«Пруст сауалнамасы» vs «Қазақ әдебиеті»

Сауалнама қонағы – ақын Қуат ҚАЙРАНБАЕВ

– Адамның басты қасиеті не деп

ойлайсыз?

– Адалдық пен кәсібилік шығар…

– Ер-азаматтың басты қасиеті ше?

– Бірсөзділік және қайсарлық деп ойлаймын.

– Бақыт деген ұғымды қалай түсінесіз?

– Айналаң мен өз жаныңнын үндестігін тапсаң – сол бақыт!

– Сүйікті әдеби кейіпкеріңіз кім?

– Шығармада да, өмірде де Оспан батырдың тұлғасына бас иемін.

– Ең басты кемшілігіңіз қандай?

– Ұрымтал сәтте ұмтылдырмайтын жігерсіздік…

– Бос уақытыңызда немен айналысасыз?

– Диванда жатып, теледидар тамашалаймын.

– Өмірге екінші рет келсеңіз, кім болуды

қалар едіңіз?

– Маған өз мамандығым ұнайды. Дегенмен таңдау берілсе, конструктор болуды қалар едім.

– Қандай елде өмір сүргіңіз келеді?

– Халқы – бақ-қуатты, патшасы – қанағатшыл, ерлері – ұлтжанды елде тұрғым келеді.

– Қандай ерекше қасиетке ие болғыңыз

келеді?

– Адамдарды жақсылыққа үндейтін, сөзіме иландыра алатын болсам ғой…

– Қандай сәттерде осалдық танытасыз?

– Көнтері жандарға кездесіп, ақиқатты айту қолымнан келмей қалғанда…

– «Ғайыпқа сену» дегенді қалай

түсінесіз?

– Егер ерік-жігеріңді бір мақсатқа жұмылдырсаң, ғайыптың өзі шындыққа айналуы ғажап емес!

– Егер өнертапқыш болсаңыз, не нәрсені

ойлап табар едіңіз?

– Һарам пиғылды адамдарды бірден анықтап, елге енгізбей қоятын қондырғы жасар едім.

– Неден жиіркенесіз?

– Екіжүзділік пен ұятсыздықтан!

– Сіз үшін ең ұнамсыз тарихи тұлға кім?

– Голощекин.

– Жиі айтатын қанатты сөзіңіз?

– «Білгеніңді айта берме, айтарыңды біліп отыр».

– Көзіңізге жиі жас аласыз ба?

– Жалпы, өте көңілшекпін.

– Үнемі есіңізде жүретін Абайдың

бір сөзі?

– «Бір жерде бірге жүрсең басың қосып,

Біріңді бірің сөйле сөзің тосып».

Біріңді ғиззәт, құрмет етіс,

Тұрғандай бейне қорқып, жаның шошып!»

– Қазіргі адамдардың бойынан қандай

қасиеттер жоғалып барады?

– Жанашырлық, ізгілік, бекзаттық.

– Біздің заманымыздың мықты ақыны

кім? Мықты жазушысы ше?

– Атын атап, түсін түстемей-ақ қояйын. Өздерін «классик» санап жүргендерді өкпелетіп алармын. Дегенмен әдебиетте оза шауып жүрген оғландарымыз баршылық.

– Жас қаламгерлердің бойынан қандай

артықшылықтар мен кемшіліктерді

көріп жүрсіз?

– Білімділік пен ізденімпаздық – артықшылығы. Жайдақтық пен қиялилық – кемшілігі!