Айрықша кеш өтті айта жүрер
25.10.2015
947
0
567642_1183065109_zhamaliЖуырда Жамбыл атындағы қазақ мемлекеттік филармониясында Қазақ хандығының 550 жылдығына орай «Нұр Отан» партиясы мен партия хатшысы Қайрат Сатыбалды­ұлының тікелей қолдауымен кино және цирк әртісі, өнер зерттеушісі, Қазақстан КИнЭС рекордшысы Жәмәли Диханұлының «Сырлы өнердің сырласы» атты кеші өтті.

Жәмәли Диханұлы қазақтың ұлттық спорты мен қазақ өнерін дәріптеу жолында көп жылдар бойы талмай еңбек етіп ке­леді. Оның рекордтар кітабының же­ңім­­­пазы болуы да осы қажырлы ең­бегінің жемісі. Жә­мәли Диханұлы Қытай Ха­лық Республикасымен шекаралас  Дер­білжін ауданы, Күрті ауылында дүниеге кел­ген. 1991-1995 жылдары СУАР пе­да­гогикалық дене шы­нықтыру факультетінде оқып, 1995-1999 жылдары Шаң­хай, Шан-ши қаласында шығыс жекпе-жегі мен цирк өнерінен білімін жетілдірген. Қытай елін­де жүріп спортшы және цирк өнер­па­зы ретінде танылған Жә­мә­ли елге келген соң «Абылай ханның балалық шағы» ту­ралы фильмде Әбілмансұрдың тәрбиешісі Ораздың рөлін сомдады.
Ш.Айманов атындағы киностудия тү­сір­ген «Ақ­сұңқар», «Орындалған арман» ат­ты фильмдерде де каска­дер­лік ойын­дар­ға түсті.

Қанат МҰСАҒҰЛОВ, «Нұр Отан» пар­тия­­сы хат­шы­сы­ның кеңесшісі:

– Жәмәли Диханұлы Алланың берген ерек­ше қа­сие­тінің арқасында жалаңаш де­несіне найза қадайды, велосипедті тісі­мен-ақ тік көтереді, тіпті, тісімен көлік сүй­­рейді, аузымен от бүркіп, пышақтан баспалдақ жа­сап, соның үстімен жалаң-аяқ жүре алады, ол аз де­се­ңіз, ат құла­ғын­да ойнайды. Мұның бәрі қазақтың жа­уын­­герлік өнерінде бар тәсілдер десек ар­тық айтқандық емес. Осындай өнер ие­сін халыққа таныстыру мақ­сатымен осы кешті ұйымдастырып отырмыз.
Концерт барысында спортшы 18 пы­шақ­тан баспал­дақ жасап, оның үстінен жа­лаңаяқ жүріп өтті. Кір тасын қаңбақтай ой­натты. Жәмәли Диханұлының айтуынша, бұл өнерді меңгеруіне әкесі себепші бол­ған. «Менің ал­ғашқы ұстазым – әкем. Ол: «Сенің қанша миллион­да­ған ақшаң бол­са да, мыңғырған малың болса да, олар саған пайда әкелмейді. «Мал бір жұт­тық» дегендей, олар бір демде жоқ бо­лып кетуі мүмкін. Ал бойың­да өнерің бол­са, білімің болса, оны ешкім ұрлап не­месе тартып ала алмайды. Сондықтан бі­лім ал, өнерлі бол. Өнер есіктегі ба­сың­ды төрге сүйрейді», – деп үнемі айтып оты­ратын. Әкемнің өзі де темірден түйін түй­ген ұста болды. Қазіргі кеудеге найза қа­дап көрсетіп жүр­ген нөмірді үйрену үшін бала кезімізде қамыспен жат­ты­ға­тынбыз», – дейді Жәмәли Диханұлы.
Сонымен қатар, Жәмәли Диханұлы «Қа­ра жорға» биін насихаттау мақсатында «Қа­ра жорға» қауымдас­ты­ғын құрды. Моң­ғолия мен Қытай жеріндегі қазақтар ме­­кендеген ауылдарды аралап, бидің та­рихымен танысты. Мұрағаттарды ақ­та­рып, деректер жинады. «Қа­ра жорға» қа­зақтың биі екендігіне дәлелдер кел­тіріп, халық биі туралы кітап жазды. Қа­зақ­тың ұлттық спорты мен өнерін бір-бірі­мен қабыстырып, қатар на­сихаттаған кеш­ке қазақтың зиялы азаматтары мен қа­­тар бірқатар өнер адамдары қатысты.

Серік ЖҰМАБАЕВ.
ПІКІР ҚОСУ