Жабал Ерғалиев. ӘР АДАМ ӨЗІНШЕ БАҚЫТТЫ
09.04.2020
258
0

«Қазақ әдебиеті» vs «Пруст сауалнамасы»

Сауалнама қонағы – жазушы Жабал Ерғалиев

– Адамның басты қасиеті не деп ойлайсыз?

– Адамның басты қасиеті Адам боп қа­луын­да шығар. Деген­мен кісілік пен кішілікке не жетсін?!

– Ер азаматтың басты қасиеті ше?

– «Құлпытастың көз жасы» атты драмалық шығармамда басты кейіп­керім Жамалдың: «Еркегі сайқалданып кеткен мына заманда не ақыл-ес қалды дейсің?» – деп бір айта­тыны бар еді. Ер-азаматтың басты қасиеті – ақыл мен парасат, жігер мен намыс!

– Бақыт деген ұғымды қалай түсінесіз?

– Әр адам өзінше бақытты! Менің бақытым – осы күйім, осы тіршілігім!

– Сүйікті әдеби кейіпкеріңіз кім?

– Бала кезімде оқыған «Батырлар жырын­дағы» Қобыланды, Ертарғын, Алпамыс… Сонымен бірге Абай, Ұлпан, Ақан сері…

– Ең басты кемшілігіңіз қандай?

– Бәріне сене беретіндігім.

– Бос уақытыңызда немен айналысасыз?

– «Фейсбукте» пікір жазамын, кітап оқимын, немерелеріммен бірге болуға тырысамын, далада серуендеп жүремін.

– Өмірге екінші рет келсеңіз, кім болуды қалар едіңіз?

– Бұл өмірге екінші рет келмей-ақ қойған да жақсы шығар!..

– Қандай елде өмір сүргіңіз келеді?

– Өз елімде, Қазақ елінде!

– Қандай ерекше қабілетке ие болғыңыз келеді?

– Адамдарды адалдық жолына сала алсам ғой.

– Қандай сәттерде осалдық танытасыз?

– Өзіме жалған бір жала жабылған кезде.

– «Ғайыпқа сену» дегенді қалай түсінесіз?

– Жаратқан иемізге сену бұл. Соның маңдайыңа жазғаны болады.

– Егер өнертапқыш болсаңыз, нені ойлап табар едіңіз?

– Барлық әлеуметтік желілер мен өзге де ақпарат құралдарында адам баласының айуандығы мен жамандығын, адамды аздыратын жайларды жария еткізбей, бірден өшіріп тастап отыратын құрал ойлап шығарар едім.

– Неден жиіркенесіз?

– Ер азаматының алдына түсіп, жолынан да, аузынан да қағып отыратын әйелден.

– Сіз үшін ең ұнамсыз тарихи тұлға кім?

– Бекежан… Құлагерді құлатқан қарақшы.

– Жиі айтатын қанатты сөзіңіз?

– «Қазақтың өлген кісінің жаманы жоқ» (Абай).

– Көзіңізге жиі жас аласыз ба?

– Анамды ойласам.

– Үнемі есіңізде жүретін Абайдың бір сөзі?

– «Қазақтың өзге жұрттан сөзі ұзын…»

– Қазіргі адамдардың бойынан қандай қасиеттер жоғалып барады?

– Бір-біріне деген жанашырлық пен біріне бірі болсын дейтін ниет жоғалып бара ма деймін.

– Біздің заманымыздың мықты ақыны кім? Мықты жазушысы ше?

– Осы күнгі ақындар мен жазушылардың бәрі де өздерін мықты санайды емес пе? Қайсыбірін айтарсыз?

– Жас қаламгерлердің бойынан қандай артықшылықтар мен кемшіліктерді көріп жүрсіз?

– Еркін сезінетіндіктері ұнайды. Алайда бүгінгі әдебиет тек өздерімен басталғандай, әдебиет енді түзелгендей ұшқары ойлайтындарын көрсетіп алады.

ПІКІР ҚОСУ