, ақын Ерлан Жүніс мінберге көтеріліп, бүгінгі әдебиет, аударма мәселесі, кітап шығару ісі, Жазушылар одағының тарихи орны жайында тереңнен толғап, ақсақалы аталы, жасы жаны қалаған сөзін айтты.
«Қазақстан Жазушылар одағы – ел руханиятының қара шаңырағы. Ұлы Даланың ұлттық рухын сақтап қана қоймай, күшейту – ең алдымен қазақ қаламгерлерінің қасиетті парызы. Қай заманда да, қара сөзден қаймақ айырған қаламгерлеріміз ұлттың ұйыт­қысы, ұрпаққа үлгі бола білгені бел­гілі. Осы руханиятымыздың қара­шаңырағы – ҚЖО бастаған шығар­машылық ұйымдардың жағдайы еліміз тәуелсіздік алғалы неге қиын­дап кетті? Тәуелсіздік алған 1991 жылдан кейін Шығармашылық одақтар мемлекеттік қаржыландыруға кірмей, үкіметтік емес ұйымдар қата­рында ғана қалды. Ал ондай ұйым­дар ол кезде 100 шақты ғана болса, қазір 2023 жылы 23 мыңнан асады.
Сонымен зал­­да отырған басым көпшіліктің дауы­сымен Қазақстан Жазушылар одағы Басқарма мүшелігіне 115 адам сайланып, жаңа құрам бекі­тілді. (Басқарма мүшелерінің тізімін 2-беттен көре аласыздар). Басқарма мүшелері сайланғаннан кейін Алматы қаласы әкімінің орынбасары Арман Қырық­баев құттықтау сөзін сөйлеп, қала әкімдігінің бұл құрылтайға барын­ша қолдау білдіргенін жеткізді. Қалам­герлерге шығармашылық табыс тілеп, ақжарма тілегін айта келіп, қаламгерлерді қала әкімі жайған дастарқанға шақырды.
Қазақстан Жазушылар одағы Бас­қар­масының Төрағасын сайлау кіші залда өтті. Бұл жиынды жазушы, Басқарма мүшесі Әлібек Асқаров жүргізді. Нәтижесінде ба­сым дауыспен жазушы Мереке Құл­кенов Қазақстан Жазушылар ода­ғының Басқарма Төрағасы болып сайланды. ҚР Халық жазушысы, Қазақстанның Еңбек ері Мұхтар Шаханов, ақын, Мемлекеттік сыйлықтың иегері Иранбек Оразбаев, филология ғылымының докторы, Халықаралық «Алаш» әдеби сыйлығының лауреаты Құлбек Ергөбек сөз сөйлеп, жаңа төрағаға қызметіне сәттілік тіледі.
Қазақстан Жазушылар одағы Басқарма Төрағасы болып сайланған жазушы Мереке Құлкенов Басқарма мүшелеріне төраға орынбасарлары мен Жазушылар одағы хатшыларының кандидатурасын ұсынды. Басқарма мүшелерінің мақұлдауымен бес орынбасар, 19 хатшы сайланды.
Сонымен талай тілге тиек, әңгімеге арқау болған Қазақстан Жазушылар одағы Басқарма Төрағасын сайлау жоғары деңгейде өтті. Ұлт зиялылары деген атқа кір шалдырмай, сайлауға белсене қатысқан қаламгерлерге алғыс айтамыз.

«Қазақ әдебиеті» газеті
Суреттерді түсірген
Мақсат ҚҰСАЙЫНОВ,
Сәрсенбек Қызайбекұлы

ПІКІР ҚОСУ

Ваш адрес email не будет опубликован.

Пікір